اليمده اينترنئتدن توپلاديغيم ايکي يوز سئيفئليک متين وار. متينده توپلاديغيم بوتون يازيلار ميللي حرکتي تخريب آماچلي قلمه آلينان يازيلاردير. هدفيم بو يازيلارين ايچريگيني/موهتئواسيني تحليل ائتمکدير. بوتون يازيلاري اوخودوقدان سونرا ديقتيمي بعضي مقاملار چکدي ؛ بو قيسسا قئيديمده فقط بير مقاما توخونماق ايستئييرم.
متينلري ايگيرمي سوال سوروشاراق اوخومايا باشلاديم. سواللاريمين بيريسي ` سايي اولاراق ان چوخ کيملره حمله اولونوب` سوالييدي. اوخودوغوم ايکي يوز سيفه ليک متين ايچينده ان چوخ حمله يه معروض قالان اينسانلاريميزين آدلاريني وئريرم : محمود علي چهرقانلي، احمد اوبالي، سعيد متين پور، آبباس ليساني،علیرضا فرشي، سيما ديدار، صالح ايلديريم، محمود بيلگين. بو آدلاري حمله يه معروض قالما ساييسي اساسيندا يازديم. ايکي يوز سيفه ليک متينده بير- چوخ دوستلاريميزين آدلاري وار، آنجاق اونلار علئيهينده کي يازيلارين ساييسي آزدير.
گؤرولدويو کيمي ان چوخ يازي چهرقانلي و احمد اوبالي حاقيندا يازيليب. بوردا اؤنملي اولان نوقته بودور کي، سون زامانلاردا چهرقانلي عليه ينده کي يازيلاردا آزالما وار، اوبالييا يؤنه ليک يازيلاردا آرتيش. آنجاق چهرقانلي يئنه ده فارس ميللييتچيلري نين بير نومره لي هدفلريندن. ايچريده کي دوستلار ايچينده ان چوخ تخريب يازيسي سعيد متين پور، آبباس ليساني و علیرضا فرشي حاقيندادير. سون واختلاردا آبباس ليساني عليه نده کي يازيلاردا جيدي آرتيش وار. يوخاريداکي سيرالاديغيم بعضي اينسانلاريميز آراسيندا ايختيلاف وار. اونلارين آراسيندا ايختيلاف اولسا دا دوشمنلرين گؤزونده اونلار عئيني صفده ديرلر. بوتون يازيلاري اوخودوغونوزدا گؤره جکسينيز کي، دوشمنين الينده فورصت اولسا هاميسيني يوخ ائدر. دشمنلرين اونلارا يؤنه ليک نفرت و کينه سي چوخ درين و قورخودوجور.
قایناق : آراز نیوز
