تک توران : آرال گؤلونون فاجعه‌سی بو گون اورمو گؤلونون باشینا گلمکده‌دیر ۱۹۶۰ ایلینده سووئت‌لر جئیهون و سئیهون چای‌لاری‌نین یؤنون دییشیب اکین یئرلرینه چکمکله، یعنی پامبیق یئتیش‌دیرمک اوچون آرال گؤلونو قوروتدولار.
بو گون ایسه اورمو گؤلو عینی دورومدا‌دیر، آنجاق یازیق‌لار کی دونیا مئدیاسی و دوغا ایله چالیشان اورقان‌لار اورمو گؤلو ایله باغلی هئچ بیر ایش گؤرمه‌ییب و سوسموش‌لار.
اورمو گؤلونون قوروماسینا اعتیراض ائدن‌لر تانرییا قارشی چیخیرلار، قارشی چیخان‌لار آغیر جزا‌لار حاق ائدیرلر. احمدی نژاد.
بوتون دونیایا ایران دؤولتی‌نین یالانچی اولدوغو و نئجه قددار بیر رئژیم اولدوغو معلوم‌دور. آنجاق ندنسه بیر چوخ اروپا مئدیاسی، ایرانلا باغلی یازیلان مقاله‌لری گؤز آردی ائدیب، اؤزلری ده بیگانه قالیرلار.
اوستگل بیر سیرا اروپا اؤلکه‌لری اؤز منافع‌لرین قوروماق اوچون بیر چوخ قونویا گؤز یوموب ایرانلا ایش بیرلیگینده‌دیرلر.
بو گون دونیانین بیر چوخ یئرینده دوغانی قوروماق اوچون هر تورلو تدبیرلر آلینیر. اؤرنیی نوروئچده و بیر چوخ باشقا اروپا اؤلکه‌لرینده حیوان توک‌لرین‌دن پالتار تیکیلمه‌سینه قارشی چیخیب اعتیراض آکسیاسی کئچیررکن، ایراندا گئری دوشونجه‌لی رئژیم اوزون‌دن اورمو گؤلونده بالیق‌لار، فلامئنکولار و اطرافیندا یاشایین جئیران جوگورلرین اؤلمه‌سینه تانیق اولوروق.
دونیانین ایکینجی ان بؤیوک دوزلو گؤلو ایران رئژیمی طرفین‌دن قورودولور و بیر چوخ مئدیا بو مسئله‌یه ائتینا ائتمیر.
اورمو گؤلو ایله باغلی گونئی آذربایجاندا میللتین مدنی اعتیراضلارین ایران رئژیمی وحشیجه‌سینه جاوابلاندیردی. اونلار اینسان شهید اولدو، یوزلر اینسان زین‌دان‌لاردا یاتیر، بیر چوخ اینسان آیلاردیر یوخا چیخیب…
اوتانماز دؤولت رسمی‌لری اورمو گؤلونون قورودولماسینا یالان بهانه‌لر اویدورورلار. هاوا‌لارین ایستیلشمه‌سی و قوراق‌لیق نتیجه‌سینده گؤلون قوروماسینی ادعا ائدیرلر. اورمیا، تبریز و آذربایجانین باشقا شهرلری ایله یاناشی باش وئرن اعتیراض آکسیا‌لارینی یاتیرماق اوچون اردبیله سیاهت ائدن گئری زکا‌لی ایران جمهورباشخانی احمدی نژاد دئییر کی، اورمو گؤلو هر ۵۰۰ ایلده بیر دفعه قورویور. آنجاق اوزمان‌لارین آراشدیرما‌لارینا گؤره بئله بیر سؤزون صحتی یوخ‌دور!
جناب راهیمی جمهورباشخانی یاردیمچی‌سی گؤلون ۶۰ فایز قوروماسی دوغانین گوناه‌دیر بیزیم یوخ دئییر. قار یاغیشین آز یاغماسین‌دان قایناقلاندیغینی ادعا ائدیر. سیز بیزه اعتیراض ائتمه یئرینه گئدیب دعا ائدین قار یاغیش چوخ یاغسین. دئییر.
آراشدیرما‌لارلا گؤره ایران رئژیمی تپه‌دن دیرناغا قدر یالان دانیشیر. ایر اورمو گؤلو هاوا‌لارین ایستیلیگین‌دن و قار یاغیشین آز یاغماسین‌دان قایناقلانسایدی، اورمو شهری‌نین ایکی آتیمیندا اولان تورکیه‌نین وان گؤلو ده قورویاردی. آنجاق سون ۱۰ ایلده وان گؤلونون سویو آزالماییب‌دیر عکسینه سویون آرتیمی اولوب‌دور.
سون اون ایل عرضینده ایران حکومتی‌نین بیلینج‌لی شکیلده یورودوگو یانلیش سیاستی اطراف موحیط ایله علاقه‌دار اورمیا گؤلونون ۶۵ یؤزده سی، محو ائتمیش‌دیر.
اورمو گؤلو ائجازکار ساحل‌لری و آدا‌لاری دونیانین نادیر قوش‌لارین و حیوان‌لارین اؤزونده باریندیریر. اورمو گؤلو بو اؤزل‌لیک‌لره گؤره یونئسکو-نون سیاهی‌سینا کئچمیش‌دیر.
اورمو گؤلونده ۵۴۶ نؤوو بیتکی ۲۷ نؤوو ممه‌لی حیوان ۲۱۲ نؤوو قوش و ۲۶ نؤو بالیق مؤووج‌دور کی اؤلوم تهلوکه‌سی ایله اوز اوزه‌دیر.
اینسان حقوق‌لاری‌نین طرفدارلاری موحیط دستکله‌ین بوتون تشکیلات‌لارا سس‌لنیریک، بو گون بیز ائکولوژی فلاکت قارشی‌سینی آلماق و اورمیا گؤلو ایکینجی آرال دنیزی‌نین سسئناری قارشی‌سینی آلماق اوچون چالیشیریق.
اورمو گؤلونون قورودولماسی نتیجه‌سینده فلامئنکولار و بوتون کؤچری قوش‌لاری داها ائرکن اورمو گؤلونو ترک ائتدی‌لر.
نئچه آی اؤنجه ایران مجلیسینده قارار آلدی‌لار کی، اورمو گؤلونه سو آخیتما یئرینه آذربایجان‌لی‌لاری ایرانین باشقا بؤلگه‌لرینه کؤچورسون‌لر. آنجاق بو ایش ایلک اؤنجه اورمیانین دوغاسینا بزک وئرن جوگور جئیرانین‌دان باشلادی. رئژیم جئیران‌لار هابئله مارال‌لاری ایرانین باشقا شهرلرینه کؤچوردور. اؤتن هفته‌لرده بیر چوخ ساری جوگور جئیرانی ایلام و خوزئستان شهرلرینه کؤچوروب‌لر.
آنجاق بو آیری سئچکی‌لیک باسقی، ظلم آذربایجان تورک‌لرینه قارشی اویغولانیر. ایرانین اصفهان شهرینده زایندروز آدیندا بیر چایین قوروماسینا قارشی اصفهان‌لی‌لارین بیر نئچه دفعه ائتدیک‌لری اعتیراض نتیجه وئردی. کیمسه‌نین بورونو بئله قانامادی.
تبریزلی محمد رضا
۲۴/۱۱/۲۰۱۱
