نووروز گونو سون ايلله‌ره‌ده‌ك توركييه‌ده ياشاماقدا اولان و ديني-مذهه‌بي كيملييي باشات اولان كورد كيتله‌له‌ر اوچون، هر هانسي ميللي بير آنلام داشيمازدي. آنجاق كورد دوشونور و اؤنده‌رله‌ري، سيرادان بير گون اولان نووروز (نئوروز) گونو و نورمال اولان نووروز قوتلامالاريني ميللي كيمليك مساله‌سينه دؤنوشدوره‌بيلديله‌ر. اونلار نووروز قوتلامالاريني ايلك اؤنجه كورد خالقيني ميللي آچيدان بيلينجله‌نديرمه و بيرله‌شديرمه و سونرا دا بؤيوك هزينه‌له‌ر وئره‌ره‌ك هر ايل كورد خالقيني آياقلانديريپ توركييه دئوله‌تي ايله قارشي قارشييا گتيرمه‌ك اوچون باشاريلي بير شكيلده قوللانابيلديله‌ر. بو ائيله‌مله‌رين سونوجوندا توركييه دئوله‌تي كورد سورونونو رسمه‌ن تانيمايا قوشوت اولاراق، نووروزو دا توركييه‌نين ميللي بايرامي ائعلان ائتمه‌يه مجبور اولدو.
بيز ايسه ايراندا هله ده اؤز نئوروز گونوموزو آختاريريق. منجه بيزده كوردله‌رين نئوروز گونونون قارشيليغي، فارس ديللي اوخوللارين آچيليش گونو اولابيله‌ر (مئهرين بيري).
فارس ديللي اوخوللارين آچيليش گونو، ايران دئوله‌تينه هزينه‌لي اولماليدير
باي بك قالاسي توپلانتيلاري، مشروطه گونو آنمالاري و ....نين ايران و گونئي آزه‌ربايجاندا ياشايان تورك خالقينين ميلله‌تله‌شمه ايله ميللي حاقلاري حاققيندا بيلينجله‌نمه‌سي، تورك خالقيني ايران دئوله‌تينده‌ن قوپارتما و ايران دئوله‌تينين آنتي دئموكراتيك سيياسه‌تله‌ريني تورك خالقي و اولوسلارآراسي قامو اويونا ايفشا ائتمه آلانلاريندا، بوندان سونرا بيزه وئره‌بيله‌جه‌يي چوخ بير شئي قالماميشدير. آنجاق فارس ديللي اوخوللارين آچيليش گونو، بو آچيلاردان بيزيم اوچون فورصه‌تله‌رله دولو اولان بير گوندور. مئهر آيينين بيرينده ياپيلان ائيله‌م و ائعتيراضلار، هم اوخوللارين آچيليش گونونده دئموكراتيك بير حاققين ايسته‌ييدير و هم بوتون شهه‌رله‌رده حتتا ان اوزاق كندله‌رده بيله ياپابيله‌جه‌يي اوچون، بوتون تورك خالقيني ايچينه چكه‌بيله‌جه‌ك باها بيچيلمه‌ز بير فورصه‌تدير. بو اولايين هر ايل تكرارلانابيلمه‌سي ايسه اونون قاليجي و سوره‌كلي اولماسيني تضمين ائده‌ر. بو ائيله‌مله‌رين، توپلومون ان گنج و ان ديناميك اولان كسيمي يعني اؤيره‌نجيله‌رله‌ري ايلگيله‌نديرمه‌سي، باشقا اوستونلوكله‌رينده‌ندير.
