تك توران : بیلمیره م سبب نه دیر و نده ن بؤیله اولور آمما هر حالدا بو چوخ آغیر و اوره ک یاندیران بیر سوروندور. سویداشلاریمیزین بیر نئچه سی ایران آدلانان اؤلکه نین دوستاقلاریندا گونلرین گئجه ائدیب و گؤزه ل چاغلارین دوستاقدا چورودورلر. بو سویداشلاریمیزین دوستاقدا اولماقلاری بیر درد اولسادا بئله اونلاردان سس سوراغ توتمایانلار منی داها چوخ یاندیریر. دوستاقدا قالان سویداشلاریمیزین منیم له، سیزین له و بوتون آزربایجان بالالاری ایله بیر اورتاق سؤزو وار و اودا آنا وطن سئوگیسی دیر و بو سسبده ن اونلار باغلی بیر یئرده و آغیر بیر دورومدا ساخلانیرلار. منه بئله گلیر کی داها اونلار یوخ ساییلیب و یادا کیمسه لری یوخ اونلاری یوخلایا و اونلاردان بیر خبر آلا. من بیلن بو یولداشلاریمیز هئچ بیر قوروپا باغلی دئییل لر و موستقیل شکیلده چالیشیرلار. بو نده نه گؤره بوتون قوروپلاردان الیم اوزولوب و هئچ بیر سؤزومده اونلارا یوخ، بلکه اونلارین سیمگه لرینی داشیسایدیلار ایندی باشقالارینا تای گوندم ده اولوب و هر گون سیته لریمیز اونلارین شکیللری ایله بزک اولوردو. اوزومو توتورام قالان باشقا موستقیل فیکیرداشلارا ، سیزلر کی آزربایجانین داشینی سینه یه چیرپیب و اوجالاردا اوتوروب و آشاغیداکی لاری گؤرمه یه گؤزلوک آختاریرسیز، سیزینله یم
4 آی بوندان اؤنجه خورداد قیامینین ایل دؤنومونون آخشامی چالیشقان سویداشیمیز
محمد بئی اسکندر زاده ایرانین امنیت قووه لر طرفینده ن توتقلانیب و 2 آی دان آرتیق
اطلاعات اداره سینده قالاندان سونرا تبریزین دوستاقینا آپاریلیب و بیر آغیر
دورومدا ساخلانیب
اوندان 1 آی سونرا و قورا
پیشیره ن (تیر) آییندا سایین وحید بئی حبیب چشمه و مهندس وحید راستگو توتوقلانیب و
بیر آیدان آرتیق اطلاعات اداره سینده ایشکنجه لر آلتیندا قالاندان سونرا تبریز
دوستاقینا آپاریلیب و هله ده اوردا ساخلانیبلار.
تیر آیی نین 19 اونجو
گونو باشقا بیر فیکیرداشیمیز سایین مهندس مسعود حسین زاده آتا ائوینده امنیت قووه
لر طرفینده ن توتوقلانیب و 70 گون دور کی بیلینمز بیر دورومدا و ایشکنجه لر آلتیندا
ساخلانیلیر و سورغولار آلتیندا تاپدالانیر و کیمسه نه اوندان سس سوراغ توتور و نه
اونلار ایگیدیمیزده ن ال چکیرلر. آرتیرمالیام کی مسعود بئی آتا و آنا نعمتیند ه ن
محرومدور و هر ایکی سی دونیالارین دییشیبلر.
حال بونلاری قید ائتمکدن
سؤزوم بودور، بو سویداشلاریمیز و ها بئله سایین سعید بئی متین پور و فردین مراد
پور کیمی ایگیدلر، نه زامانا قده ر اوردا قالیب و ایشکنجه اولاجاقلار و بیز گئجه
لری باشیمیزی دینج یاستیقا قویوب و اولدوزلاری سئیر ائده جه ییک؟ اونلار بیر گون
او باغلی قاپیلاردان دیشاری چیخاجاقلار و اوندا بیزیم نئجه اوزوموز اولاجاق کی
اونلارین قارشیلارینا چیخیب و بیرلیکده ن دانیشیب و سؤز آپاراق.
اوتوروب و داها دوغروسو یاتماقلا
کیمسه بیزه پای وئرمه یه جک. بونلارین اومودو بیزده ن سونرا کیمسه دئییل. بیزیم
سوسماغیمیز دوشمن یانقیسینا اودون اولماقدیر. نه قده ر کی بیز سوسموشوق اونلار آغیر
وضعیتده قالاجاقلار. گلین اونلارا آرخا اولاق، گلین اونلارین سوزلرینی دونیایا
چاتدیراق. قویمایین آرخاسیز و آدسیز قالسینلار.
قارتال تورک اوغلو
