بو نئچه ایلده آزی بئش ده یرلی اینسانیمیزی یول حادیثه لرینده ایتیرمیشیک. 1. سهند افشاری 2. موهندیس غلامرضا امانی
3. عادیل ارشادی فر
و ایندی:
4. ابراهیم جعفرزاده 5. مینا کهربایی و مینا خانیمین قوجاغیندا اولان بئشیک اوشاغی آیلا جعفرزاده.
سورغو بودور: بونلار نییه اؤلورلر؟
میللی حرکتین سایا گلن و سینیرلی اولدوزلاری ایچیندن آخیب سؤنن بو اولدوزلارین آلین یازیلاری نییه بئله اولور؟
یانی یئترینجه دیققت ائدیلسه بو آدلارینی چکدی‌ییمیز اینسانلارین بویوندا اولان کیمسه‌لریمیزین سایی یوز نفر بیله اولماز. بیز قورغو یانیلساماسی (توهم توطئه) ایله باخیب بونو تئرور آدلاندیرماییریق. اما دونیادا بیر آز دا حیساب کیتاب واردیر دئمک. یوز نفرین ایچیندن بو قدر آدام یول قضالاریندا جانلارینی غیب ائدیرلرسه بیزیم توپلومدا گئرچکدن نه خبردیر؟
1. آذربایجان یوللاری استاندارد دئییل
2. آرابالار استاندارد بیچیمده اوره‌تیلمه‌ییب (تولید اولماییب) و بیر کیچیک حادیثه ایله موسافیرلرین حیاتینی تهلوکه‌یه سالیرلار.
3. اینسانلاریمیز آرابا یؤنلتمه‌یه دوزگون ائییتیم گؤرمه‌ییب و سوروجولوک دیسیپلینی‌نه صاحیب دئییل‌لر.
بونلارین هامیسینی دا تک تکینی ده گؤز اؤنونه آلساق هر حالدا دؤولت سوروملو ساییلیر و اینسانلارین حیاتینا یئترینجه ده‌یر وئرمه‌ییر و بیزیم حرکتین فلسفه‌سی ائله بورادان باشلانمیش.
