بوتؤو آزربایجان تورک جمهوریتی مفکوره سی و قارشیسینداکی دوشمانلار ــ علي زنگانلي

تك توران : تاریخ بویو سییاسال و توپلومسال حرکت لرین باشلانقیج نؤقطه سی، قوشقوسوز کی اولکولر و ایده آل لار اولموشدور.محض بو آچیدان آزربایجان میللی حرکاتینی اینجه له مه یه قالخارساق اگر، میللی تورک کیملیگی اوزه رینده قورولاجاق اولان بوتؤو آزربایجان دئولتی، گونئی و قوزئی آزربایجان میللتچی لری طرفیندن منیمسه نمیش اولان سیاسی بیر ایده آل دیر. بو اولکو و ایده آل، تاریخیمیزین قارانلیق درینلیک لرینه دؤنوب باخمامیزین و آجی دنه ییم(تجربه) لردن درس آلیب گلجه یه باخیش آچیمیزین دوغال بیر اورونودور(محصولودور). چاغداش دؤنه م دن بویانا روس و فارس سؤمورگه سی آلتیندا اینیم اینیم اینله یه ن مظلوم میللتیمیز، چئشیدلی سییاسال، توپلومسال، تاریخسل و کولتوره ل هجوم لارا معروض قالاراق، نه یازیق کی اونون بونون گودومونده اولان و باشقالارینا حیزمتچی کیمی گؤرونه ن بیر میللت اولاراق قبول گؤرونمه کده دیر. طبیعی کی بو دورومون گئرچه ک له شمه سینده، روس و فارس سؤمورگه سینین یانی سیرا، یئره ل(بومی) مانقورد ایش بیرلیکیچی لرین ده اؤنه م لی پایی اولموشدور. سؤسوز کی روسلار و اونلارین یول آرخاداشلاری اولان فارسلار، تورک میللتینین وارلیغینی هر زامان اؤز میللی منفعتلری اؤنونده بیر انگل کیمی گؤرموش و بو انگلی آشماق اوچون هر طورلو کیرلی(بیزیم آچیمیزدان) سییاسته ال آتمیشلاردیر. قوتسال وطنمیز اولان آزربایجانی ایکییه بؤلوب هره سی بیر تایینی قوشاتماقلا سؤمورمه ک، اونلارین ان چیلپاق و گؤز اؤنونده بولونان سییاستلری دیر. بو ایکی ازلی و ابدی دوشمانلاریمیز تکجه بو چیلپاق سییاستلرله یئتینمه ییب، میللتیمیزی آرازین هر ایکی تاییندا میللی کیملیک، دیل و کولتورده ن بوشالدیب ساختا و اویدوروق کیملیگی میللتیمیزه قالیب ائتمه ک دن ده چکینمه ییب لر. تام ایشین بو بویوت و آشاماسیندا اؤز میللتیمیزدن اولان یئره ل مانقورد ایش بیرلیکچی خائینلرین رولو، روس و فارس طرفیندن قییمتلندیریلمیش، اونلارا ده یر وئریلمیش و میللتیمیزه آیدین دوشونجه لی و مترقی شخصیت لر کیمی سونولموشلاردیر. گونئیده و قوزئیده، احمد کسروی، تقی ارانی، رامیز مئهدییئو و حیدر علییئو کیمی آنتی تورک اینسانلارین اولوشماسینی، ساده جه بو پروسئس ایچینده ده یه ر لندیرمه ک اولار. بو اینسانلار فارسین و روسون قوردوغو توزاقلارا دو شه ره ک، گونئیده آذریچیلیک، قوزئیده ایسه کلاسیک آذربایجانچیلیقلا مشغول اولاراق، اؤز میللتلرینه تهلوکه لی خیانتلرده بولونموش و فارس و روس اربابلارینی سئویندیرمیشلردیر.

