من بو مٶوضوعدا
قاباخالاردا دا بير مقله نشر ائتميشديم كي من اونو بو مقاله نين اته يينده بيرداها
وئرميشم.
عزيز
سؤيداشلار!
اورمو
گولو سون نفسه‌لريني چکمکده‌دير. اگر بو گون اورمو گٶلو نيجات وئريلمه‌سه، صاباح
کسينليکله گئج اولاجاقدير و سونوجدا گٶلون اطرافيندا ياشايان ميليونلارلا
آزئربايجانلي، ايرانين مرکزينه اساسن فارس بؤلگه‌لرينه کؤچمک زوروندا قالاجاقلار.
طبیعي دير كي، ائله فارس حاکيميتي نين اساس آماجلاريندان بيري ده بودور. او زامان،
ايران آدلانان اؤلکه‌ده داها 35000000 آزربايجانليدان سؤز ائتمک آنلامسيز
اولاجاقدير. كئچن 100 ايل عرضينده، گونئي آزربايجانين باشينا گتيريلن بلالار و
فاجيعه لر، آنا ديلينين ياساقلانماسيندان توتموش، يئر آلتي و يئر اوستو ثروتلر و
جغرافي توپراقلارين تالانماسي آز دئييلميش، چاغيميزدا اورمو گولونون پيلانلي
شکيلده قورودولماسي دا گؤز قارشيسيندادير.
بو
آجيناجاقلي اولايالاري دوشونور کن اينسان اؤزو، اؤزوندن سوروشور "ندير بو
ميلتين گوناهي؟"نه زامانا دک بو ميلت اسير کوله اولوب تاماميله تالان
اولاجاقدير؟ گؤره‌سن اگر گونئي آزئربايجان تورک ميلتينين اؤز موستقيل ميللي دؤولتي
اولسايدي، بو گون اورمو گولونون ماوي رنگي قيريميزي قانا بویانارمی دی؟
اورمو
گولو حاقدا؛ يئترينجه يازيلار يازيلميش و منده سيزين زامانيزي چوخ آلمادان بو
مسئله ني بورا دعوت اولموش متخصصيلرين ايختيارينا بوراخيرام. سادجه بورادا، سون
زامانلار خاريجده گونئي آزئربايجان ميللي آزادليق حرکتينده؛ فعاللاريميزين
آراسيندا يارانان يئرسيز تارتيشمالارا و گيزلي و آشكار اللرين آراميزدا نيفاق
سالمالارينا توخونماق ايسترديم.
سايين ايشتيراکچيلار،
بيلديگينيز
کيمي، (ايچريده) گونئي آزئربايجاندا ميلتيميز اؤزلليکله ميللي فعاللاريميز و
اؤيرنجيلريميز اولدوقجا آغير شراييطده فارس-ايسلام آپارتايد حاکيميتينه قارشي
موباريزه‌لرينه دوام ائتمکده‌ديرلر. آما چوخ تاسسوفلرله، خاريجده ياشايان ميللي
فعاللاريميزين بير سيراسي، اصلي موباريزه يوللاريني بوراخيب، بير بيرلرينه قارشي
يئرسيز تارتيشملارلا مشغول اولوبلار.
منجه بو
يئرسيز تارتيشمالاري کيملر اورتايا آتديقيني چوخ ديققتله نظره آلماليييق.
گونئي
آزئربايجاندا ميللي آزادليق موباريزه‌سي اولدوقجا گوجلو و محکم دير. بو حالدا طبیعی
دير کي آزئربايجان تورک ميلليتي نين تاريخي دوشمني اولان فارس راسيستلري، بوش
دورماييب و چاليشرلار كي، ميللي فعاللاريميزين ايچينده فرقلي يوللارلا تفرقه
ياراتسينلار. سون زامانلار يارانان يئرسيز موباحيثه لردن بيريسي "تورک"،
"آزري" و "آزربايجانلي" كيم لي يي آراسيندا آرايا آتيلميش
داوادير كي آچيق-آشكار فارس مئدياسي طرفيندن اونا دامن وورولور. البته بو ساياق،
آراني قاريشديران و ميللي فعاللار ايچينده آيريليق سالان موباحيثه لر کئچميش
زامانلاردا دا باش وئرميشدير. اونلاردان بير نئچه‌سي آشاغيداكي ادعالار اطرافيندا
فيرلانميشلار:
بيز شاه
ايسماييل ختايي ائولادييق و بابالاريميز تورک عثمانلي قوشونلاريله ساواشميشلار.
