سونرالار دوستاقدان چیخدیقدان سونرا، بیزلر دوستاقدا اولارکن ، موسی برزینین هر زامان عاییله لریمیزین یانیندا اولوب ، الیندن گلنی اسیرگه مه مه سینی دویدوم. آرتیق موسی برزین تبریز دوستاغیندا اولان بوتون میللتچی لرین وکیلی ساییلیردی ، ایستر وکالتنامه ایمضالامیش اولسونلار یا اولماسینلار. موسی برزین هر بیر
توتوقلانان میللتچینی اؤزونون مووکیلی بیلیب، اونون عاییله سینه حقوقی یاردیملاریلا توختاخلیق وئرمه یه چالیشیردی. بئله لیکله میللی بورجونو میللی حرکته اؤده ییردی، ایندی ایسه باشقا جوره و داها آغیر هزینه لرله بو بورجو اؤده مکده دیر.
محکمه میزدن آیلار کئچیر اما هله ده موسی برزینین محکمه ده ، قاضی اؤنونده جسارت و احساس لا دانیشیب، میللتچیلییی و میللی حرکتی ساوونماسی گؤزومون اؤنونده ، سسی قولاغیمدادیر.
موسی برزینه اؤنملی اولان تک مساله آذربایجان، آذربایجان میللتی، میللتچیلیک و آذربایجان میللی حرکتی اوغروندا موباریزه آپاریب توتوقلانان میللتچیلرین مودافیعه چیلیگی اولوبدور؛ توتوقلانانلارین هر هانسی سلیقه، حزب، گروه و تشکیلاتا باغلی اولدوقلارینا باخمایاراق. بو ایسه میللتچیلیگین ان یوکسک زیروه سی دیر.
عشق اولسون وطنیمین موسی برزینلرینه
پینار فرج زاده