بيزيم آماجلاردان بيري ده ايران دئوله‌تينه فارس ديللي اوخوللارين آچيليش گونونون هزينه‌لي و باهالييا مال اولاجاغيني گؤسته‌رمه‌ك اولماليدير. بوندان سونرا دئوله‌تين هزينه وئرمه‌يه‌جه‌يي هئچ بير اوخوللارين آچيليش گونو اولماماليدير. بيز تكجه بو ايل دئييل، هر ايل اوخوللارين آچيليش گونونو، هر ايل تكرارلانان توپلومسال حره‌كه‌ت و ايراندا حاكيم اولان فارس سؤمورگه‌چي و آپارتايد سيستئمينه ائعتيراض، حتتا تورك خالقينين باشقالديري و عوصيان گونله‌رينه چئويرمه‌ليييك. ائله اولماليدير كي فارس ديللي اوخوللارين آچيليش گونو، فارس ايران دئوله‌تينين قورخولو رؤياسينا چئوريليپ، بو گون ياخينلاشاندا، دئوله‌ت و بوتون ايران بير شئيله‌ر اولاجاق دييه آلارما گئچسين. بيز بئله بير دورومو يارادابيله‌رسه‌ك، اوندان قيسا بير سوره سونرا تورك ديللي اوخوللارينين آچيليشينا دا تانيق اولابيله‌ريك.
طبيعيدير كي ايلك باشدا فارس ديللي اوخوللارين آچيليش گونونده گرچه‌كله‌شديريله‌ن اولايلار، اوخول و اونيوئرسيته اؤيره‌نجيله‌رينه محدود اولوپ، آشاغيدا اؤرنه‌كله‌ري وئريله‌ن ائيله‌مله‌ر و سوسيال ائتگينليكله‌رله باشلاياجاقدير. آنجاق ايران دئوله‌تينين بو حره‌كه‌تي كسينليكله باسديراجاغي و سركوب ائده‌جه‌يي گؤز اؤنونه آلينديقدا، بيز اؤزوموزو فارس ديللي اوخوللارين گرگين (آياقلانمالي، چاتيشمالي، ...) آچيليش گونله‌رينه حاضيرلاماليييق. سونوجدا تورك خالقي ائعتيراض سسيني، ايران ايچي و ديشيندا يوكسه‌لتمه‌ديكجه، و اؤز ئعتيراضلاريني كيتله‌سه‌ل.له‌شديريپ داواملي ائتمه‌ديكجه، هئچ بير حاققيني و ان باشدا تورك ديلينين رسمي اولماسي ايسته‌ييني الده ائده‌بيلمه‌زدير. كيتله‌سه‌ل.له‌شه‌ن و داواملي اولان بئله ائعتيراضلارين سونوجوندادير كي بوگون پاكيستان، افغانيستان و عراقدا ايكي ديل سراسه‌ري رسمي ديل و اونلارجا ديل ده منطه‌قه‌اي (بؤلگه‌سه‌ل) رسمي ديل ائعلان ائديلميشدير.
فارس ديللي اوخوللارين آچيليش گونونده ياپيلابيله‌جه‌ك ائيله‌مله‌ر
مئهرين بيرينده ياپيلابيله‌جه‌ك ائيله‌مله‌ر حاققيندا داها چوخ يازمالي و دوشونمه‌ليييك. بو ائيله‌مله‌ر تكجه آزه‌ربايجان دئييل، ايران`ين باشا باشيندا ياشايان تورك خالقيميزي، حتتا ايراندا ياشايان باشقا ميلله‌تله‌ري حره‌كه‌ته گئچيره‌بيله‌ن، بزيم خالقا هزينه‌سي آز اولان، بوا قارشين اؤلكه ايچي و ديشي مئدييادا گنيش يانسيييپ بؤيوك سس گتيره‌ن ائيله‌مله‌ر اولماليدير. من آشاغيدا نئچه اؤرنه‌ك ائيله‌مه ده‌يينيره‌م:
١- اؤيره‌نجيله‌رين فارس ديللي اوخوللارين آچيليش گونونده قارا گييينمه‌له‌ري.
