سون ايللرده گونئي آذربايجاندا فارس شووينيست رئژيمين آپارديغي مقصديؤنلو سيياست نتيجه سينده اورمو گؤلونون قورودولماسي اورادا طبيعي تارازليغين پوزولماسينا جيدي تاثير گؤسترمکده دير.
دونيانين ايکينجي دوزلو گؤلو کيمي یونسکو-دا طبيعي خزينه کيمي تانينان اورمو گؤلونده حاضيردا سويون 60 فايزي قورودولوب و بو قوراقليق دوزلاقلارين اورتايا چيخماسينا سبب اولوب. نتيجه ده کولکلر واسيطه سيله اطرافا ياييلان دوزلار هم اينسانلارين صحتينه جيدي منفي تاثير گؤسترير، هم ده اکين ساحه لريني يارارسيز حالا سالير. گونئي آذربايجاندا ائکولوژي تارازليغين پوزولماسينا سبب اولان بو سيياستين دوردورولماسي و گؤلده ياشانان بو بؤهرانلي وضعيتين آرادان قالديريلماسي اوچون گونئي آذربايجان ميللي حرکات فعاللاري و تشکيلاتلاري طرفيندن بير چوخ رسمي و غئيري-رسمي موراجيعتلره باخماياراق فارس شووينيست رئژيمي گؤلون قورودولماسيندا ايصرارلي گؤرونور.
ايران پارلامئنتينده اورمو گؤلو ايله باغلي تکليف لاييهه سينه وئريلن منفي ري و پروبلئمين حلل اولونماسي عوضينه پارلامئنتده بوجنورد اوزره نوماينده نين آذربايجانليلارين او بؤلگه دن کؤچورولمه سي باره ده آچيقلاماسي آذربايجان تورکلري نين کسکين اعتيراضي ايله قارشيلانيب. آذربايجانين تاريخي اراضيلري نين محو ائديلمه سي و آذربايجانليلارين اؤز تورپاقلاريندان ديدرگين سالينماسي ايستيقامتينده دؤولت سويييه سينده آپاريلان سيياسته اعتيراض ائدن بير چوخ ميللي فعال و تشکيلاتلار بياناتلار ياياراق شهرلرده موختليف اعتيراض آکسييالاري نين کئچيريلمه سي باره ده چاغيريشلار ائديبلر. بوندان باشقا، آذربايجانين فوتبول تاکيمي اولان " تراختور " اون رشت شهرينده اويونو زاماني آذربايجانليلارا قارشي سسلنديريلن تهقيراميز شوعارلارا اعتيراض اولاراق گونئي آذربايجان ميللي حرکاتي نين فعاللاري و " تراکتور " فوتبول کومانداسي نين يوز مينلرله آزارکئشي نين ايشتيراکي ايله گونئي آذربايجانين موختليف شهرلرينده آکسييالارين کئچيريلمه سي پلانلاشديريلير.
گونئي آذربايجان ميللي آزادليق جبهه سي بو چاغيريشلاري دستکليه رک ميلتيميزي بو اعتيراضلارا قوشولماغا چاغيرير، رئژيمدن آذربايجانليلارا قارشي آپاريلان بو عيرقچي و غئيري-اينساني سيياسته سون قويماسيني و اونلارين هاقلي طلبلري نين يئرينه يئتيريلمه سيني طلب ائدير. گونئي آذربايجان ميللي آزادليق جبهه سي گونئي آذربايجاندا آذربايجانليلاري نين قارشيلاشديغي بو هاقسيزليقلارين بين الخالق قوروملارين ديقتينه چاتديريلماسيني و اونلارين حوقوقلاري نين مودافيعه سيني اؤزونون ميللي و سياسي گؤروي حساب ائدير.
گونئي آذربايجان ميللي آزادليق جبهه سي
22.08.2011
