ماتیاس شولچ، آلمان تاریخچیسی نین Spiel درگیسینده یایینلاتدیغی مقاله یه اساسن فارس ایستعمارچیلاری باشلاریندا محمدرضا شاه فارس ولایتینده، 2500 ایللیک شاهلیق دئیه تخت جمشیدده بایراملاماسی و جشن توتماسی بیر آلینماز قلعه یوکسکلیگینه قالدیریلمیش یالاندان باشقا هئچ نه دئییلمیش. محمدرضا اؤزونو آریالیلارین گونشی (شاهنشاه آریامهر) آدلاندیرماق اوچون یئر ایصلاحاتینی قانسیز دئوریم (انقلاب سفید) دئیه حیاتا کئچیره رک 1971 اینجی ایل 2500 ایللیک ایران شاهلیغی دئیه دونیا اجتماعیتی قارشیسیندا بایرام توتماغی سرگیلمگه چالیشمیش. محمدرضا تخت جمشید خارابالاریندا اللی دانا آلاچیق تیکدیره رک آتمیش دوقوز مملکتین باشچیلارینی و بگلرینی و اؤزللیکله ژاپون شاهینی اورایا قوناق چاغیرمیش. ماسا اوزرینده Château Lafite magnum[1] شیشه لری یئر آلیرمیش. بایرامین و شنلییگین طنطنه لی زامانیندا محمدرضا شاه ایکینجی کوروش آدلاندیردیقلاری، ایشغالچی نین قبیرینه اؤزونو یاخینلاداراق آنتیک دؤنمده کوروش بشر حاقلاری نین قوروجوسو دئیه اونو اؤیمگه و مدح ائتمگه چالیشمیش[2]. انتقادچیلار یوزمیلیون دولارین بئله بیر شخصی آغیرلاماق اوچون چوخ اولدوغونو دیله گتیررکن محمدرضا مملکت باشچیلارینی یاوان چؤرک و توروپ ایله آغیرلامالییام می؟ دئیه میریلدامیش. آیت الله خمینی ده سورگوندن بو مسئله یه اؤز اعتیراضینی بیلدیره رک دئمیش: "ایران شاهلاری نین ائتدیکلری جنایتلر تاریخ کیتابلاری نین صحیفه لری نین اوز قاراسیدیر". محمدرضا دئمیش: "کوروش بیر اؤزل و خاص آدام ایمیش؛ رحیم کؤنوللو، شفقتلی، مهربان. او بیرینجی سؤز آزادلیغی نین تمل و اساسینی قویانلاردان اولموش". محمدرضا بو گؤروشو دونیا بیرلشمیش دؤلتلر تشکیلاتینا دا یئتیرمگه چالیشمیش. 1971 اینجی ایل اکیم (اکتوبر) آیی نین اون دؤردونده تخت جمشیدده بایرام شنلیگی سوررکن محمدرضاشاهین باجیسی نیویورکدا دونیا بیرلشمیش دؤلتلر تشکیلاتی نین تیکینتی سینه گئده رک[3] بو تشکیلاتین باشچیسی Sithu U Thant آ چؤپ بؤیوکلوگونده کوپی اولموش بیر قازیق خطی تقدیم ائتمیش. Sithu U Thant شاهین باجیسی نین دیلینجه بو کوپینی "آنتیک دؤنمین بشر حاقلاری" دئیه قلمه آلاراق ایران شاهینا اؤز تشکرونو بیلدیرمیش. دونیا بیرلشمیش دؤلتلر تشکیلاتی نین باشچیسی، Sithu U Thant یئنیله میش: "کوروش باریش ایسته ییرمیش. ایران شاهی باشقا مدنیتلری قوروماق اوچون اؤزوندن عاغیل و مودروکلوک گؤستریرمیش". بئله لیکله Sithu U Thant بشر حاقلاری دئیه کوروشا نسبت وئریلمیش پالچیقدان دوزلمیش کوپی دیغیرلاغی خاص بیر مراسیم ایله دونیا بیرلشمیش دؤلتلری تشکیلاتی نین آنابیناسیندا، بوگونه ده اَن اسکی و قدیم بیر باریش آنلاشماسی نین کوپی سی نین قونشولوغوندا ویترین دالیندا سرگیلتمیش. Sithu U Thant ذات عالی نین بو داورانیشی ایله ائله بیل دونیا بیرلشمیش دؤلتلر