٢-فارس ديللي اوخوللارين آچيليش گونونده اوخوللارين گيريش قاپيلاري و ايچله‌رينه توركجه، فارسجا و اينگيليزجه پيلاكارتلار آسماق و دووارلاريندا شوعارلار يازماق. اؤرنه‌يين بو شوعارلار:
"دئوله‌تده‌ن آنا ديليمي گئري ايسته‌ييره‌م".
"دولت ايران، زبان مادريم را پس بده"
" تورك ديلينده اوخول، ايندي"
"تورك ديلي رسمي اولماليدير"
"توركجه ائييتيم ياساغي قالديريلماليدير"
..............
٣-فارس ديللي اوخوللارين آچيليش گونونده اؤيره‌نچيله‌رين مدره‌سه‌نين حه‌يه‌طينده توپلاناراق تورك ديلينين رسمي و ائييتيم ديلي اولماسي گره‌كدييي و فارس ديلينين تحميل ائديلمه‌سيني محكوم ائده‌ن بيلديريله‌ر اوخومالاري و داها سونرا دا مودورله‌رينين اوتاغينا قارا چله‌نگ بيراخمالاري.
٤-فارس ديللي اخوللارين ايلك آچيليش گونونده بايكوت ائديلمه‌له‌ري، اؤيره‌نجيله‌رين بير گونلوك اوخوللارا گئتمه‌مه‌له‌ري.
٥-فارس ديللي اوخوللارين آچيليش گونونده، اؤيره‌نجيله‌رين اوخولا گئتديكله‌ري تقديرده كسينليكله فارس ديليني ايشله‌تمه‌مه‌له‌ري، فارسجا دانيشمامالاري و فارسجا دانيشان اؤيره‌تمه‌نله‌ري يوهالامالاري.
٦-فارس ديللي اوخوللارين آچيليش گونونده بوتون تورك شهه‌رله‌رده، آيدين و فععال، يازار و قوشارلارين، ائن. جي. او. لارين اوستان مركه‌زله‌رينده آموزش و پرورش ايداره‌له‌رينين قاباغينا قاراچله‌نگ بيراخمالاري، توركجه‌نين رسمي ائديلمه‌سي گره‌كدييي و توركجه‌يه قويولان ائييتيم ياساغينين قالديريلماسيني ايسته‌يه‌ن آچيق مكتوبلارين ايداره رئيسي دفته‌رينه وئريلمه‌سي. اؤزه‌لليكله بو ائيله‌مين تئهراندا و آموزش و پرورش باخانليغي قارشيسيندا ياپيلماسي و ائعتيراض مكتوبونون دا ائيييتيم باخانينا وئريلمه‌سي، هابئله مجليسده‌كي تورك ميلله‌ت وكيلله‌رينه گؤنده‌ريلمه‌سي، مئدييادا اولدوقجا اؤنه‌ملي سس گتيره‌بيله‌ر.
٧-فارس ديللي اوخوللارين آچيليش گونونده اوخوللارين اؤنونده توركجه كيتاب داغيتيم و ساتيشي ياپماق و اؤيره‌نجيله‌رين فارسجا كيتابلاري اوخوللارين اؤنونه بيراخماسي و ييغماسي.
٨-فارسجا اوخوللارين آچيليشينا ائعتيراض اولاراق بير گون آجليق اوروجو توتماق.
٩-فارس ديللي اوخوللارين آچيليش گونونده اؤلكه ايچينده اوخوللارين اؤنونده يا دا شهه‌رله‌رين بللي خييابانلاريندا گنيش چاپلي گؤسته‌ري و يورويوشله‌رين دوزه‌نله‌نمه‌سي.
