1984-جي ايلده اردبيلده اورتا مکتبي اوخودوغوم زامان يحيا شئيدانين امکلري ايله تانيش اولموشدوم. داها اؤنجه‌دن "دوستلار گؤروشو" و ديگر بو کيمي کيتابلاردا شئيدانين اثرلري ايله تانيش ايديم و بعضي شئير پارچالاريني دا ازبر بيلرديم. داها سونار شئيدانين تبريزده "فوروغي-آزادي" قزتينين تورکچه يارپاغينين سوروملوسو اولدوغونو اؤيرنديم. او زامانلار چوخ گنج ايديم. يازديغيم شئيرلرين شئير اولوب اولماديغيني بيلميرديم. شئيدانين آدرئسينه يازديغيم شئيرلريمي پست ائديرديم. ايلک کز اولاراق شئيرلريم "فوروغي-آزادي"ده چاپ اولدو. بو، منيم اوچون چوخ اؤنملي گوون قايناغينا دؤنوشدو. ادبييات يولوندا ايره‌ليله‌مه‌يه حوسلنميشديم. داها سونار تبريزده‌کي حياتيمدا شئيدا ايله ياخيندان علاقهساخلارديق. يانيلميرامسا، 1988-جي ايلده شئيدانين ياراديجليغينا حصر اولونموش بير گئجه کئچيريلدي. بورادا من ده شئيدايا حصر ائتديگيم شئيريمي اوخودوم.
شئيدانين ميللي ديليميز و ادبيياتيميز يولوندا چکديگي زحمتلر چوخ بؤيوک اولموشدور. 1984-جو ايلده "ادبييات اوجاغي" آديندان ايري حجملي کيتاب ياييملادي. کيتابدا، يالنيز تورکچي يازان، اؤزلليکله گنج شاعيرلرين شئيرلري وئريلمييشدي. آذربايجانين و ايرانين دييشيک يئرلرينده ياشاييب و تورکچه يازان شاعيرلرين اثرلريندن اؤرنکلر کيتابدا يئر آلماقدا ايدي. بو کيتابدا منيم 3 شئيريم وئريلميشدي. بوتون بونلار مني و منيم کيمي ادبييات هوسکاري اولان اينسانلاري بو يولدا ايراده‌لي اولماغا سؤوق ائديردي. بو باخيمدان شئيدا، يئني و ادبيياتدا قرارلي اولان بير نسلين يئتيشمه‌سينده چوخ تاثيرلي اولدو. او زامان ادبيياتا يئنيجه گيريب ايندي ايس، ادبيياتدا سؤز صاحيبي اولان نسلين بوينوندا شئيدانين بؤيوک حاقي واردير. تانري اونا رحمت ائيله‌سين.
10/24/2011
10/24/2011
