تك توران : دولو گئدیر، بوش قایی‌دیر گمی‌لر.
بوش گئدیب، دولو
دؤنور گمی‌لر.
اورییمی
آپاریرلار – گتیریرلر گمی‌لر.
و، هاراداسا
باتمیش
بیر بالیقچی‌نین
خیالینا دالمیش
قوجا کؤرفز . . .
گؤزلری؛
نهنگ‌لری اؤلموش
دنیز.
اوریی؛ یوواسی
اودلانمیش گؤیرچین . . .
سیقاراسی،
داماغیندا اولاردی همیشه.
تورپاغا یولداش،
چؤره‌یه قارداش!
کیمسه قوناق
چاغیرمازدی اونو
عزیز گون‌لرده.
گؤروشونه کیمسه
گلمزدی،
بایرام‌لاردا.
توککول قوخویاردی
سحر تئزدن‌لری.
شوکورله
بویاناردی گون باتان‌لاری.
اللری تیکان‌لی –
قابارلی.
ساچ‌لاری
پیتلاشیق-تورپاق‌لی . . .
بئلی بیر آز
بوکولو
و یورغون یئریشی . . .
ایندیجه چیخاردی‌لار
قوجا فهلنی
چؤکموش دووارین
آلتین‌دان . . .
سن او یانا،
پاییز گلدی.
قارقا‌لار
دولوشدو کوچه‌میزین یوخوسونا.
و، قورویوب
تؤکولدو
بوتون سارماشیق
بوتا‌لاری . . .
بیلیرم؛
سحرلریم آلما
قوخومایا‌جاق داها
و، قوش‌لارین
خاطره‌سی
دیغلادا‌جاق منی . . .
ملیحه عزیزپور
