باغلی قاپی ( مسعود بئی سنین دیلینده ن یازیرام)- ووقار سره سکندلی

تك توران : تاخ تاخ تاخ- قاپی آچیلیب دارغا هایلادی، دور آیاغا، ناماز واختی چاتیب،

- نه؟ مه یه بوردا نامازدا قیلارلار؟

- سن موسلمان دییلسن؟

- یوخ، نئجه؟ من کافرم، گورموسن، دینیم اولسایدی منده منبرده اوتوروب سسیمی باشیما آتاردیم

- سس وئرمه، چوخ دانیشما، ائله بئله ائدیرسیز کی بو گونه ده قالبسیز

- تامام سن گئد، بوردا ناماز دوشمز بوراسی غصب اولونموش یئردی

- تاخ تاخ تاخ – قاپی آچیلدی یئنه دارغا هایلادی، دور آیاغا، آل بو چوره گی ، دایان چایدا وئریم، یه سونرا دئنه بونلار پیس آدامدیلار

- پیس آدام یوخدور، اونلار یانلیز بیلمیرلر، اونلارین و سیزلرین سوچو بیلمه مکدیر و بیزیمکیده .... ، بوش وئر، ساغ اول

بوغاز بیچیلیب، هئچ نه یاپیشمیر، آتامدان، آنامدان گیلئیلیه م، آللاه رحمت ائدسین اونلارا آمما بیلمیره م اونلار پیس ایش گوروبلر یوخسا من ترسینه آنلامیشام، بو کی بالا اگر بوینون گئدیرسه ده حاقدان دانیش قورخما، حاققینی آل بونو سنین اولو ساوجین محمد دئییب. نئیسه بوش وئر

تاخ تاخ تاخ – مسعود دور آیاغا، او گوزلوگو گوتور تاخ گوزونه، هئچ یئر گورسنمه مه لیدیر، تاخدین می؟ دوش یولا، الینی وئر منه باخ آشاغا

- نه یی اورگه دیرسن؟ من بو یوللاری دای تانییرام، سن اوتور الینی من گئده ره م.

بیر اوتومادا( صندلی) اوتوردوم، نئچه دقیقه سوروشدو، قاپی آچیلدی، بیریسی گلیر آمما حالا اوزونو گورمه میشم، ایسته میره م گوره م، بیر گون بونا دوشونوردوم کی آخی بس نییه بونلار بیزیم گوزلریمیزی باغلاییرلار؟ بونلار کی هم گوج ییه سی دیلر همده کی بیزیم قوللار باغلیدیر، اولمایا اوتانیرلار، یا بلکه ائله دوغروسو قورخورلار، هر حالدا یئنه گوزو باغلی اوتوردوم

- سلام آقا مسعود، نئجه سن؟ داریخمیسان؟ باخ اوزون ایسته ییرسن کی بوردا قالاسان یوخسا بیزلیک اولسا ائله بو گون بیله نی بوراخاریق، تکجه بیر یولو وار اودا بودور کی من سوردوغوم سورولار جاوابسیز قالماسین

- سیز نه ایسته ییرسیز من یانیتلاییرام (جاوابلاییرام)، سیز ایندی یه قده ر نه سورموسوز من یازمیشام

- اونلار دردیمیزه دیمز، سن یالنیز اوز سئودیگین کیمی جاوابلاییرسان

- باخین من سیزه بیر سوز دئییم: من و منیم فیکیرداشلاریمین جاوابلاری سیزین بوتون سورغولارینیزا یالنیز بو اولا بیلر کی

من دیلیمده ن دانیشیرام سن منه پانتورک دئییرسن، من توپراقیمدان دانیشیرام سن منه ساتقین دئییرسن، من وارلیقیمی بئش قیران پولا ساتمارام، ساتقین اونلاردیلار کی اوزگه چیراغینا یاغ اولوبلار

بیز وطن عاشیقی ائل مجنونو تورک عسکری ییک   -   بیز وطن نامینه اولسک دیریلرده ن دیری ییک

- باخ بئله دانیشیرسان اوزونو بوردا گورمه لیسن، کیمسه ده یوخ دادینا چاتا، اونلار کی سن آدینی تورک قویوبسان و داشینی سینه یه چیرپیرسان سنده ن اوترو هئچ نه گورمورلر، یادلاردان چیخمیسان بونو بیل، اوزگه ده ن اوترو اوزونو یازیخ ائله مه

- دئدین کی کیمسه دادیما چاتان یوخ بیر سوز یادیما دوشدو. منی اذان چاغی یوخودان ائله دیلر کی نامازا دور، دئدیم کی من ناماز قیلمارام بوراسی غصبی لی دیر، سن قیلدیغین نامازین نده نینی بیلمیرسن، منه دئییرسن کی کیمسه دادینا چاتمایاجاق آمما من سنه دئییره م کی اگر او تانری کی سن اوندان اوترو ناماز قیلیرسان، منیم ان بویوک دایاغیمدیر، او تورک ایگیدلر کی سن اونلاری محکوم ائدیرسن کی منی یاددان آپاریبلار، بیر چوخون سن تانیییرسان، چون ائله بو اوتاقدا سنین سوردوغون سوزلری یانیتلاییبلار. او گون اونلار بورجلارین اوده ییب لر و بو گونده منم کی توپراقیما گوره سنین کیمی چاققاللارین قاباغیندا دایانمالییام

او گئددی و من بیر نئچه دقیقه اتاقدا تک اوتوروب دوشوندوم و قاییداندان سونرا یئنه بو تارتیشمانین آردی گلدی

...

- دارغا: دور آیاغا گئده ک ناهارینی یه

و ناهاردان سونرا یئنه ده باشدا اولان تارتیشمالار

و بو گون 60اینجی گوندور کی من هله باغلی قاپیلار دالداسیندا دوشونوره م