ستارخان
حرکاتي ايرانين اراضي بوتوولوگونو قوروماق اوچون باش وئرميشدير.
دئموکرات
فيرقه سي و پيشه وري حرکاتين ايستالين يولداش گتيردي.
محمد-امين
رسولزاده آلمانييا نازيلريله ايش بيرليگينده اولموش.
سون
زامانلار، گويا "آذربايجانلي " و "تورك" اولماق آراسيندا بٶيوك
بير ضيديتين كشفينه نائيل اولوب و بيزي بو ايكي صيفت ين بيري ني قبول ائديب، او
بيرينيه لعنت اوخوماق و خصوصيله اٶزونو و ميللتيني "تورك" كيمي
آدلانديرانلارا قارشي، نيفرت ياغديرانلار ظهور ائتميشديرلر. بونلار حتي اوزون
ايللردن بري گونئي- ده فعاللييت گؤسترن و نئچه نسيل آذربايجانلي آيدينلاري تربيت
ائتميش "وارليق" ژورنالي و وارليقچي لارا قارشي سيستئماتيک و مقصد يؤنلو هوجوملارا باشلاميش و "مهران
باهارلي" آديله يازاري گيزلي ايطيلاعات سئرويسي نين مأموري (!) معرفي ائتمک
کيمي عمل لره باش وورموشلار. بوتون بو عملياتلار، يالنيز و يالنيز ميللي فعاللارين
ايچينده تفرقه ياراتماق آماجي داشييير.
البته
بوردا دا همييشه اولدوغو كيمي، تفرقه سالان يازيلاري اورتايا آتان ساپي اؤزوموزدن
اولان مانقورتلارين ايزي گٶرسمنكده دير. همن او دوشونجه کي کئچيميشده اوزون ايللر
اينتئرناسيونال شعاري آدي آلتيندا روسلارين قوللوقوندا اولموشدور. بورادا سوروشماق
لازيمدير کي آلمييانييانين "کٶلن" شهرينده يووا قورموش؛ چئشيتلي قوندارما
آدلارلا ايران گوبال، اخبار روز و فارس شووينيزمينين قوللقوندا اولان باشقا آنتي
آزئربايجان سيته-لرینده تفرقه ساليجي مقاله‌لري يازان يازار کيمدير؟ و بو
تخريباتچي دوشونجه هاردان قايناقلانير؟ عینی زاماندا سورماق لازيمدير کي:بير سيرا
قوندارما ايمضالارين آرخاسيندا كيم دورور؟ ميثال اوچون بو آشاغيداكي
"ايمضا"لاري كيم قوللانير؟
"جمعي
از آزاديخواهان آذربايجان"
"عده
اي از روشنفکران اذربایجان"
"دموکرات
های چپ تبریز" و ....
سایین سویداشلار!
سونوجدا
بير داها خاطیرلاتماق ايسترديم کي گونئي آزئربايجانين ميللي آزادليق حرکتي چوخ
گوجلو و گئنيش دير. بو مئيداندا ايستر سول، ليبرال ياخود آزئربايجان تورک
ميلتينين سعادتيني موختاريت، فئدراليزم يا ايستيقلاليتده گؤرن هر تورلو دوشونجه‌لره
يئر واردير. آنجاق اساس قونو بو ميللتين منافعينه صاديق قاليب و بو يولدا اولدوقجا
برابر بيرليکده گئتمک دیر.
