تک توران : 78-1377 جی گونش ایلینده، ایکی ایل موددتینده آذربایجان نئچه آدلیم بیلگینین ایتیردی.قارانلیق ایللرده تورکچولویو تک باشینا یاشادان علی تبریزلی،اورتاق تورکجه نین تمل داشی وارلیغین امکداشی حمید نطقی، وطن حسرتی ایله تورپاغی باغرینا باسان حکیمه بلوری،ستارخانین قیزی معصومه ،خلیل رضا نین سیرداشی حمید محمد زاده،اینجه صنعتیمیزین اولدوزو پروفسور مینایی،اسکی تاریخین یازاری پروفسور زهتابی،هابئله آدلارین اونوتدوغوم چوخلو قهرمانلاری او گونلر ایتیردیک.گئنیشله نمه یه ایلک آددیملاری گؤتورمکده اولان آذربایجان حرکتی بئله بئله دوشونرلرین ایتیردیکده سیخیلیردی.اؤزومدن "بو دوشونجه یه یئنی قاتیلمیش گنجلری گلیشدیرمه یه کیم قالدی" سوراراق داریخیردیم.نئچه لیک باخیمیندان بئله آز،نئجه لیک باخیمندان گنج و تجروبه سیز حرکتیمیز اؤنجول سوز هارا گئده جک.اونلار بیر اللرینده قارانلیق گئجه یه چیراق،بیر اللرینده ارکین باشینا بایراق گتیریردی.هامیسی میللی حوکومت یئتیردیگی نسیلدن ایدی.میللی حوکومت چاغیندا اییرمی نئچه یاشیندا دیلیمیزی اؤیرنن گنجلر،یئتمیشلرین سونوندا حایاتا گؤز یوموب بیزی ترک ائتدیلر.دیلیمیزین یاساقلیغیندان اللی ایل سونرا بیر داها آذربایجان قالخیمینا شاهید اولدوق.گنجلر،یئنی یئتمه لر سونسوز هوسله دیلیمیزه دؤندولر.گنج اؤنجول لر یئتیردیلر.بوگون آذربایجان بو نسیلین یئتیردیگی اؤنجول لرین بیرین ایتیردی.
غلامرضا امانی اؤز عصرینین صادیق بیر ائولادی ایدی.هله دوستاقدا ایدی آدیلا،گؤردویو ایشلرله تانیشدیم.بو دا بیزیم حرکتده یازیلمامیش یاسادیر.فیکیرداشلارین آدیلا،گؤستردیگی چابا لاریلا گؤروشمه دن تانیشیریق.گؤروشدوکده اوزون ایللر دوستو کیمی قوجاقلاشیریق.دوستاقدان اورمو بیلی یوردونون اویانیش درگیسینه یازی گؤندریردی. او درگینین خبرلر بولومونده امانینین خبرلری گئدیردی.بیراخیلدیقدان نئچه گون سونرا ایکی فیکیرداشلا بیرلیکده اورمودان تبریزه گلیب گؤروشونه گئتدیک.اؤیرنجی چاغیندا چالیشدیقلاریندان،عسگرلیگینده اوزوئرن اولایلاردان سؤز آچدی.اطلاعات اداره سینین سورغو لاریندان دانیشدی.گئنل دورومدان خبرلی اولماسی دؤرد ایل دوستاقدا قالانا بنزمیردی.خبرلری ایزلرمیش.درگیلری تاپیب سون گؤروش لری اؤیرنرمیش.ایلک گؤروشده مهندس امانی نی اؤنجه دوشوندویومدن یوکسک گؤردوم. آرازیالنیز سو دئییل،تاریخین گوزگوسودور.و مادام کی دوشونجه یاشاییر سنده، سن یانلیز اَت،قان دئییلسن،سوموک دئییلسن،دامار دئییلسن،داش دمیر آسلان سان. مهندس امانی بو سوزون جانلی آنیتی ایدی.من اونو چئشیتلی چئشیتلی یئر لرده،ساعات قاباغیندا،باغ مئشه ده،فیکیرداشلارین تویوندا گؤردوم.همه شه هر یاندا اولسون یاسدا اولسون تویدا وطن اوغروندا موباریزه حاضیر کیشینی گؤردوم.اونا بوتون یاس مجلیسلری تهرانین ستارخانی،توی شنلیک لری تبریزین باقر خانی ایدی. یورولماز ایدی،قورخماز ایدی.بونلاری هامی بیلیر.عائیله ایله بیرلیکده قوناق اولدوقدا تئلفون آچیردینسا میللی گؤرو بیلیب قرارلاشیب گلیردی.ائله اؤتن ایل سعید،صالح،جلیل،عبداله،علرضا،بهروز،لیلا یاخالاندیغی زامان ساعات قاباغیندا گؤروشدوک. بوتون چالیشقانلارلا بیرلیکده تهرانا گئدیب محکمه اؤنونده توپلانیب اعتیراض ائتمه یی ایسته ییب آردیجا سؤیلدی:اعتراض ائتمه سک اطلاعات هر ایش ایسته دی گؤرجک.محکمه قاباغیندا توپلانیب قاپیلاری سیندیراریق.توتوقلانانلار بیز دن یاردیم اومور. توپلانتینین خبرین ائشیدیب گوجله نه جکلر.بیزیم محکمه یه سؤزوموز بودور:سوچو وارسا حؤکمون وئریب دوستاغا گؤندر یوخسا بو قدر ساخلاماق نه ایچیندیر. مهندس امانی همه شه قاباقدا اولان موناسیبت لره گرکلی ایشلردن گؤرولجک ایشلردن بحث ائدیردی.باغ مئشه ده منه سؤیله دی:کئچن ایل لرین بیرینده کیچیک اوشاقلار آنا لاریلا بیرلیکده باقرخان کؤرپوسوندن(آبرسان)باقر خان مزارینا قدر آنا دیلیمیزی ایسته یه رک یول گئتمیشلر.فیلیمی گؤزل شکیلده حاضیرلانمیش. بو ایل دونیا آنا دیلی گونو او سی دی نی گئنیش سوییه ده میلتیمیزه تقدیم ائتمه لییک.او دوستاقدا ایکن آدیلا تانیشدیم. اؤزوم دوستاقدا اولاندا قیرخ آلتمیش نؤمره لی تئلفونو بیر داها آرامایاجاغیما ایسته مه دن ایناندیم.
