یوخ دئدین چون ظالیمه اولدون بو خلقه جاودان
خوش باهارین ظولم الیله لاله تک توتدو نه قان
قصد ائدرکن چون زامان شمشیر چکدی باغلارا
عطرینی یئللردن آلدیم چون شفق پیغام ائدیب
هر سحر باد صبا سؤیلر گینه سندن نیشان
باغ و بستان چون یانیب اؤلکه فلاکت دیر بوتون
اود توتوب پروانه لر شعله چکیبدیر جیسم و جان
خاطیره ن اؤلمز مزارین ائللرین قلبینده دیر
داستان اولدو بو خلقه جورئتین دیلده بیان
او اگیلمز بوینون اولدو داردا عصیان صحنه سی
ایستیقامتدیر بو سمبول ظولماتا غوغا سالان
یاتمایب طغیان سسی مین لاله لر آچمیش یئنه
سسله نیر توفان گینه توتموش اگر بستان خزان
نیسگیل اولدو خلقینه ایللر غریب تک او مزار
خاطیرینده بیرگولوستان لاله سی خوش بیرجاوان
مظهرعشق اولموسان خلقیم اونودمازچون سنی
غنچه ناکام سولارکن بیر قیزیل گول تک یامان
چون شفق سالدین سوزرکن او قارانلیق گؤیلره
ظولماتا وحشت دوشرکن لرزه توتدو گؤر نه سان
ثبت اولوبدور خاطیره ن تاریخده گؤرکم زیروه تک
سؤیله نر دیللرده ایللر دیر کی او قانلی فغان
قهرمان ای خلقیمین آزاده لیک عصیان سسی
یاد ائدر ائللر سنی تاریخ اونودماز هئچ زامان
آبان ـ 1390