بو گونكو
آغير شراييطده، آزئربايجانين ميللي آزادليق حرکاتينين يولوندا مانعلر يارادان، داش
ديغيررادان يا تفرقه‌لر سالان، سعيد متين پور-لار و استاديوملاردا يوزمينلري بير
يئره توپلاشان، آذربايجان گنج لي ييني،
"پانتورکيست" آدلانديرانلارين؛ قارا دوشونجه لرينه نه ميلتيميزين ايچينده يئر وار نه ده ميللي
حرکتيميزين سيرالاريندا !
ميللي
حرکت زامان زامان گوجلنديکجه و "سعيد"لر کيمي يئني گنج و يئتگين
کادرولاري اؤز ايچيندن يئتيشديرمکله بو حرکاتي اساس مقصدلريندن جايديرماغا
چاليشانلارا ايمکان وئرميه‌جکدير!
حاق سئل
کيمي دريايه آخيب يول تاپاجاقدير
داش
آتماغيلا کيمسه اونو دوندره بيلمز.
دونيادا
قارانليقلار اگر بيرلشه باهم.
بير
خيرداجا شمع-ين ايشيغين سوندوره بيلمز
جواد
قازانلي
04.07.2012
(بو مٶوضوعدا
منيم قاباخلاردا يازديغيم ايلك مقاله ني آشاغيدا نقل ائديرم)
گؤنئی
آذربایجان ملی حرکتینین گوجو و اونون قارشیسیندا اولان مانعه لر (1) ــ جواد
قازانلي
عزیز سویداشلار!
بورادا یازدیقلاریم
اوزون زامان اؤره گیمده ییغلان و منی همیشه ناراحات ائدن فیکیرلر و دوشونجه لردیلر.
منی راحات سیز ائده ن بو فیکیرلر، سون ایللرده میللی حرکتیمیزده باش وئرن بعضی
حادثه لر دیر کی بو یازی دا اونلارا توخونماق ایسته ییره م.
بیر چوخ یاشلی
لاریم کیمی منده بهمن اینقلابیندا یوزلر و مینلر گنج ایله بیرلیک ده اؤز تاریخیمیزی
و میللی کیملیگیمیزی بیلمه دن و آذربایجان میللتینین باشینا گلن فاجعه لردن خبر سیز
بیر حالدا، مارکسیسم - لنینیسم بایراغی آلتیندا دونیا خالقلارینین آزادلیغی اوچون
موباریزه میدانینا آتیلدیق. یانی دئمک ایسته ییره م کی بیز او زمان لاتین آمریکادا،
کوبا و نیگاراگوادا گئده ن مبارزه نی یاخیندان ایزله دییمیز و بو خالقلارین آزادلیغی
اوچون ده ریده ن چیخدیغیمز حالدا، بیلمیردیک کی آرازین اوتاییندا کومونیزم آدینا
آذربایجان تورکلرینه دیوان توتولوردی. بئله لیک له تانیمادیغیمیز و آنجاق آدلارینی
ائشیتدیییمیز خالقلارین حاقلاری اوچون ائله باغیریردیق کی اؤز های- کویوموز حسین
جاویدلرین، احمد جاوادلارین، الماس ایلدیریملارین، مشفقلرین و یوزلر بئله انسان
سئور و عدالت پرور شاعیر و یازیچیلاریمیزین حاق سسلرینی ائشیتمه یه مانع اولوردو.
چوخ اورک
آجیسیله دئمک ایستردیم کی بیز کومونیزم ایدئولوﮊی سی اوچون چکدیگیمیز زحمتلرین، بو
یولدا آپاردیغیمیز فداکارلیقلارین و وئردیگیمیز قوربانلارین یوزدن بیرینی بئله میللی
آزادلیق مباریزه میز اوچون حصر ائتسیدیک ایندی آنامیز آذربایجانین ایکینجی پایتختی
اولان تبریزین گؤیلرینده آذربایجانین میللی بایراغی دالغالانیردی.
عزیز یورداشلاریم!
