۱۳۹۰ آبان ۳۰, دوشنبه

تيراختور اهواز دا اودوزدو، تيراختورچولار دا تبريزده!

تک توران : تيراختور ياخشي نتيجه آلمابيلمه‌يه‌نده، دوز دور باشقالار كيمي "عئيبي يوخ" دئييرديم، آما دوزون سؤزو نئچه گئجه، راحاتسيزليقدان يوخوم گلميردي.

آنجاق بو دؤنه اهواز دا كي اودوزماقدان، ائله ده اينجيمه‌ديم. قلعه‌نويي و اونون تاخيمي‌نين ضعف‌لريندن دانيشماق‌دا ايسته‌مه‌ييرم. هر كيمسه، ايلك دفعه تيراختور اويونونا باخسا، دئيه‌ر عليزاده و ابراهيم‌زاده كيمي اويونچولارين مئيداندا فيكس اولماغيندان تعجب ائدر! كياني‌نين تيمدن ائشيگه آتيلماسي‌دا، انتقاد ايچين چوخ ساده بير قونو دور و هر اوزاق‌دان باخان، دئيه‌بيلر كي بو اودوزمالارين نه‌ده‌ني كياني‌نين اويناماسي‌دير. آنجاق بير دؤنه سوروشاندا ايستيقلال قاباغيندا كياني يوخ ايدي، نئجه تيراختور باشاردي هئچ كيمسه جاواب وئره بيلمير!

هله بو گونلر، چوخلو سايتلار دا كمالوند دؤنمي‌نين نوستالژي‌سي يادلارا دوشوب! بيرينجي ليگ‌ده، رسول خطيبي‌دن داليا دوشن كمالوند! گؤردوم بير يئرده يازيبلار نئجه "ترشيز" كيمي غئيرتلي اويونچولاري الدن وئرديك! و بئله سؤزلر. ترشيزين تيمي دؤنن ائوده دؤردون يئدي.

قلعه‌نويي‌نين اخلاغيني اصلن سئوميرم، و چوخلو يانليشليقلاري واردير و اونون هله‌ده ايكي قيرانليغي دوشمه‌ييب نه بؤيوكلوك‌ده تاخيما گلميشدير؛ آنجاق آمار باخيميندان، ائودن ائشيك اويونلار دا هر ايكي اويوندان بيري‌سي‌ني اودماق گئچن ايللره گؤره چوخ ياخشي سونوج دور. هر حال‌دا قهرمانليق ايسته‌يه‌ن فولاد كيمي تيم قارشي‌سيندا تكجه ايكي قول موقعيت ياراتماسي، بؤيوك بير ضعف‌دير و انتقاد ائتمك اولار.

ولي انتقادلار دئيه‌سن بو دؤنه فرق ائدير و چوخ ايتي گؤرونور. حالبوكي ايندي تيراختورچولار اؤزلري، تيراختور مسؤوللاريندان چوخ انتقاد اولونماغا لاييق‌ديرلر:

آزربايجان و تبريزين ايكينجي تاخيمي، بلديه(شهرداري)، آزربايجانين بيرينجي تاخيمي‌نين رقيبي قاباغيندا اويناياجاق؛ تئهرانين نفت تيمي قارشي‌سيندا. تيراختور اويونو ايكي ساعات‌دان سونرا دير. اويوندان قاباق، خالقا اؤنرديك(پيشنهاد وئرديك): "تيراختور گئديب؛ نفتي، بلديه‌‌ ايله يانديراق."! آنجاق بلديه‌ني تبريزده آلقيشلايانين سايي‌سي، اهواز دا تيراختورو آلقيشلاياندان آزدير سانكي! ايستاديوم‌داكي سينيق قولتوغون(صندلي‌‌نين) سايي‌سي، تاماشاچي‌دان چوخدور!

شهرداري اوچ امتيازي‌ سون ثانيه‌لرده الدن وئردي، آما قويمادي تيراختورون رقيبي، تبريزدن الي دولو گئتسين. اويوندان سونرا بير يئرده، بئله بير نظر وئرديم:

جماعت ائوینده چکیشدیریر تیلویزیون قاباغیندا، انتظارلاری دا اولماسین تیملری هامی‌نی اودسون! يادنداشلارا سانكي بئشینجی یئر ده چوخدور! تيراختورون فیکرینده اولان یانداش بو گون نه‌یه گئتمه میشدی ایستادیوما بلدیه‌نی آلقیشلاسين؟! من کی سئویندیم تیراختور اودوزدو! يانداشلار اؤزلرينه گلسين دئيه!

