۱۳۹۰ اسفند ۱۲, جمعه

آذربایجان ایسته‌دیگی اؤلکه‌دن سلاح آلار

تک توران :ارمنیستان سیلاحلانیرکن سس چیخارمایاجاق، آذربایجان سیلاحلانیرکن حاق‌سیز یئره الشدیرجک مییز ؟

زامان قزئته‌سی یازاری فیکرت ارتان "آذربایجان ایسته‌دیگین‌دن سلاح آلار" باشلیق‌لی بیر یازی قلمه آلمیشدیر. یازار بو مقاله‌ده آذربایجان جمهوریتینین ایسراییلدن سیلاح و سورسات آلماسی ایله ایلگیلی دگرلندیرملرینی پایلاشمیشدیر. ارتانا گؤره:


"ایسراییل، گونئی قافقاز اؤلکه‌لری ایله علاقه‌لرینه اهمیت وئریر و بو اؤلکه‌لرله اولان علاقه‌لرینی گوجلندیرمک اوچون چوخ چالیشیر. ایسراییلین گونئی قافقاز اؤلکه‌لرین‌دن گورجوستان ایله چوخ یاخین و قاپساملی علاقه‌لری وار. بو چرچیوه‌ده، ۲۰۰۸ گورجو - روس محاربه‌سینده علاقه‌لرین حربی بویودو دا اورتایا چیخمیشدی. بو گون ده علاقه‌لر یاخشی گئدیر.

گورجوستانین یانیندا ایسراییل، ارمنیستان ایله علاقه‌لرینی گلیشدیرمک اوچون ده اؤزل حمله‌لر ائدیر. نئجه کی، گئچن ایل سبتامبر آییندا پینحاس آویوی باشقانلیغین‌داکی بیر هیاتی ایروانا گؤندرمیشدی.

بؤلگه‌نین ان گوج‌لو اؤلکه‌سی آذربایجان ایله ده ایسراییل ایللردیر یاخین علاقه‌لر ایچینده. سیاسی، اقتصادی، انرژی بویودلاری اولان بو علاقه‌لرین شوبهه‌سیز حربی بویودو دا وار. نئجه کی بیر نئچه گون اونجه چیخان خبرلرده ایسراییلین آذربایجانا توپلام ۱،٦ میلیارد دو‌لار مبلغینده حربی تجهیزات ساتیش آنلاشماسی ائتدیگی بیلدیریلمیشدی.

بو خبره گؤره، تجهیزات مختلیف تیپ‌لرده اینسان‌سیز اوچاقلار، اوچاق ساوار و موشک ساوونما سیستم‌لرین‌دن اولوشور.

ایسراییل آذربایجانا ۲ تیپ ٦۰ جواریندا انسانسیز اوچاق ساتا‌جاق، حتی بونلارین اورتاق اورتیمینی ده ائده‌جک. دؤیوش حالیندا اولان، مستقیل بیر اؤلکه‌نین اویغون گؤردوگو تجهیزاتی، اویغون گؤردوگو اؤلکه‌دن آلماسی دا چوخ نورمالدیر .

آزربایجان تورپاقلاری‌نین یوزده ۲۰-سینی ایللردیر ایشغال آلتیندا توتان ارمنیستانین دورما‌دان سیلاحلانماسینا، اویغون گؤردوگو اؤلکه‌لردن ان معاصر سلاح‌لاری آلماسینا، بون‌لاری جبهه خطینه یئرلشدیرمسینه نه دئیه‌جه‌ییک؟ ارمنیستان سیلاحلانیرکن سس چیخارمایاجاق، آذربایجان سیلاحلانیرکن حاق‌سیز یئره الشدیرجک مییز ؟

گئچن ایلین سبتامبر آییندا ارمنیستانین مولداویدن میلیون‌لارلا دو‌لار دگرینده، گیزلیجه مختلیف سلاح سیستم‌لری و سورسات آلدیغی، بو سلاح‌لارین آراسیندا ۳٥ کیلو متر منزیل‌لی ب. م -۲۷ اوراگان چوخ لوله‌لی راکت‌آتار باتاریا‌لاری و سورسات اولدوغو، ۲۰۱۰.جی ایلده امضا‌لانان روسیا - ارمنیستان ایستراتژی آنلاشماسینا و روسیانین ارمنیستانا مدرن و اؤزل حربی تجهیزات ساغلامایی تعهد ائتدیگی بیلینیر.

بوتون بو گئرچک‌لر اورتادا ایکن ایرانین، آزربایجانین ایسرایل‌دن حربی تجهیزات آلماسین‌دان ناراحات اولدوغو آیدین اولور. نئجه کی، خبرلرده ایران خاریجی ایشلر باخانلیغی‌نین تهران‌داکی آذربایجان ائلچیسی جوانشیر آخوندووو تجهیزات آلیشینی آچیقلاماسی اوچون باخانلیغا دعوت ائتدیگی بیلدیریلیر.

ایرانین اؤزونون ایران - عراق ساواشی اثناسیندا ایسراییل و آمریکا‌دان گیزلی یول‌لاردان سلاح آلدیغی، بونون مشهور ایرانگیت روسوایلیغی ایله اورتایا چیخدیغی، ایرانین بو دعوتی‌نین و ناراحات‌لیغی‌نین آچیقلانا‌جاق، حاقلی گؤستریله‌جک هئچ بیر طرفی اولمادیغی اورتادادیر.

ایران بو گون ده اویغون گؤردوگو اؤلکه‌لردن سلاح آلیر، بونا هئچ کیم قاریشمیر؛ ایران دا آذربایجانا قاریشماسین. آذربایجان ایسته‌دیگین‌دن سلاح آلیر."