منیم
دوشونجه مه گؤره گونئی آذربایجانین میللی حرکتی هئچ واخت ایندیکی قدر محتشم و
گوجلو اولمامیشدیر . بو حرکتین ان اؤنملی جهت لرینده ن بیری اونون ئؤنونده گئدن
قاباقجیل اویرنجی لریمیزین ملی فعالیت لرینده ن عبارت دیر. آیدین و ساغلام فیکیرلره
مالیک اولان بو قهرمان اویرنجیلریمیزین فعالیتی، میللی موباریزه میزه گوج و عزت
وئرمیشدیر. بو قهرمان ضیالی لاریمیز قورخمادان و یالنیز ملتینین گوجونه اینادیقلاری
اوچون خالقیمیزین دوشمانی اولان پان ایرانیست و فارس شوونیست لرینین جانینا قورخو
سالمیشدیلار. ملی حرکتیمیزین دیگر اؤنملی جهت لرین ده ن بیری ده مختلف دوشونجه لره
مالیک اولان ملی مباریزلریمیزین بیرگه حرکت ائتمه لرینده ن عبارت دیر.
ائله بونا
گؤره ده ملتیمیزین دوشمن لری بونو یاخشی باشا دوشوبلر کی آذربایجانین میللی حرکتینین
قارشیسینی نه زیندان، نه ایشکنجه و نه ده سورگونلرله آلماق اولماز. البته بو او
دئمک دئییل کی آذربایجان میللتینین قاتی دوشمانی اولان فارس شوینیزمی الینی- الینین
اوستونه قویوب گؤزله یه جک دیر. خیر اونلار آذربایجانین میللی موباریزه سینین قارشیسینی
آلماق اوچون هر تورلی حیله لره ال آتیب و گله جک ده ال آتاجاقلار. فارس شوونیزمینی
تمثیل ائده ن اسلام جمهوری سی، ملی مباریزلریمیزه قارشی زیندان، ایشکنجه و
سورگونلرده ن باشقا مختلف حیله لر و وسیله لرده ن ده فایدالانیر. من بورادا بو حیله
لرین بیر نئچه سینی قیسسادا اولسا آد آپاریب و آچیقلاماق ایسته ییره م:
1- آذربایجان
میللی فعالارینین آراسیندا تفرقه سالیب بو حرکاتی پارچالاماق و بئله لیک له ملی
فعاللاریمیزی بیر– بیرلرینین قارشیسینا قویماقلا حرکتیمیزی ایچینده ن ضعیفلندیرمک.
2- آذربایجان
میللی حرکاتین آدینا یالانچی سیاسی تشکیلاتلار یاراتماقلا بو حرکاتی دوزگون یولدان
چیخارماق.
3- آذربایجان
میللی حرکتین آدینا ساختا اینترنت سایتیلاری یاراتماق.
4- آذربایجان
میللی حرکتی نی کومونیستی تشکیلاتلارا او جمله ده ن فدائی تشکیلاتلارینا قویروق
ائله مه گه چالیشماق.
5- و نهایت
فارس شوونیزمینیه آذربایجان دونو گئییندیرمک له «جنبش آذربایجان برای یکپارچگی و
دمکراسی در ایران» کیمی ساختا تشکیلاتلار یاراتماق.
وطن پرور
آذربایجانلی لار!
بوگون میللی
آزادلیق حرکتینین ان اؤنملی شعارلاریندان بیری بیرلیک دیر. گوجلو و تپه ده ن – دیرناغا
کیمی سیلاحلانمیش دشمنه قارشی یالنیز بیرلیک سیلاحیله غلبه چالماق اولار. ائله
بورادا بویوک مباریزیمیز عباس بی لیسانی نین بو حاقدا سویله دیگی بیر سؤزو گتیرمک
ایسته ییره م. او دئییر کی: « بیزه بوگون کی قورتولوش مباریزه میزده هر شئیده ن
اؤنجه بیرلیک لازیمدیر.» لاکن عباس لسانی نین بیرلیک ده ن مقصدی هر بیر ساتقین ایله
بیرلشمک ده ن عبارت دئییل. او سؤزلرینین دوامیندا دئییر کی: « آمما نه جور بیرلیک؟
کیملریله بیرلیک؟» و نهایت ملتینی آییق سالماق اوچون دئییر کی: «آنجاق اونو دا
اونوتمایاق کی ساده جه بیرلیک نامینه ساتقین و مانقورت اولانلاریله و میللی حرکته
خیانت ائده نلریله امکداشلیق ائتمک میللی حرکتیمیز اوچون بویوک بیر تحلوکه ده اولا
بیلر.»
