۱۳۹۰ آبان ۲۳, دوشنبه

بیر یاندا دیرچه لیش بیریاندا باتیش (تبریز دوستاغیندا توتوقلو اسلانلارا سونولور) – اسماعيل جميلي


بیر یاندا ال ایاق    چالان باتانلار

اویدورما یازیلار چوروموش سؤزلر

بیر یاندا دیر چه لیش سونسوز آرزولار

آرینمیش دورولموش    پارلایان گؤزلر



بیر یاندا غم کدر      ماتم    مصیبت

عومور گون ده یرسیز   ایلنجه حرام

بیر یاندا دیره نیش    یاشایش  سئوینج

اؤزگورلوک اؤزله می سئودالی یاشام



بیر یاندا  کئچمیشده      ایتیب باتانلار

اونودموش اودوزموش یاشایان چاغی

بیر یاندا قاپینی دوین         شن باهار

آرزولار دوزونون  چیچک چیراغی



بیر یاندا سوزاران سارسیلان اسگی

آغیزدان آغیزا     دولاشان   بؤهتان

بیر یاندا گنجیلیک جوشان یاشاییش

آیدین  اوفوقلره    گؤز تیکن اینسان



بیر یاندا گئریه    قاچان قیسیرلار

گیزلی فیریلداقلار  آشکار یالانلار

بیر یاندا دوستاغا سیغماز اؤزگورلر

قورتولوش نغمه سین  دیله سالانلار



بیر یاندا دیپ قاپمیش قودورقان مرکز

اسیرلیک کؤله لیک    یادلیق اوداغی

بیر یاندا دیرچه لن       قوجامان تبریز

اؤزگورلوک  نغمه سی سئوگی قایناغی

اسماعیل جمیلی