تک توران : ...(وطن اومودو)...
نه من بورالاردا ياتيم ، جانيم ، نه سن اورالاردا اوياق قال. نه من
بورالاردا آغلاماييم جانيم ، نه سن اورالاردا گولمه. نه من دوستاغيمين سويوق ميل‌لرينه
سارماشيق كيمي دولاشماييم ، نه سن شكيليمي قوجاقلاما.
نه من شهريمه يانماييم
نه سن من‌ده‌ن سؤن. نه منيم خياليم بو اوجا دووارلاردا قان كيمي قورويوب قالسين ،
نه سنين خيالين گزمه‌لرده‌ن گيزلي بو دوواردان بويلانسين. يانسين بو اوره‌ك
جانيم ، يانسين. آلووونا سويوقدان يوخو باسميش قونشوموز اويانسين.
دوواريميزا قونان بايقوش كيشله‌نسين، آي جانيم نه اولور قوجا نه‌نه‌مين قاباغيندا
ديكه‌ليب داغ اولموش ايشيميز ايشلنسين. جانيم، منيم جانيم، چارميخا چكيلميش قانيم.
اتيم بو سيغيرچين بئيني يئميش قوزقونلارين، سوموگوم شهريمين آج كؤپك‌لرينين،
سئوگيم سنين، اومودوم وطنيميزين اولسون. گؤزلريم دولسون ، اللريم اوشوسون ،
بوغازيمين آلتينا دوشه‌ن يارا آجيشسين ، داريخماييم بو چور توشموش دووارلار
آراسسيندا ، هله گؤم-گؤي يئتيشمه‌ميش اينسانلار آراسسيندا . ايشيق سوزسون بو
قارانليق كوپه‌نين باجاسين‌دان. يئره باتميش ائولرده‌ن چيخاريلسين ياشيم بويو
اوستونه توپراق اله‌نميش اومودوم. ديرناق-ديرناق سؤكولسون بو داش‌دوارلار ، اوْووج
اوْووج اوْيولسون گزمه‌لرين گوزلري ، نه سني گؤره‌نمه‌سين‌لر نه مني ، نه مني
قانداللاماسينلار نه سني آغلاتماسينلار ، نه مني ديغلادماسينلار ، نه سني
ساتانماسينلار نه وطنيميزي.