آنجاق بير نفر مني خيانت(!) ايچين سوچلادي:

به به! عجب استدلالين وار! بئشينجي روتبه ده چوخدور بيزه، چونكو گئتمه‌ديك بلديه اويونونا. اصلن بلديه اويونو بيزه نه؟(!؟؟) بلديه اوستون ليگ‌ده اولماسايدي نئيله‌يه‌جكديك؟ بيز اؤزوموز حريفلردن امتياز آلمالي‌ييق. تيراختورون شانيندا دئييل باشقا تاخيملارين الينه گؤز تيكسين! فيكرينيزي دوزه‌لدين! كيمسه ايسته‌ييرسه تيم اودوزسون، يانداش دئييل هئچ، ساتقين‌دير.

بو دا بير جور باخيش‌ديردا! يقين‌كي بلديه‌ني آلقيشلاماغا گؤره ايستاديوما گئتمه‌يه‌نلر، هامي‌سي، "آزربايجان تيملري، فرق ائله‌مز ره‌لري" سؤزونه اينانيرلار. آنجاق منيم خوشوما گلمه‌سه‌ده، ايكي ميليونلوق جمعيتي اولان تبريزين، ايكينجي تيمي‌نين عمل‌ده، تك باشينا قالماغي، "شهرداري‌نين اويونو بيزه نه" دئمه‌يين گرچك آنلاميندا! بير باشقا سؤزده بو دور كي "بيز اؤزوموز حريفلردن امتياز آلمالي‌ييق" ايده‌آل فيكردير! مگر بو ليگ، بير ايده‌آل ليگ‌دير كي بيز ده ايده‌آل دوشونوب و ايده‌آل امتياز آلاق؟

بو لیگده، بوتون تیملر آزربایجان تیملری قاباغیندا، آرتيق انگیزه ایله اویناييرلار، و مملكتين ايكي قطبلي فوتبول سیستئمی ایسه، آزربایجان تیملری‌نین قارشی‌سی‌ني بوتون امكانلار ایله آلير سانكي. و ترسینه چوخلو تیملر، اؤزللیکله استقلال و پیروزی قاباغیندا، اؤز اوینادیقلایرینی اوینامايیرلار و اؤنجه‌دن اودوزماقلارينا اينانيرلار سانكي. بیز ده بو ائشيتسيز و نا برابر دوروم‌دا، بلدیه پوتانسییئلیندن ایستیفاده ائتمه‌لی‌ییک. منجه ان آزی تیراختورون اؤز قازانجینا گؤره، ایکینجی تیمیمیز، یانی بلدیه‌نی آلقیشلاماماق، اؤزو چوخ بؤیوک بیر سورون(مسأله) دور. بونو قبول ائتمه‌سه‌ک تیراختورون گله‌جه‌یی آيدين اولمایاجاق.

بیز قیامته قدر ده ايسته‌سك، قلعه نویی کیانی ایله باریشمایاجاق! او بیر مغرور آدام دیر و سؤزوموزو قبول ائتمه‌یه‌جک. آنجاق بلدیه و حتي ماشينین حذفي ليگ‌ده، تیراختور کیمی چوخلو تاماشاچی‌سی اولورسا، تیراختور سوروملولاری بیر آز هوش باشلارینی ییغارلار بیر یئره، و تيراختورون باشاري‌سي ايچين داها آرتيق چاليشارلار.

بو آرادا دا، یانداش و تاماشاچی تكجه الیندن گلندن ایشی گؤرمه‌لی‌دیر. تيراختور ايسه راه‌آهن قارشي‌سيندا 3 امتياز آلماغي چوخ اؤنملي‌دير. اهواز دا كي اودوزماغا گؤره، دويغوسال(احساساتي) ايشلر گؤرمه‌يه‌ك.

بلديه‌ني شاختادا آلقیشلایانلارين افتخارينا

ياشاسين آزربايجان تيملري

آيدين كسائي

28 / گــوز اورتاسي (آبان) / 1390