قووزانان طوفان دی،آذربایجان! ــ حسن جداری

تك توران : جسمه، سانکی جان دی،آذربایجان

عشوه لی،جانان دی، آذربایجان

ای گوزل لریوردی،ای شانلی دیار

جان سنه قوربان دی،آذربایجان

داغلاری گول دور،چیچک دور،لاله دور

توپراغی،مرجان دی،آذربایجان

حسرتینده یانمیشام ایللربویی

صبرائوی،تالان دی،آذربایجان

وصلوه مشتاقم اما نیلیوم

قسمتیم، هجران دی،آذربایجان

سنده کی شان و جلال وشوکته

عقل ئوزی حیران دی،آذربایجان

کیمسه کی ،تاریخیوی انکار ائده

سوزلری، هذیان دی،آذربایجان

خلقیوه، اولادیوه تهمت یاخان

بیل کی بی وجدان دی، آذربایجان

قهرمان تاریخیوین،هر صفحه سی

قانلی بیر عنوان دی،آذربایجان

حقیّ نا حقّ ایلی ین د وشمن لرین

نفرته شایان دی،آذربایجان

ارتجاع نین ظلمی چون حددن آشیب

چاره سی ،عصیان دی،آذربایجان

            ****

بابکه،ستارخانااولموش وطن

سنگر ایمان دی،آذربایجان

مسکن اولموش قهرمان حیدرخانا

اوغلی،باقرخان دی،آذربایجان

وار نسیمی تک،ایگیت اوغلانلاری

مرکز طغیان دی،آذربایجان

معجز و صابر کیمی سیمالره

عرصه جولان دی،آذربایجان

باش گوزوندن هر گلن،بیر اوخ وئریب

قانینه غلطان دی،آذربایجان

گووزانیب آه و فغانی گوی لره

سینه سی، سوزان دی،آذربایجان

ظلم دن،تحقیر دن،تبعیض دن

خسته دی،نالان دی،آذربایجان

غارت اولموش بیر به بیر ثروت لری

سر بسر، ویران دی،آذربایجان

ظلمه تسلیم اولمین انسانلارا

قورخولی زندان دی،آذربایجان

قلبینه دوشمن وئریب مین لر،یارا

لخته لخته، قان دی،آذربایجان

ایندی ده بهرنگیه،دهقانیه

گوزلری،گریان دی،آذربایجان

           ****

باخما ساکت اگلشیب بیر گوشه ده

قووزانان طوفان دی،آذربایجان

تا اسارت زنجیرین،کوک دن قیرا

عازم میدان دی،آذربایجان

دوشمنه تا قدرتین وئرسین نشان

خنجر براّن دی،آذربایجان

قورخی سالمیش ارتجاع نین جانینا

سانکی بیر اصلان دی،آذربایجان

دور ماسین قاشسین اونون دوشمن لری

حیرصیلی،قافلان دی،آذربایجان

اود،یاغیر هر کلمه سین دن شعریمین

سانکی بیر ولکان دی،آذربایجان

1384اینجی ایلین،آذر آیی