١٠- گئچه‌ن ايلله‌رده "قابلاما-قاشيقلي پيروتئستله‌ر" آدي آلتيندا داملاردا گئجه ساعات دوققوزدا اون دقيقه‌ليك قابلاما و بوشقابلارا قاشيقلا ووراراق سس چيخارما ائيله‌مي" اؤنه‌ريلميشدي. آنجاق تورك و آزه‌ربايجانلي آيدين و چابامانلارين (ويزيونسوزلوغو نده‌ني ايله ؟)، بو اؤنه‌ري منيمسه‌نمه‌دي. (بو اؤنه‌ريني فارسلار ياشيل حره‌كه‌تين ائعتيراض يؤنته‌مله‌رينده‌ن بيري اولاراق، و قابلاما-قاشييق يئرينه آللاه-و اكبه‌ر قوياراق منيمسه‌ييپ باشاريلي بير بيچيمده اويقولاديلار).
١١-فارس ديللي اوخوللارين آچيليش گونونده يورت ديشيندا ايران بؤيوك ائلچيليكله‌ري و كونسوللوقلاري قارشيسيندا ائيله‌مله‌ر ياپيلماسي و قارا چله‌نگ قويما ائيله‌مله‌ري. بو ائيله‌مه بوتون سيياسي قوروپلاريميزين قاتيلماسي شرطدير.
١٢-اولوسلارآراسي ايلگيلي قوروملارا (يونئسكو، اينسان حاقلاري درنه‌كله‌ري، ...) ايران و گونئي آزه‌ربايجاندا توركجه ائييتيم ياساغينين قالديريلماسي و گونئي آزه‌ربايجاندا فارس ديللي اوخوللارين وارليغينا ائعتيراض ائده‌ن آچيق مكتوبلارين گؤنده‌ريلمه‌سي.
ايراندا موسته‌قيل تورك اؤيره‌نجي حره‌كه‌تي ياراديلماليدير
ايران-گونئي آزه‌ربايجاندا فارس-سراسه‌ري اؤيره‌نجي حره‌كه‌ت و تشكيلاتلاريندان بوتونويله باغيمسيز اولان تورك-آزه‌ربايجان اؤيره‌نجي حره‌كه‌ت و تشكيلاتي وار اولماليدير. بو بير تاريخي گره‌كليليك و گره‌كسينيمدير. فارس ديللي اوخوللارين آچيليش گونونده ياپيلاجاق ائيله‌مله‌ر، تورك اؤيره‌نجي حره‌كه‌تي ياراتمانين بير آياغي اولسا دا، اونون اؤته‌كي آياغي و اصل ايش، تورك شهه‌رله‌ري و اؤزه‌لليكله بؤيوك شهه‌رله‌رين اونيوئرسيته‌له‌رينده مده‌ني، اده‌بي، ... درنه‌ك و چكيرده‌كله‌رين اولوشدورماسينا اوداقلانماقدير. بو درنه‌كله‌شمه ايشي، اوستان و شهريستان تمه‌لينده اولماليدير. يعني قيسسا وعده‌ده بوتون اوستان مركه‌زله‌ري، اورتا وعده‌ده ايسه بوتون شهريستانلاردا تورك اؤيره‌نجي تشكيلاتلاري وار اولماليدير.