تشکیلاتی بیر گیجلتمه (سرسم) توتموش. محمدرضا شاهین ایددعالارینا باخمایاراق آلمانیانین کیل شهری اونیوئرسیته سینده کی اسکی اوریئنتالیست Josef Wiesehöfer آ گؤره قازیق(میخی) خط آدلاندیردیقلاری بویوروق و فرمان یالنیز بیر تبلیغات ملزمه سیدیر: "کوروش انسان حاقلاری مفکوره سینی اورتایا آتمیش دئمک، سارساقلاماقدان آرتیق هئچ نه دئییل و اولاماز دا". هایدئلبئرگ اونیوئرسیته سینده کی آسورولوق (آسوری شناس) Hanspeter Schaudig اَ گؤره ده آنتیک دؤنمینده هئچ کیمسه حاکیمیت باشچیلاری آراسیندا انسانلارین حقوق برابرلیگی و بؤیوکلوگو (شرفی) اوغروندا آدیم آتمامیش. "کوروشون خادیملری اونون آیاقلارینی اؤپمه لی ایمیشلر. کوروش اوتوز ایل ساواش ایله حاکیمیت ائده رک انسانلاری وئرگی وئرمگه زورلارمیش. وئرگی وئرمکدن بویون قاچیرانلارین بورون و قولاقلارینی کسدیرر و اؤلومه محکوم اولموشلاری دا قیرتلاغا دک قوما قویلاداراق باشی ائشیکده گونش قارشیسیندا قورت قوشا یئم ائتدیررمیش"[4].
دئمک، دونیا بیرلشمیش دؤلتلر تشکیلاتی آدی چکیلن کوپینی متخصصلر طرفیندن سیناقدان کئچیرمه دن و امتحان ائتدیرمه دن محمدرضا شاه طرفیندن دوشونولموش کوپینی بیر تاریخ اثری دئیه قبول ائتمه سی ایله بیر تاریخی یالانی بیر گئرچک کیمی قبول ائتمیش ساییلار.
دونیا بیرلشمیش دؤلتلر تشکیلاتی اولدوقجا بؤیوک بیر یانلیشلیغا یول وئرمیش
تاریخ اینجه صنعت خادیمی، Klaus Gallas آلمانیانین Weimer شهرینده آلمان – ایران مدنیت فئستیوالینا حاضیرلادیغی West-Östlicher Divan", Start: Sommer 2009 آدلی کیتابیندا بو مسئله نی آچیقلیغا قاویشدیرمیش. Klaus Gallas کوروشا نسبت وئریلمیش بویورقدا باش وئرمیش توتارسیزلیق و باشاریقسیزلیغی اورتایا قویموش[5]. Klaus Gallas آ گؤره ده دونیا بیرلشمیش دؤلتلر تشکیلاتی اولدوقجا بؤیوک بیر یانلیشلیغا یول وئرمیش. دونیادا تانینمیش آلمان SPIEGEL درگیسی نین دونیا بیرلشمیش دؤلتلر تشکیلاتینا بو دوغرولتودا باش وورماسینا باخمایاراق آدی چکیلن تشکیلات بو مسئله نی آچیقلیغا قاویشدیرماقدان بیله بویون قاچیرمیش. دونیا بیرلشمیش دؤلتلر تشکیلاتی نین Wien شهرینده کی UN information service مرکزی گئنه ده بو کوپی یازیتین بیر چوخلاری طرفیندن بیرینجی انسان حاقلاری دئیه قبوللوق گؤردوگونو دیله گتیرر. آلمان مدرسه درسلیکلرینده ده اسکی ایرانلیلار انسانجیل سیاستین اؤنجوللری کیمی قلمه آلینارلار[6]. بوگون اینتئرنئت دونیاسینا یانلیش چئویرمه و ترجومه یولو ایله کوروشو ایشچیلر اوچون اَن آزین وئریلمه لی مزد ((Mindestlohn و پناهنده لیک حاقلاری نین مدافعه چیسی کیمی گؤسترمگه چالیشانلارا دا تانیق اولوروق. کوروشا نسبت وئریلمیش یازیدا اوخویوروق: "یئر اوزرینده کؤله لیک یوخ اولمالیدیر. هر مملکت منیم باشچیلیغیمی قبول ائدیب، یوخسا ائتمدیگینه داییر اؤزو قرار وئرمه لیدیر"[7].