آزربایجان میللی حرکاتی ایسه، تام ترسینه بو تاریخی خطالاردان درس آلیب، محمدامین رسولزاده، محمدتقی زهتابی و ابوالفضل ائلچی بی کیمی اولو اؤنده ر لریمیزین جیزدیغی یولو رهبر توتاراق، آزربایجان مرکزلی تورکچو دوشونجه نی، اؤز یول خریطه سی کیمی ده یه ر لندیرمیشدیر. میللتمیز ده بو اورتامدا هارای هارای من تورکم و یاشاسین آزربایجان کیمی سلوقانلاری ایله بو یولون قیرمیزی جیزگیله رینی بلیرله میش، حرکاتیمیزین آنا تملله رینی اونایلامیشلاردیر. دوغال اولاراق دا ساده جه و ساده جه میللی تورک کیملیگیمیزدیر کی میللتمیزه غرور و اونور قایناغی اولموشدور. دونیانین باشقا اویقار میللتلری کیمی بیزیم میللتیمیز ده بوزقورد سیمبولوندا تاریخی بیر توتئمی منیمسه یه ره ک، اؤز تورکلویونه صاحیب چیخیب ساواش روحونو گنج اینسانلاریمیزا ایله تمکده دیر. اویدوروق آذریچیلیک و ایچی بوش کلاسیک آذربایجانچیلیق بو میللته غرور و اونور منبعی کیمی اولابیلمه دی و ذاتا اولامازدی دا. میللتیمیز بونو دا بیلیر کی تورکلوک بیلینجینه صاحیب اولمایان بیر آزربایجانلی، اؤز توپراغینا دا، وطنینه ده صاحیب چیخابیلمه ز. نئجه کیم، علییئو سلطنتینین قاراباغ قونوسوندا اولان توتومو و ائیله م لری بو گئرچه یین  سوموت بیر اؤرنه گی دیر. هرکس بونو بیلمه لی دیر کی آزربایجان توپراقلاری یالنیز اولو تورک میللتینه عاید اولان توپراقلاردیر و آزربایجانلیلیغی تورکلوکده ن آریندیرما پئشینده اولانلار دا بیلمه سه لر بؤیوک بیر یانیلقی ایچینده، بیلسه لر ده تاریخی و تهلوکه لی بیر خیانته ایمضا آتماقدادیرلار. آیریجا تورکلوک دن آرینمیش اولان آزربایجانلیلیق، آزربایجان توپراقلاری ایچینده یاشایان روس، ائرمنی، کورد و تالیش کیمی آزینلیقلارلا ائشید دوروما دوشمه ک دئمه ک دیر. چوخ ایلگینجدیر کی اونلار اؤزله رینی زامان زامان آزربایجانلی یوخ، میللی کیملیکلری ایله تانیملاماقدادیرلار. سانکی بو توپراقلاردا ساتقینلیق و اونون بونون اویدوردوقلارینا اویماق ساده جه بیزیم اوچونموش کیمی گؤرونمه کده دیر.

سون زامانلاردا دا اؤزللیکله سایبر دونیاسیندا، میللی حرکاتیمیزا یئنیجه و وارداتی ایماژیندا قاتیلان بیر سیرا اینسانلار، اؤزله رینی گونده مه چیخارماق اوچون، روس و فارسین اویدوردوقلارینی یئنیده ن دیریلتمه ک ایسته ییر لر. آیدین دیر کی بو اینسانلار ساده جه دیش اؤلکه لرده میللی حرکاتیمیزلا تانیش اولموش و یاشی کئچمیش اودوزموش روس سئودالیسی سولچولار طرفیندن میللی حرکاتیمیز ایچینه ایته له نمیش آداملاردیرلار. شوبهه سیز کی بو آداملار اؤز آماجلارینا اولاشماییبلار و اولاشمایاجاقلار دا. منجه بونلارین گونده مه چیخماسی حرکاتیمیزا خئییر قایناغی کیمی ده اولدو و بو قونولاردا تئوریک دارتیشمالار حرکاتیمیزین آیدینلیق سوییه سینین داها دا زنگین اولماسینا نده ن اولوب، آیدینلاریمیز ایچینده تورکلویوموزون اؤنه می داها دا وورغولانمیشدیر.

