سنی کی دوستاقلارین دووارلارینین قاریش به قاریشی سنله تانیشدی ، سنی کی ایران دوستاقلارینین چوخوندا ایزین گورونور، تبریزده، اردبیلده، اهرده، یزد ده،.... سنه یازیرام، سنه کی بو تورپاغین و اینسانلارینین خوشبخت لیگی اوچون هر نییندن گئچدین، سنه کی بیر اردبیل دی بیرده سن ، بو شهرین آدی گلنده هر ندن اؤنجه سن یادیما دوشورسن، بو یولا قدم قویاندان بری بو شهرین آدینی سنین قهرمانلیق لارینلا خاطیرلاییرام،
سنه یازیرام ، سنه کی حاکمییتین گوجلو باسقی سیله بئله ، یئنه ده دایانیب و هئچ ندن قورخمادان اؤزون و عائیله ویینن بیرلیکده بو یولدا داوام ائدیب سیز ،
سنه کی اورمو گؤلؤنون قوروماق فاجیعه سینه ، باشقا دوستلاریمیزا تای دوزه بیلمه دین و اردبیل اعتیراض لارینی یولا سالدین، آمما تاسفله حاکمییت یئنه ده اؤز چیرکین اؤزون اردبیل و دوره شهرلرینده ده گوستردی و سنله بیرلیکده چوخلو فعاللاردان توتوقلاییب دوستاغا سالدی.
ایگید قارداشیم دوزدور بو زامانا قدر سنله قارشی قارشیه اوتوروب دانیشمامیشام، آمما بیرینجی آرزیم حرکتین ثمر وئرمه سی و ایکینجی سی سنله یاخیننان گوروشوب و سنی باغریما باسماغیم دیر.
عزیز فیکیرداش، بیلدیگیمه گوره نئچه گونلردی کی قورو اعتیصابا داخیل اولموسان، اوزاقدان سنی آلقیشلاییرام کی دوستاقلاردادا اؤز اعتیراضیندان ال گؤتورمورسن . آمما بونو بیل کی سنین ساغلیغین بیزلری آرتیق سئویندیرر، فیکیر داشلاریمیز هامیسی سنین سلامت لیغیوا نیگران دیلار گل بونلارا خاطیر اعتیصابینی سیندیر .
ایگید قارداش نیگران گوزلرینن ، و اوموددان دولو اولان اوره گینن ، سنین و باشقا دوستاقلاردا اولان قارداشلاریمیزین یولونو گوزله ییریک...