2003 اونجو ایل نوروئژین اوسلو شهرینده نوبئل اؤدولونه لاییق گؤرونموش شیرین عیبادی ده کوروش باتلاغینا اؤزونو سالاراق دئمیش: من بؤیوک کوروشون قالیغی ساییلان بیر ایرانلییام: "کوروش بیلدیریشینده دئمیش: خالق ایستمدیگی دورومدا، من خالقا حاکیمیت ائتمه یه جه گم"[8].
تاریخ اوزمانلاری شاشقین، بیر سؤیلنتی (شایعه) اؤزونو باغیمسیز و مستقیل ائده بیلر می؟
یالانین مرکزینده یئر آلان و اسکی شرقی قورخویا سالمیش بیر چکیلیم (فیقور) وار. بو چکیلیمدن بوتون دره بگلری هیندوستاندان میصره دک قورخارمیشلار. او بوگون ده بؤیوک بیر ایمپئریانین قوروجوسو اولاراق قبول ائدیلر. افسانه لره گؤره او فوق العاده بیر قدرت ساییلارمیش[9]. افسانه ایسه بیلینجلی باشلانمیش. اؤنمسیز بیر دره بگی نین اوغلو اولان کوروش ایرانین گونئی باتیسیندا دوغولموش و 559 اونجو ایل میلاددان اؤنجه تخته چیخمیش[10].
کوروش اوزره حئکایه لر
کئچمیشده قورولموش شاهلیقلارا منسوب اولان شخصلر اوزره حئکایه لر خالقلارین دیللرینده دورمادان دولاشارمیش. بعضیسینه گؤره کوروش وحشی موحیطده دوغولوب بؤیویرکن بیر قانجیق اونو امیزدیرمیش[11]. کوروشدان هر هانکی بیر کؤلگه و تصویر الده یوخدور. .... کوروش ایلک اولاراق ایلام شاهلیغینی یئنیلگه یه اوغراتمیش. 550 ایل میلاددان اؤنجه مادلارا یوروش ائتمیش. چوخ زامان کئچمه دن آنادولو تورپاقلارینا یوروش آپاراراق یونان مستعمره لرینی اله کئچیره رک Priene آدلی شهرین ساکینلرینی کؤله لیک و برده لیگه چکمیش. کوروشون دینجلمه (استراحتگاه) یئری و اوتوراغی (قرارگاه) پاسارگاد آدلی بیر یئر ایمش. اورادا کوروشا عایید بوللو حرمسرالار وار ایمیش. کوروش پاسارگاددا داها آرتیق زامان کئچیرمدن افغانستانا یوروش ائتمیش. اؤزبکیستانین نم هاراسیندا یئتمیش بیر یاشینداکی کوروشون بودونا اوخ دگه رک اوچ گوندن سونرا اؤلموش. ... کوروش زامانیندان سونراکی بعضی یونان تاریخچیلری اؤرنک اولاراق هئرودوت و Aischylos و یهودیلر کوروشدان یاخچیلیقلا آد آپارمالارینا باخمایاراق[12] یئنی تاریخچیلر بو خبرلرین بیر اوسماقلاندیرما (باش آلداتما) اولدوغونو آچیقلیغا قاویشدیرمیشلار. آلمان تاریخجی سی Wiesehöfer اَ گؤره آنتیک دؤنمینده کوروشدان پارلاق بیر تصویر یارادیلماسینا باخمایاراق کوروش دا باشقا حاکیملر دک ظولم ایله حکومت ائدن بیر حاکیم ایمیش. کوروشون قوشونلاری ایستر یاشاییش موحیطلرینی و ایسترسه ده مقدس مکانلاری یاغمالاماقدان بیله چکینمه یه رک شهر باشچیلرینی سورگون ائدرمیشلر[13].