حؤرمتلی
باجی- قارداشلاریم!
ائله منده
عباس بی لیسانی نین بو فیکرینه قوشولاراق بیر داها دئمک ایسته ییره م کی بو گون میللی
مبارزه میزده ملتیمیزین منافعی اوغروندا مبارزه ائده ن بوتون تشکیلاتلارین بیرلشمه
سی شرط دیر. بیلدیینیز کیمی آذربایجانین میلی مباریزه تاریخینده فاجعه لی صفحه لر
چوخ اولوبدور. اگر بیز کئچن یوز ایلده گونئی آذربایجاندا باش وئره ن میللی قیاملاری
دیقت ایله ایزله سک، گؤره ریک کی ساپی اؤزوموزدن اولان فارس شوونیزیمینه بالتا
اولان ساتقینلارین آذربایجانین میللی قیاملارینین مغلوبیتینده روللاری هئچ ده آز
اولمامیشدیر. بونلارا قارشی بوتون وطن پرور آذربایجانلی لارین بیرلشمه سی چوخ
اؤنملی دیر.
آذربایجانین
مبارز قووه لری!
بیرده کی
فارس شوونیزمینی تمثیل ائده ن اسلام جمهوری سینین اطلاعات اداره سی نین آگنت لری و
بو رژیمین اوزده ن ایراق بعضی اوپوزیسیون تشکیلاتلاری، حرکتیمیزه قارشی یالانچی
اورگانیزاسیونلار و انترنت سایتیلاری یاراتماقلا گونئی آذربایجاندا گئدن میللی
مبارزه نی دوزگون یولدان آزدیرماغا چالیشیرلار. اونلار ملتیمیزه هئچ قیمادان گونئی
آذربایجان شهرلرینده برپا اولونان بعضی توپلانتی لاری و حتی معین یوروشلری اوز
منافعلری اوغروندا ایستفاده ائتمگه چالشیرلار.
ان آجیسی
بودور کی ائله بورادا دا فارس شوونیزمینین بالتاسینا ساپ اولان، قانی و ده ریسی بیزده
ن اولان آمما اؤزگه دییرمانینا سو توکن مانقورت لانمیش ساتقینلار، بو چیرکین عمللر
اوچون فارس شوونیزمینین ال آلتیلارینا چوریلیرلر.
ای اولو
وطنیمین فداکار گنج لری!
بوتون
بونلاری نظرده آلاراق گره ک بیز تاریخده ن درس آلیب بو گونکی گونئی آذربایجانین میللی
مبارزه سینده فقط میللی قورتولوشا گئده ن یولا صاحیب چیخیب و بیلمه لییک کی بوگون
گونئی آذربایجاندا گئدن مبارزه کئچمیش یوز ایلده باش وئرمیش قیاملارین دوامی
اولدوغو حالدا، اونلار ایله فرقلی دیر.
بو گون
گونئی آذربایجاندا گئده ن مبارزه، سؤزون اصل معناسیندا میللی قورتولوش مبارزه سیدیر.
و میللی قورتولوش مبارزه ده، "میللی استقلال " دئمک دیر. بو مبارزه ده بیزیم
وظیفه میز یانلیز اودورکی بو حرکتی ساغا و سولا چکمده ن، اونون ماهیتینده ن دوغان
گونئی آذربایجان میللی قورتولوش یولونا صادیق قالیب، فارس شوونیزمینه، اونو تمثیل
ائده ن و ملتیمیزی اسارت ده ساخلایان اسلام جمهوری سینه غلبه چالانا قدر، بو
مبارزه یه دوام ائده ک.
