5 مين 700 کیلومتر مربع’ليک مساهتي و 102 آداسي ايله ايران’ين ان بويوک گؤلو
اولان اورمو گؤلو،نورمال زاماندا توپلام 37 ميليارد مئترکوپ سو ايچرمکده و گؤل،
قوزئيدن گونئيه 135 کيلومئتير اوزونلوغوندا، دوغودان باتييا 18 الی 55 کيلومئتير
گئنيشليگينده‌دير. درينليگي ان چوخ 16 مئتير اولان گؤلده دوز ذخيره سي باخيميندان
دونيانين ايکينجي بؤيوک، قاپساديغي (اهاته) آلان باخيميندان دونيانين اوچونجو
بؤيوک گؤلو اولان اورمو گؤلو’نه 60`ين اوزرينده چاي و چايلاق آخماقدادير آما حال
حاضيردا بو چايلارين تخمينن بوتونونون اورمو گؤلونه آخيشي، موختليف بندلرين
(باراژ، سد) اينشاسي ايله انگلله‌نيبدير.
بير باشقا ياندان ايسه، تبريزله اورمونو بيرلشديرمک بهانه‌سي ايله گؤلون
اورتاسيندان 17 کيلومئتير اوزونلوغوندا کؤرپو اينشا ائتمک آدينا، داش تورپاقلاري
گؤلون اورتاسينا قدر دولدوراراق، ايچ گؤزه‌لرين قاپاديلماسيني ساغلاييب، سويون
دولاشيميني انگلله‌ييبلر. نهايت سويون يوزده 70’ي سون 15 ايل ايچينده بيلينجلي بير
شکيلده ايران رئژيمي طرفيندن قورودولموشدور.
اوزمانلارا (متخصص) گؤره اؤنلم آلينماماسي حاليندا بيرنئچه ايل ايچينده گؤل،
دوزلوق بيربؤلگه‌يه دؤنوشه بيله جکدير. ايستاتيستيکلره اساسن بو گؤلون تامامن
قوروماسي و بونون آرديندان اورتايا چيخاجاق فلاکت، چئوره‌ده‌کي76 ميليون اينساني
ائتکيليه‌جک و 15 ميليون اينسان ايسه ياشاما آلانلاريني ايتيره‌رک، تورپاقلاريني ترک
ائتمک زوروندا قالاجاقلار " بو اينسانلار ايسه گونئي آذربايجان
تورکلريديرلر."
بئله بير فلاکتين اورتايا چيخماسينا دويارسيز و اومارسيز داورانان، ايللر بويو
گؤز يومان بير رئژيم نئجه بير نييت ايچينده اولدوغونو آچيقجا بللي ائتمکده‌دير.
نئجه کي بونون ايلک سيگناللاريني دا 2006 جي ايل 12 ماي`يندا، ايران قزئتينده درج
ائديلن تورکلري آشاغيلاييجي کاريکاتوردا و او کاريکاتوردان 10 آي سونرا، يني 2007
جي ايلين 12 مارت تاريخيند، ايرانين بانک سيستئمينده پارا دولاشيمينا گيرن 5000
تومنليک پولوندا وئرميشديلر.
کاريکاتوردا تورکلري (هامام بؤجکلئريني) يوخ ائتمک اوچون اورتايا قويولان
اؤنريلرين بيري تام بو شکيلده ايدي: "اونلاري توپلو شکيلده يوخ ائتمک اوچون
يووالارينا زهر تؤکه‌جکسينيز" دئيه!
5000 تومنليک (50000 ريال ليق) پولوندا ايسه درج اولونان ايرانين خريته‌سيندن
اورمو گؤلو قالديريليبدير.
يوخاريدا قئيد ائديلن سوموت ندنلر (موثق دليللر) گؤسترير کي ايران رئژيمي
بيلينجلي بير شکيلده اورمو گؤلونو قورودور.
بو گون بيزيم، يعني گونئي آذربايجان تورکلرينين قلبي ساييلان اورمو گؤلو،
يوخاريدا قئيد ائديلن سوموت ندنلره (موثق دليللر) اساسن ايران رئژيمي طرفيندن
بيلينجلي اولاراق بير دوزلوغا دؤنوشدورولمکده‌دير و اوردا وار اولان 10 ميليارد
تونون اوزرينده دوز، اسن يئللر و قاسيرغالار واسيطه‌سي ايله گئنيش بؤلگه‌يه
داغيلاراق بير قالاباليق ميلتي يوخ ائتمه‌يه يئترلي گؤرونور. بو اصلينده، بير ميلتي
کوتلوي سورگونه زورلاماق و بشريته قارشي جينايتدير.
آما بوتون بونلارا رغمن نئجه ائدک کي سؤزو کئچن تورپاقلاردا قالاباليق بير
جمعييته صاحيب اولان ميلتيميز قورخمادان اؤزلرينه قارشي 21 جي يوز ايلين ان بؤيوک
زورونلو (مجبوري) سورگونلريندن بيريني هياتا کئچيرميک ايسته‌ين بو سئناريويا قارشي
اعتيراض ائتسين؟!
ايران رئژيمي اعتيراض ائدنلره قارشي اگر غدارليق گؤستريرسه، اگر تهديد
ائديرسه، اگر اؤلدورورسه و.. ميلتيميزي بو تهلوکه‌لر ايله قارشي قارشييا گتيرميه‌جک
بير اَيله‌مي نئجه باشلادا بيلريک؟ نه شکيلده بوتون ميلتيميزي بير اورتاق اعتيراض
اَيلمينه جلب ائده بيلريک؟! نئجه ائدک کي، ائديله‌جک اعتراض لاردا وئريله‌جک هزينه‌لر
چوخ داها آز آما آلا بيله‌جگيميز سونوجلار داها ياخشي اولسون؟!
