تك توران : بیزیم وطنیمیزآذربایجان ، آنا دیلیمیز آذربایجان تورکجه سی دیر.
داها هر کیمسه یه
آیدین دیرکی ، گوُنئی آذربایجاندا گوجلئنمئکده اوُلان میللی آزادلیق حرکاتی ،
وطنیمیزی و میللتی میزی فارس راسیسمی نین 90 ایللیک مستعمره سیندن قورتارماق و
میللی موستقیل آذربایجان دوُولتین یارادماقدیر.
بوهدف اساسیندا یارانمیش یئنی میللی
حرکتیمیز، ایلک یاراندیقی گوندن آسیمیله ائدیلمیش میللتیمیزین " بئس من کیمم " سئوالینا جاواب
اوُلاراق ، داخیلده و خاریجده مجادیله ائدن میللی تشکیلات لاریمیز وآیدین ضیالی
شخصییت لریمیزین سونسوز تلاش لاری نین نتیجه سینده ، بو گون آذربایجانچیلیق و تورکچولوگ مفکوره سی
میلتیمیزین آمالینا چئوریلیب و اونون شعوروندا اوُزونه لایق اوُلان یئرین آچیب و
آچماقدادیر. اوُیانیش چاغیندا باشلانمیش میللی حرکت کئچمیش 90 ایلین آجی تجروبه
لرین نظرده توتوب اوُرنک آلاراق ، آزادلیق یولوندا قانلاری توُکولن آتا ـ بابالاری
میزین بوُیوک ایده آل لارینا موثبت سئس وئرمئکله اوُنلارین باشلایغلاری یوُلو داها
کئسگین ایراده ایله داوام وئرمئک و سوُنا چاتدیرماق قرارینا گئلمیشلر . بونا گوُره
ده بوگونکو حساس و اوُنئملی پروسئسده ، داخیلده و خاریجده فعالییت ائدن گروپلارین،
تشکیلاتلارین ، آیدین ـ ضیالی شخصییت لریمیزین قارشی سیندا آغیر، تاریخی ، میللی
وظیفه لرقرارتوتوب . حساس شرایط نئدنیله بو وظیفه لرین أن باشدا گئلئنلریندن بیری
داها آرتیق تشکیلات لانماق ، بیرلئشمئک ، و دوشمان قارشیسیندا تک بیر یومروقا
چئوریلمئکدیر. بونا گوره ده بوُیوک هدفیمیزه گئدن یولون قارشی سیندا مانع لری آرادان
قالیرماق اوچون بوتون شخصی سلیقه لریمیزی بیرطرفه بوراخیب ، بیرگه اوُلوب
بیرلئشمئکدن باشقا آیری یوُلوموز یوخدور. بیرلیگی یارادماق اوچون ، ایلک باشدا
بیرلیک دوشونجه سی فیکرین صداقت له درک ائدیب اوُنا اینانماقمیزلازیم دیر.
بیرلیکده حرکت اتمئگین حقیقی معناسین درک ائده بیلمه ین کیمسه لروارسا لاردا ،
اصلینده میللی مسئله نی درک ائده بیلمه دیکده ، اوُزیالنیش داورانیش لاری ایله
تشکیلات لاریمیزین وحدتینه ، بیرلئشمه سینه بویوک ضربه لر ووردوقلاری حالدا ، شخصی
باخیشلای ایله اوُزلرین حاقلی ساییب ، نتیجه ده مشترک دوشمانیمیز اوُلان فارس
راسیسمی نین سئوینجینه سبب اوُلورلار.سیاسی ـ ایجتیماعی فعالییت لرده أن اوُنئملی
مسئله لردن بیری ، تشکیلات داخیلیده فیکیرو عمل بیرلیگی ایله یاناشی اینسیجاملی
دیسیپلینین اوُلماسی دیر، اینسیجامین ، دیسیپلینین اوُلمادیغی حالدا هرج ومرج
یارانارو نتیجه ده فرصت لرین تلف اوُلماغی ایله حرکت ضرر گوُرئر.
اگرتشکیلات لارین ، شخصییت لرین اوُرتاق هـدف و آرزولاری میللتیمیزین ،
وطنیمیزین آزادلیغی ، قورتولوشو دورسا ؛ بو دوشونجه نی درک ائدیب منیمسۀ میشلرسه ؛ اوحالدا یاراشمییان یونگول حرکت لردن ،خودخواهلیق
لاردان، فیکریمیزی ، دوشونجه میزی تمیزلئیب ، آزاد ائدیب قورتارمالییق جهد و تلاش
ائدیب کئچمیش عمللریمیزه یئنیدن باخمالییق ، حرکتیمیزی بیرلیک یولوندا نظمه سالیب هماهنگ اتمئلییک . آیدین دیر کی تشکیلات
لار ایچینده قارشیلیغلی ساغلام و موثبت اینتقادلارین نه اینکی هئچ بیر ضرر یوخدور ، بئلکه همان تشکیلاتین داها آرتیق ساغلام حرکت
اتمه سینه یاردیم ائدر، عکسینه اولاراق یئرسیز داغیدیجی ، غرضلی اینتقادلاردان
اوزاق دورمالییق ، میللی حرکت ده بو گونه قدرآشاغی ـ یوخاری بیرلیکده اوُلان لار و
یا بوندان سونرا بو حرکته قوشولوب
بیرلیکده اوُلماق ایسته ین لرین ظاهیری گوُرونتولری اساسیندا قضاوت اتمئک
اوُلماز، بئلکه ده اصیل مسئله اوُنلارین میللی حرکت حاققیندا نئجه دوُشوندوکلری و
موقع لرینین نه اوُلدوقو اوُنئملی دیر.