آنجاق يوخاريدا سؤيله‌نه‌ن اؤيره‌نجي تشكيلاتلانماسي و اؤيره‌نجي حره‌كه‌تي شبه‌كه‌سيني قورماق، ميللي حره‌كه‌تيميزين توپلوم تمه‌لينده تشكيلاتلانماسي و خالق آراسيندا ياييلماسينا پارالئل اولماليدير. چونكو قبول ائديلير بير دوزئيده اولان توپلومسال و اؤيره‌نجي حره‌كه‌تله‌رينين وارليغي دوروموندا، بونلار بيربيريني گوجله‌نديره‌ره‌ك ياشادار. آيريجا گونئي آزه‌ربايجاندا، تورك توپلومو آراسيندا تمه‌ل.له‌ري ساغلام و كؤكلو بير ميللي حره‌كه‌ت تثبيت اولموشسا، گونئيده هر هانسي بير سراسه‌ري-فارس و مركه‌زچي اؤيره‌نجي حره‌كه‌تي و بونلارين ياپديقلاري بوتون ائيله‌مله‌ر بيله، بيزيم ميللي حره‌كه‌تين حئسابينا يازيلاجاقدير. ترسينه، گونئيده گوجلو و ساغلام بير توپلومسال حره‌كه‌ت وار اولمازسا، بيزيم ياراتديغيميز اؤيره‌نجي ائيله‌مله‌ري بيله، مركه‌زچي قوروپلار طره‌فينده‌ن اوغولانيپ سراسه‌ري-فارس حره‌كه‌تله‌رين حئسابينا يازيلاجاقدير و تورك خالقي ايله تورك آزه‌ربايجان ميللي دئموكراتيك حره‌كه‌تينه بير شئي قازانديرماياجاقدير. باشقا بير سؤزله، باغيميسز تورك آزه‌ربايجان ميللي حره‌كه‌تي يارانيپ و كؤكو ساغلاملاشماديقجا، داغينيق شكيلده ايسته‌ر توپلومدا، ايسته‌ر اؤيره‌نجي حره‌كه‌تي تمه‌لينده، نه ائده‌رسه‌ك هاميسي بوشا گئده‌جه‌ك يا دا مركه‌زچي گوجله‌ر طره‌فينده‌ن موصاديره ائديله‌جه‌كدير.
باشقا اؤنه‌ملي بير قونو، خالق و اؤيره‌نجيله‌رين داها چوخ دسته‌ييني قازانماق اوچون، ميللي حره‌كه‌ت و اونا باغلي درنه‌ك، آكتيويست، ...له‌ر، ديل و ميللي-ائتنيك ايسته‌كله‌ر ديشيندا قالان، اؤلكه چاپيندا گنه‌ل دئموكراتيك ايسته‌كله‌ري (ائعداما قارشي، قادين و ايشچي حاقلاري، ائكونوميك سورنولار، چئوره سورونلاري، ...) داها چوخ و داها آچيق ديلله‌نديرمه‌له‌ري گره‌كديييدير. آنجاق گينه ده بورادا اونوتولماماسي گره‌كه‌ن قونو، بيزيم بو دئموكراتيك ايسته‌كله‌ري بيله، گنه‌ل و ميللي كيملييي اولمايان ايرانليلار اولاراق دئييل، تورك خالقي و آزربايجان ميللي حره‌كه‌تينين ايسته‌كله‌ري اولاراق سونمالي و ايسته‌مه‌ميزدير. بونون بير آدديم اؤته‌سي ايسه، فارس-سراسه‌ري دئموكراتيك ايسته‌كله‌ره وئره‌بيله‌جه‌ييميز دسته‌كله‌ردير. طبيعي اولاراق بورادا دسته‌كده‌ن آماج، فارسلارين ائيله‌مله‌رينه قاتيلماق دئييلدير، اونلارين بيزيم ميللي كيمليييميز و ميللي حاقلاريميزي تانيمالاري قارشيليغيندا، دئموكراسي موجاديله‌له‌ريني سؤزه‌ل دوزئييده اونايلاماقدير.