بئله بیر ظالیمی بشر حاقلاری نین تملی نین قوروجوسو کیمی تانیتماق یالنیز محمدرضا شاها خاص اولموش بیر مفکوره ساییلارمیش. محمدرضا شاهین دا 1960 اینجی ایللرده چوخلو چتینلیگی وار ایمیش. اونون گیزلی پولیسی "ساواک" انسانلاری قییمسیزجا آغیر ایشکنجه ائتمه سینه باخمایاراق شاهلیق علیهینه هر یئرده آیاقلانما (عصیان) باش وئرمیش. مارکسیست قوروپلار شاهلیق علیهینه بومبا آتارکن ماللالار دا خالقی شاهلیق علیهینه دیرنیشه چاغیرمیشلار[14]. ....
[ماتیاس شولچ دونیا بیرلشمیش دؤلتلر تشکیلاتی نین فارس ایستعمارچیلاری نین تقلب ایشلرینه ایناناراق اونلارین الینه وئردیگی باهانه نی بیر آذربایجان آتالار سؤزو ایله باشا چاتدیرمیش، اوخویوروق][15]:
Wie heißt es doch in einem Sprichwort aus dem Orient: "Wenn ein Narr einen Stein in den Brunnen wirft, können ihn zehn Weise nicht mehr herausholen."
ترجومه: "شرقده خالق آراسیندا بیر مثل وار: بیر دلی قویویا بیر داش سالار، اون عاغیللی اونو قویودان چیخارابیلمز"[16].
[دئمک، دونیا بیرلشمیش دؤلتلر تشکیلاتی ایلک فارس ایستعمارچیلاری نین یالانلارینا ایناناراق بیر داها او یالانین آلتینا وورماق ایستمه دیگی بیلیم آداملاری نین چابالارینی اجتماعیت قارشیسیندا اتکیسیز دوروما گتیرمیش. بو دا او دلی آدامی خاطیرلادار].
اتک یازی و قایناق:
[2] Riza Şah da belənçi xulyalara qapılarmış. Fars İstemarçılarının Riza Şahın ağzına qoymağa çalışdıqları danışıqdan oxuyuruq: “Vəqti xəbərnigare Almani az mən dər bareye xərabehaye Təxtcəmçid miporsad, guyəm məra ba Kuruş muqayese mikonand”( bax: Məcəlleye Kavəh “Radio Televisiyon Milli İran Şahənşahi, München/Almanya).
[4] Matthias Schulz, Der falsche Friedensfürst, 07/15/2008: http://www.spiegel.de/spiegel/0,1518,564395,00.html
[6] Demək Alman təhsil sistimində insanlara aşılanmış yanlış bilgilər əsasında bugün bir çox Alman yayın və basın orqanları İran Məmaliki Məhrusəsindəki ethniklər əleyhinə yeridilmiş siyasəti görmək istəməzlər.
[9] Hindustanda əsliyəti Fars olan Abu al-Kalam Azad adlı birisi Qurandaki Zulqərnəyn kələməsini Kuruşa nisbət verməklə bugün Fars ictimaiyəti də Kuruşu Məhəmməd Peyğəmbərin cəddi Qureyş Fihrə bağlamağa çalışarlar, bax, Işıq Sönməz, Pan İranistlərin Dil və Mədənəiyət təhrif etmək Məsələləri: http://www.isiqsonmaz.com/Seite184.htm
[11] Kuruşun qancıq sütü əmməsini və qancıq vasitəsiylə tərbiyə oluhmasını önə sürmək Tutam (Totem) məquləsinə əsaslanmalıdır. Bugünkü Farsların da keçmişlərinin “Səkpərəst” olduqları Fars ədəbiyatında öz izini buraxmış. Daha artıq bax. Işıq Sönməz, Tutam: http://www.isiqsonmaz.com/Seite259.htm
چئویرن و ایضاح ائدن: ایشیق سؤنمز، 08.11.2011
