ظولمه قارشی، عصیان ــ حسن جداری

تك توران : مین جان اولا، جانانیمه قربان ائده رم من

قربان او گوزل گوزلره، مین جان ائده رم من

بو عشوه کی وار سنده، یقین کیمسه ده اولماز

او شوخ باخیشین وصفی نی، هر آن ائده رم من

ایل لردی کی مین حسرتیله، یارید ن آیری

هجران گئجه سی، ناله و افغان ائده رم من

ساللام یادا گول چهره سینی، نازلی نگارین

هر دم کی چئخیب ،سیر گلستان ائده رم من

گوز یاشیم عیان ایلیری، گیزلینده کی سری

اسراریمی بی جا یئره، پنهان ائده رم من

عمروم یوزه ده چاتسادا، لاپ سون نفسیم ده

ظالم لره قارشی، گینه عصیان ائده رم من

ال بیر اولارام فعله لر ایله،قارالار لا

ظولمین ائوینی گور نئجه، ویران ائده رم من

قان آغلیری بو ئو لکه بوتون، شیخین الیندن

دنیایه اونون ظولمونی ، اعلان ائده رم من

بو یئرده، بو گون، مین جوره تبعیض و ستم وار

بو ظولم لری، بیر بیره، عریان ائده رم من

قدرت ده کی بویئرتیجی حاکم لره، قارشی

خلق ایچره اولان نفرتی، عنوان ائده رم من

شیخ ایله، فقیه ایله،چتین قانلی ساواشدا

مشکل لری، تدبیر ایله، آسان ائده رم من

بیرگون گوره سن، شیخی دوتوب، ال قولی باغلی

چوخ خفت ایله، داخل زندان ائده رم من

اشرافین الیندن آلارام، ثروتی، مالی

یوخسول لاری، سر کرده اعیان ائده رم من

آباد ائدرم خلقین الیله، بو دیاری

بو ئولکه نی، بیر باغ و گلستان ائده رم من