تك توران : بوراسی دوستاق..
بوراسی زیندان
یئنی بیر دونیا
یئنی بیر باشلیق
یئنی بیر یاشام..
سانکی دورموش
زامان
سانکی دونموش
آرزولار
سانکی بیتمیش هر
بیر شئی
بوراسی دوستاق
بوراسی زیندان
بوراسی کدر ،
بوراسی قدر..
بوراسی هر شئی..بوراسی
هئچ شئی
بوراسی ساواشین
دینجلیش یئری
یئنی بیر نفس آلیشیم
یئری.
دوستلارا سئوگی،
دوشمانلارا غم
یادلارا ایلگی
سالیشیم یئری..
بوراسی دوستاق..
بوراسی زیندان..
چوخ کیچیک دونیا..
چوخ بویوک رویا
گئنیشدیر اورک،
آرزودور گولمک..
معنالی باخیشلار
سورقویا چکیر!!
گورسن نئیلیبدیر؟!
بو دونیایا(دوستاق
دونیاسی) ندن گلیبدیر؟!
کیمی اولدوروب ؟
کیمی سویوبدور؟!
هانگی حاققی آلیب؟
باطیل ائدیبدیر؟؟
باخیشلار سورور،
همده دورمادان
نئیلیم کی من
او باخیشلارا
باخیشیم یوخدور!
باخیشیم اولسادا
باخیشلارینا
جاوابیم یوخدور..
یانلیز بیر سورو
دوشور بئینیمه
ائلیمین سئچیلمیشلری
ایچینده..گورسن منیم اوزلیم ندیر؟؟!!
منی سئچمه لرینین
سببی ندیر؟؟
یادیما گلن
اوغرو دییلم
کیمسنین حاقیندا
آلان دییلم
وطنداشلیغیدا
پوزقونلامادیم
تکجه ایستکیم
آنا دیلیمدیر
تکجه
آرزومدا..خالقیمین اونونده قوربان اولماقدیر
بونلارین سوچون
بیله بیلمیرم
ائله بونا گوره
ده !
بو اولکنی(مملکتی)
سئوه بیلمیرم
قارداشیمی ازن
ائلی
قانداشیمی
سووون(سوووش وئرن) دیلی
یاراما گونده
دوز باسان دئوی
اورکدن ائلیم دییه
بیلمیرم..دییه بیلمیرم
یادلارا قارداش، قارداشا اوزگه، دییه بیلمیرم ..
آخی نئیلییم او
سئچیلمیشلره
بو سوزلری بیر
باخیشلا دییه بیلمیرم..دییه بیلمیرم
اینجه گولوشله
گئچیرم یاندان
ایچیمده الوو دیلیمده
زیندان
بئینیمده فیرتانا
اورگیم داریخقان
اینجه گولوشله
گئچیرم یاندان
آنلایرامکی
بوراسی دوستاق..بوراسی زیندان
گونلوم ایسته ییر
بیر هارای چکیم
ایچیمده کی
الوو وولقانا چئوریم
هم اوزوم یانیم..همده
یاندیریم
حاقسیزلیغی
قایداسیزلیغی
اینامی اولمایان
ویژدانسیزلیغی
هارایلار چکیب ییخام
هر نیی
دووارلاری..
قفسلریی..
قولوما وورولان
کلفچه لریی..
بیر هارای چکم،
دوز کوراغلو تک
نعره لی هارایلا
گونولدن دییم...
بوراسی دوستاق..یوخ..
بوراسی یاشام..
بوراسی آزادلیق یولونا
..دوام.
دوستاقدا وطن سئوگیسی سوچویلا حبس اولونموش ایگیتلره
سونولور
بیزیم یول(دوستاق یازیسی91/1/27)
