تك توران : گوزلریم بو سوزو گورمه یه و قولاغیم بو سوزو ائشیدمه یه داها اورگه نه جکلی اولوب. هر یئرده و هر بیر یازینین سونوندا بئله یازیلیر کی " گله جک بیزیمدیر" آما کیمسه سوز آچماییر کی نئجه؟ هاچان؟ ائله بوش بوش دانیشماقلا مگر اولار کی گله جک بیزیم اولسون. نه یاخجی کی بیر آتا بابا سوزوموز واردیر کی دئییر: حالوا حالوا دئمه گینن آغیز شیرینه چالماز. اوزومو توتورام او اینسانلارا کی یالنیز باشاریرلار بوش سوز دانیشماقلا و باشدا اوتوروب و داش دیغیرراتماق باشاریرلار و هر نه ده اولورسا تئز منیمسه ییب و اوز آدلارینا آپارماق ایسته ییرلر. اوزومو خاریجده اوتوران سویداشلاریما توتورام کی ایچریده اوز وئره ن حادیثه لریده حتی قییمیرلار گونده مه گتیریب و بیر آچیق فضادا و او یئرده کی هئچ باسقی آلتیندا دئییرلر یایینلاییب و ایش ایش گورسونلر. هر گون بوردا یانی گونئی ده بیر سورون قاباغا گلیر، هر گون توتوقلانان اولور، هر گون بوردا باسقیلار چوخالیر، اکونومیک مسئله سی داها آرتیق میللتیمیزی آیاقدان سالیر، آما یئنه ده اونلارا باخمایاراق بوردا هر گون بیر اوزه ل ایش یارانیر، هر گون حاکمیت قارشیسندا ایشلر گورونور و ها بئله هر گون اویانیش میللتیمیزده داها آرتیق چوخالیر ولی بونلار آنجاق و آنجاق آزربایجانین میللی حرکتینی گونده مده ساخلاماق اوچون یئترلیدیر و بونو دئمک اولور کی یالنیز آددیم آتیلیر تا دالی قالمایاق یوخسا قاباغا دوشمک دئییل. بوردا کورد تبریزه گوز تیکیر ولی بیز اورمودان گوز اورتوروک، بوردا امنیت قووه لری ایزینسیز ائولره گیریر آما بیر آنجاق گیزلنمک قرارینا گلیریک، بوردا چوخ ایشلر اولونور آما آنجاق بیز یالنیزیق. بیزه یاردیم ائده ن یوخ، بوش بوش دانیشماقلار بیزه یارار اولمور. گلین بورکوموزو قاضی ائدیب و بیر درینده ن فیکیرلشیب و اوز آرامیزدا سوز دانیشاق، آخی نئجه اولار کی بوردا اولان سویداشلار هر گون توتولماقا گوره گئجه نی صاباح ائدمه یه یوخو گوزلرینه گلمه سین آما خاریجده اولان سویداشلاریمیز اوزلرینه کورروق وئریب و بو اولانلاری باشقالارین قولاغینا چاتدیرماسینلار. مگر سوریه ده اولانلارین یاریسی بوردا اولمور؟ مگر سوریه ده بو قده ر توتوقلانان اولور؟ مگر عرب اولکه لرینده بو قده ر باسقی واریمیش؟ بس نئجه اولور اونلار گونده مه گلیر آما بیز یوج؟ بس نئجه اولور کورد تروریست هر یئرده توپلاشیب و بیرلیکه دوغرو گئدیرلر اما بیز هله بایراق و تشکیلات داواسیندان قورتولمامیشیق؟ سوزو اوزاتماق ایسته میره م و آنجاق بونو دئمک ایسته ییرم کی بو ایل بیزیم سون ایلیمیزدیر و اگر هله اوتورساق داها ساواشماقا گوجوکوز اولمایاجاق، اورمو گولونون قوردولماسی و اورمو گولونون آرادان گئدمه سیله برابر بیزده گئدمه لییک بونو اینانماق گرکیر.
ایندی من دیسکینه دیسکینه یازیرام " گله جک
بیزیمدیر بیزیم اولاجاق آمما بیز ایسته ییب و ساواشاق "
بیر گونئیلی وطن سئوه ر