هربیر میللی فعالین بیرلیگ مسئله سینه موثبت یاناشان و اوُنوحمایه ائدن
دوُست لاریمیزا درین حوُرمت اتمئگیمیز چوخ اونئملی دیر، بعضی دوست لاریمیزدا وارکی
میللی مسئله نی صداقت له درک اتدیکلری حالدا ، هرهانسی سبب لر نئدنیله مجرّد حرکت
اتمئک یولون سئچمیشلر، و عینی حالدا گوجلو میللی دوشونجه لری اوُلدوقو اوچون
شوینیسمه قارشی کئسگین شئکیلده مجادیله ائدیرلر.
بیز بو
دوستلاریمیزا چوخ حورمت له یاناشاراق ، مجرّد حرکتین ضررلرین قئید اتمئک و
بیرلیکده فعالییته باشلاماقیمیزین ضرورتی وگوجلریمیزین بیرلئشمه سی نین خئیرلرینین
نه قدراوُنئملی اوُلدوقون خاطیرلاتمالییق . چونکی بوگونکو چاغیمیزدا ایرتباط لارین
سرعتلی اوُلدوقون نظرده آلاراق ، خاریجده اوُلان تشکیلاتلارین وحدتی ، گوجلئنمه سی ، شوبهه سیزکی داخیلده هرگون چئشیدلی تهلیکه لرله
قارشی قارشییا اوُلان و بوغونتولوشرایطـده
سینه گریب مبارزه ائدن میللی فعاللاریمیزین احوال و روحیه لرینده بوُیوک
موثبت تأثیرلر بوراخار. عکسینه اوُلاراق بیزیم یالنیش حرکت لریمیز داخیلده اولان
اوُیانمیش یئنی گئنج نئسلیمیزی ده مأیوس ائدر. باشقا اوُنئملی مسئله لردن بیری ده
دوُنیا گونده لیگینده باش وئرن اوُنئملی حادیثه لری دیققت له و باجاردیقیمیز
قدراوُخویوب تحلیل ائدیب ، یازیب توپلومون ایختیاریندا قویماق لازیم دیر، خصوصی
ایله دائمن آکتیو اوُلان ایران و اورتا دوغودا جریان ائدن گرگینلی حادیثه لری
گونئی آذربایجانین میللی حرکتینه تأثیرلری باخیمیندان تحلیل اتمئک لازیم دیر ،
بئله لیکله گئنیش باخیشلی یازیچیلاریمیز و یورومچو کادرلاریمیزین یارانماسینا زمین
یارانار.
زامان سرعت له کئچمئکه دیر. بوُلگه ده هرگون یئنی حادیثه لرباش وئریر و
دورمادان قانلارآخیر، تهران فاشیست رژیمی اوچوروما دوغرو یاخینلاشماقدادیر ، روس ،
چین و بعضی حیله گر ، غارتگر آوروپا ایمپریالیست لری اوُز منافع لرین تهلیکه لردن
قوروماق اوچون ، قدارلیقلا ، جوربه جور حیله لرله تهران رژیمی وسوریه ده اسد رژیمین
اوچورومدان قورتارماق اوچون مذبوحانه و شیطانی تلاش لار ائدرکن . بیرطرفدن ظاهیرده
موللا رژیمین غینایب ، سیخیشدیرسالاردا ، باشقا طرفدن غارتگرلیک لری نین
اوُرتاقلاری اوُلان تهران موُللا لارین یاخین گئله جئکده باشلاناجاق عصیان
فیرتینالاریندان جانلارین قورتارماق اوچون گیزلی ده، بوُیوک قانلی سیاسی و
آلدادیجی اوُیونلار حاضیرلاماقدا دیرلار. موللا رژیمی نین جیناتکار ، اوُغرو
باشچیلاری نین وارلیغینا زامان قازاندیرماق و بیر داها حیله گرلیک له یاشادماق
اوچون اسکی یانمیش رسوای اوُلموش اوُغرو
مهُره لری « رفسنجانی ، خاتمی ، موسوی ، کروبی ، ولایتی ، ریضائی ، توکلی و
بیر چوخ أللری قانلی موللا ، پاسدار شکنجه گر قاتیل لری ... » گئله جئگ اوچون
حاضیرلاماقا باشلامیش لار .
بو ناگوره ده باش وئرجئک بئله توطئه لری نظرده توتاراق ، داخیلده و خاریجده
اولان میللی تشکیلات لاریمیز، فعال شخصییت لریمیز هرزاماندان داها آرتیق آییق ـ
ساییق اوُلمالی و بولگه ده باش وئره جئک
هر بیرحادیثه نی تحلیل ائدیب ، یازیب
توپلوما چاتدیرمالی دیرلار .
یاشاسین بیرلیک، یاشاسین آذربایجان ـ گونئی
آذربایجان سوسیال دمکرات پارتیسی طرفیندن
13/ 7 / 2012
