ابراهیمین آتاسی نین آدی (آذر) ایدی کی بو آد اورتا آسیا دا ، مین ایللردیر قوللانیلیر. بؤیوک احتماللا ابراهیم اؤزو ده اورتا آسیا دان دیر.
ابراهیمین اوچونجو ائشی (قانتورا) دیر کی آدی قرآن دا کئچمه سه ده تورات دا گلیب دیر ، کی اونون اوشاقلاری بؤیوک نهیرلر آرخاسیندا دوزه نگاهلیق لارلا احاطه اولونموش بیر اؤلکه یه گئدیب لر..." باخ:اؤزتجه بو کیتابا:
Bozkırın sırrı-Türk Peygamber,Ahmet turgut,Profil yayıncılık,6.Baskı/Mart 2010,istanbul,s.223-224.
اوچ گوندور ، ائوده کیلرین آغیر باخیشلاری آلتیندا ، خیاللاریمداکی وامپیرلر کیمی ، آغ-آبباق ، بوم-بوز ، بوش-بوش دولانیرام.
دئدیم اللریمده کی سویوق لوق ، هاوالاردان. اوزومده کی یاشلار ، یاغیش لاردان. من ساده جه اوشویوره م.
دوغروسو هئچ ایناندیریجی دئییله م.
"اؤفکه ایله حوزون" ، حیدر بیات بئله آنلاتیر حیسلرینی ، من نه آد قویوم اوره ییمده کی یانقینا ، ابراهیم لر اسطوره سینه ، قانتورا مینالارینین تاریخده کی ایتگین خزینه لرینه ، و آیلار...
آیلاردیر بیزیم کئچمیشه باغلی گله جه ییمیز. نمرودلارین قورخدوغو کؤرپه لردیر آیلار...
صد هزاران طفل بی تلویم را
کشته تا یابد وی ابراهیم را (مثنوی – دفتر 6 – 4850)
آیلاردیر ابراهیمین گونلرجه تامارزی قالدیغی قیزی ، هئچ بیر زامان تمام لانمایان بیر ماهنی ، دویمایان دویغولار ، سؤنمه ین آیلار. قانتورانین میناسیندا بوت لار سیندیران ابراهیم ، و خلقینی اویونجاق لاردان قورتاران و دوشونمه یه مجبور ائدن آیلار ، زامانلاردا آسیلی قالمایان ظفر دوشونجه لری ، گؤزه ل گونلردیر آیلار.
آیلاردیر تاریخده آختاردیغیم ایزلر ، ائله بوردا ، ابراهیم و تورک ائشی ، قانتورا ، و تورک یوردوندا داغیلان اوشاق لاری ، ائله بوردا ، اورمو بؤلگه سینده ، خوی یوللاریندا ، آیلار.
دونن گئجه ، تبریزین سویوق خیاوان لاریندا ساعتلرجه یاغیش آلتیندا دایاندیم ، ابراهیم و مینانی آیلاردا گؤردوم...
آیلاردیر اودلار ایچینده یانمایان ابراهیم ، گیزلی خزینه لرین میناسی ، الوولار خوی یوللاریندان تبریزه قدر گلدی ، سن یینه قارا بولودلار آرخاسیندا گیزلندین آیلار...
ساعتلرجه یاغیش آلتیندا دایاندیم ، ابراهیم و مینانی آیلاردا گؤردوم...
گونای تبریزی
7/7/90