تورك اؤيره‌نجي حره‌كه‌تيني تمثيل ائده‌ن رنگله‌ره گلينجه، بونون اوچون بير سيرا شخصله‌ر گؤي رنگيني (ياشيل رنگينه قارشي) و قيرميزي رنگيني (تيراختور آياقتوپو تاخيمينين رنگي)، ... اؤنه‌رميشله‌ردير. بو اؤنه‌ريله‌ر ده‌يه‌رله‌نديريله‌بيله‌ر، آنجاق منجه گينه ده بيزيم كورد حره‌كه‌تينده‌ن آلاجاغيميز درسله‌ر واردير. بوتون كوردله‌ر، ايسته‌ر توركييه‌ده، ايسته‌ر سورييه‌ده، ايسته‌ر عراقدا بوگون ايران بايراغي رنگله‌ري اولان قيرميزي، آغ و ياشيل رنگله‌ريني كورد سمبولو اولاراق ايشله‌ديرله‌ر. بونون كؤكو ايسه ماهاباد دئوله‌تينه قاييدير. اونلار بارزاني عشيره‌تي اولسون يا دا پ ك ك ماركسيستله‌ري بو رنگله‌رين ميللي كورد كيمليييني تمثيل ائده‌بيله‌جه‌ييني فرق ائتميش و اوندان سورعه‌تله و ان گنيش شكيلده يارارلانمايا باشلاميشلاردير. ايلك دؤنه‌مله‌رده توركييه تدبيرسيزليك ياپاراق بو اوچ رنگين ايشله‌ديلمه‌سيني ياساقلاميشدير. آنجاق كوردله‌ر بو ياساقدان دا كورد خالقي و توركييه دئوله‌تيني قارشي قارشييا گتيرمه‌ك اوچون باشاريلي بير شكيلده يارارلانميشلاردير. اونلار بو اوچ رنگي هر فورصه‌تده ايلليك نئوروز تؤره‌نله‌رينده، لئيلا زانا`نين ميللي مجليسده ساچلارينا تاخماسيناده‌ك ايشله‌تمه‌يه باشلاميشلاردير. سونوندا توركيه دئوله‌تي گينه تسليم اولوپ بو رنگله‌رين هم ياساقليغيني قالديرميش و هم ده بونلارين كورد خالقينين سمبولو اولدوغونو قبول ائتميشدير.
منجه ايران-گونئي آزه‌ربايجاندا ياشايان تورك خالقينين بوتون ائيله‌مله‌رينده، بونا گونئي آزه‌ربايجان اؤيره‌نجي حره‌كه‌تينين ائيله‌مله‌ري، فوتبال ياريشلاري، باشقا گؤسته‌ري و يورويوشله‌ر ده داخيلدير، اوچ قيرميزي، گؤي و ياشيل رنگ تورك خالقينين سمبولو اولاراق ايشله‌ديلمه‌لي و تثبيت ائديلمه‌ليدير. بو اوچ رنگين وار اولدوغو هر هانسي بير ائيله‌مين اوتوماتيكمان تورك و گونئي آزه‌ربايجانا عاييد و ميللي ايچه‌ريكلي اولدوغو آچيقجا به‌يان ائديلميش اولار و بو حره‌كه‌تله‌رين سراسه‌ريچي-مركه‌زچيله‌ر طره‌فينده‌ن اوغورلانما ائحتيمالي دا اورتادان قالخار.
يوخاريدا دئمه‌ك ايسته‌ديكله‌ريم آراسيندا:
فارس اوخوللارينين آچيليش گونو، بيزيم هر ايل تكرارلانان اساس گؤسته‌ري و ائعتيراض تؤره‌نيميزه و خالق كوتله‌له‌ريني دئوله‌ته قارشي خييابانلارا تؤكه‌جه‌ييميز و اونو هزينه وئرمه‌يه مجبور ائده‌جه‌ييميز اولايا چئوريلمه‌ليدير.
بوتون اونيوئرسيته‌له‌رده اوستان و داها سونرا شهريستان تمه‌لينده اؤيره‌نجي تشكيلاتلانمايا گئديلمه‌ليدير.
موسته‌قيل آزه‌ربايجان و تورك درنه‌ك و قوروملاري دئموكراتيك ايسته‌ك و شوعارلاري داها آچيق ديله گتيرمه‌ليديرله‌ر.
تورك خالقي و گونئي آزه‌ربايجانين ميللي رنگله‌ري ياشيل، قيرميزي، گؤي رنگله‌ريدير. بو رنگله‌رين تورك اؤيره‌نجي حره‌كه‌تينين رنگله‌ري اولماسيندا دا يارار وارد