بو گونه قدر گؤلون 70 فایزی قوروموش حالدادير. دئمک کي بيزيم ده، گونئي
آذربايجان تورک ميلتي اولاراق محو اولماغيميزا ساييلي آيلار و ايللر قالميشدير.
بوردا آرتيق ميللي ايستکلردن و سياسي آماجلاردان سؤز گئتمير بو دفعه ميلتيميزين
اؤلوم ديريم ساواشيندان سؤز گئدير! بيزي دوز ايچينده بوغماق ايسته‌ييرلر.
بيزيم کؤکوموزو قورودماق ايسته‌ييرلر.
بو دهشتي نه شکيلده عوموم ميلتيميزين ديقتينه چاتديراراق کوتلوي بير اعتيراض و
آياقلانماني ساغلاياغين؟!
بو قاريشيق و بؤهراني دورومدا کي؛ بير طرفدن رئژيمين ميلتيميزين اوزرينده
شيددتلي سياسي و ائکونوميک باسقيلاري وار باشقا طرفدن ده دوز تسوناميسي دئيه
ماهييتلنديريلن بير فلاکتين اورتايا چيخماسينا آز قاليب، نه ائده بيلريک؟!
تکليف:
اورمو گؤلونون قوروماسي سونوجو اورتايا چيخاجاق دوز تسوناميسيندن قاباق، بيز
اؤزوموز شهرلرين ايچينده بير سوني (مصنوعی) دوز فيرتيناسي ياراداغين.
دئمئلي باشلانقيج اولاراق هر کس صاباح ائوينده ن چيخديغيندا، توربا توربا دوز
کوچه‌لره و جادده‌لره تؤکمه‌ليدير. هر کيمين الينده نئجه بير آراج (وسيله) وارسا
اونونلا بللي بير مودت هر گون بو ايشي شهر ايچي چئشيدلي ايستيقامتلرده تکرارلايا
بيلر . آراجي اولمايانلار ايسه ياشاديقلاري بينالارين پئنجره‌سيندن بير نئچه توربا
دوزو کوچه‌لرينه و خيابانلارينا آتاراق بو دينج ايطاع تسيزليک حرکتيني باشلادا
بيلرلر. البت قيسا زامان ايچريسينده مثلاين نه اولدوغونو عوموم ميلتيميز
ماراغلانيب، سوراغلاييب و اؤيرنه‌جکدير. بئله‌ليکله اينسانلاريميزين ويجداني
دهشتين بويوتونو فرق ائده‌رک، بو دينج اعتيراضا قاتيلماغا حؤکم ائده‌جکدير.
بو دينج هرکتي تبريز، اورمو، اردبيل باشدا اولماق اوزره هر هاردا بير
آذربايجان تورکو ياشاييرسا ائديب و بو دينج ايطاعت سيزليک حرکتينه قاتيلا بيلر.
کوچه‌لري، خيابانلاري و بوتون اطرافيميزي بورونموش بير دوز منظره‌سينه
چئويرمکله، ميلتيميزي دهشتلي بير تهلوکه‌نين فرقينه وارديرماليييق. گونئي
آذربايجاني بير هفته، حتّي هفته‌لرجه دوزلو اَيلملره مئيدان ائتمه‌ليگيک.
ديقت ائدرسک، عئيني زاماندا ميلتيميز اوچون بو ايشين گوونليگي و ايقتيصادي
حزينه‌سي ده چوخ دوشوک و الوئريشليدير.
بو اعتيراضلاري ماهييت اعتيباري ايله عئيني، آما يؤندم اعتيباري ايله فرقلي
شکيلده، خاريجده ياشايان آذربايجانليلار دا ائديب ايچرييه دستک اولا بيلرلر.
آيريجا دونيانين ديقتيني ده چکه بيلمک يئنه‌ده خاريجده ياشايان آذربايجانليلارا
دوشر. بونو حتّي بير کره‌سينده تجروبه ائتديک و سونوج آلديق، ديقتينيزه چاتديرماق
اوچون او اَيلمين ويدئوسونو دا بو يازيدا يئرلشديريريک.
http://www.youtube.com/watch?v=uo1XPKwqVR4
دئمه لي تجروبه
ائديلن بو لينکده کي حرکتده، تورکييه‌نين کانال د سي ائديلن حرکته دويارسيز
قالماياراق، اورمو گؤلو هاقدا بير رئپورتاژ يايينلادي. بو حاديثه ایله بير زاماندا
اولدو کي آيلار و ايللر بويو باغيريب چاغيرماغيميزا باخماياراق هر هانسي بير تورک
مئديياسي اورمو گؤلونه ديقت گتيرمکدن قاچينيردي آما بو اَيلمله کانال
"د" ،کانال "ت رت"،بللي قزئتلر و يازارلار دا اورمو گؤلو
فلاکتينه ديقت گتيره‌رک بو هاقدا يازيلار يايينلاماغا باشلاديلار.
بو يازيدا، داها
دوغروسو بو چاغريشادا چاليشيليب کي بير دينج ايطاعت سيزليک حرکتينين باشلانماسينا
ميللي فعاللار و ميلتيميز طرفيندن ديقت گتيريلسين. ائديله‌جک حرکتين ماهييتي و
شکلي فرقلي اولا بيلر و فيرقلي تکليفلر ده وئريله بيلر اساس فيکير بودور کي، بير
"دينج ايطاعت سيزليک حرکتي" باشلاديلسين.
سعيد بايکال