توم بو تثبیت لر دن یولا چیخاراق، بونو دا اکله مه ک گره کیر: آزربایجان میللی حرکاتی خیزلا گلیشیب گوجله ن مه کده دیر. بو گوجله ن مه  ساده جه بوتؤو آزربایجان تورک جمهوریتی مفکوره سی و باغیمسیزلیغی هدف توتوب اونا گؤنول وئره ن گنجلریمیز سایه سینده گئرچه ک له شمیش دیر. بیزیم گلیشیب گوجله ن مه میز سؤسسوز کی بیریلرینین ازبه رینی پوزوب اونلارین راحات اویخولارینا کابوس کیمی اولاجاقدیر. بونلارین ان باشیندا یئنه ده روس و فارس سؤمورگه چی لی یی دورور. اونلار یئنه ده اؤز ایچیمیزدن اولان مانقورد ایش بیرلیکچی لر آراماقدا و اسکی لر کیمی بو یوللا یئنه ده بیزه ضربه وورماق نییتینده دیر لر. بونون قارشیسیندا ساده جه بیزیم اویانیق اولمامیز و اولایلاری دیققتله ایزله مه میز گره کیر. دویغوساللیغا یول وئرمه دن و پروووکاتیو ائیله م لره یئنیک دوشمه دن، اولایلار قارشیسیندا حاضیر بولونمامیز سون درجه اؤنه م لی بیر فاکتوردور.

بو قاپسامدا بللی دیر کی حرکاتیمیز ایچینده و فعاللار آراسیندا فرقلی دوشونجه لر حاکیمدیر. چوخونلوقدا اولان ایستیقلالچی فعاللاریمیزلا بیرلیکده، سولچو روسچو فئدرالچیلار دیشیندا، فئدرال یاپیدان یانا اولان و میللی تورک کیملییمیزه گؤنول وئره ن، سایغین اینسانلاریمیز دا بولونماقدادیر. بو آرادا چوخ حؤرمت دویدوغوموز سایین مئهران باهارلی کیمی چالیشقان و تورکلویوموزه گؤنول وئره ن یازاریمیزین ایران آدلانان اؤلکه نین باشقا یئرلرینده بولونان تورک توپلولوقلاری اوزه رینه آراشدیرمالارینی بهانه توتاراق، اونو ایرانچی دئیه خطاب ائتمه ک، آذریچی دوشمانلاریمیز طرفینده ن یئنی بیر حربه کیمی ایستیفاده اولونور. اونلار بو چیرکین اتهاملاری ایله باشقا میللی فعاللاریمیزی دا تورکلوک بیلینجینه اؤنه م وئردیکلری اوچون بؤیوک و کومیک بیر ساختاکارلیقلا ایرانچیلیغا متهم ائدیرلر. اویسا ایشین ایلگینج طرفی بودور کی ایران و فارس فاشیزمی هر زامان بیزی بو آذریچی قارداش باجیلاریمیز کیمی آذری و آذربایجانی کیمی آدلارلا مخاطب توتماقدا اصرارلیدیرلار. بو آذریچی قارداش باجیلاریمیزین میللت و وطن آددا بیر دردلری یوخموش ذاتا و فارس فاشیزمی کیمی آذریچیلیک یاپماقلاری ایله میللتچیلریمیز گؤزونده دوشمان جبهه سینده یئر آلماقدادیرلار. آیریجا روس و فارس سؤمورگه سی و اونون یئرلی ایران و روسیا سئودالیلاری دا بیلمه لی دیر لر کی بیزیم وطنیمیز آزربایجان، میللتیمیز تورک، دیلیمیز ایسه تورکجه دیر. بو یولدا هر نه باهاسینا اولورسا اولسون، هئچ بیر تاویز وئرمه دن و توم قرارلیلیقلا بوتؤو آزربایجان تورک جمهوریتی اوغروندا یورومه کده ییک، ساواشماقداییق.