ملانین جوری ،مکری، حیله لری ــ حسن جداری

تك توران : منبر اوستونده، ملا طایفه سی

میلته، مین جوره یالان دئدیلر

بینوا خلقی تا کی توولیه لر

دنیادا هر نه وار چاخان، دئدیلر

چوخ یالان سوز لری، یازیق خلقه

شیخ وملای شارلاتان، دئدیلر

قولاق آس، گور نئجه یالان سوزلر

خلقه، ملا و روضه خوان، دئدیلر

«وئرمیون ای جماعت اسلام

نفس اماریه، امان، دئدیلر

آز گوناه ائیلیون، بیر آز قورخون

گه لیری صاحب الزمان،دئدیلر

گئجه، گوندوز، حسینه آغلیه نه

باغ جنت ده وار، مکان دئدیلر

وئریب اله، بهشتی ،شیعه لره

یاناجاق اود دا ،کافران دئدیلر

کاسیبا، پول سوزا او دنیاده

یارانیب عیش جاودان، دئدیلر

گورون او دنیانین، تداروکینی

کیمدی بو دنیادا قالان، دئدیلر»

نئچه یوز ایل دی، روضه خوان لاریمیز

آغلادیب خلقی، چوخ یالان دئد یلر

ائشیدنده منیم بو سوزلریمی

قورخوسوننان قویوب قاچان، دئدیلر

ملا یه، شیخه، چوخ دولاشما، داداش

سانجار اینسانی بو ایلان، دئدیلر!

یوم گوزون ، گورمه ، دینمه، دانیشما

ملا هر سوزدئسه ،اینان دئدیلر!

دقت ائت روضه خوانلارین سوزونه

واردی حکمت بو سوزده،قان، دئدیلر

یا قبول ایله، ملانین سوزونی

نار محنت ده یاکی یان، دئدیلر

ایندی ایراندا ملا حاکم دور

ملا دان قورخ بیر آز،اویان، دئدیلر

ئولدورللر سنی، بو ظالم لر

حق سوزی ایلمه بیان، دئدیلر

دفتریندن بو شعری دورتئز، سیل

چوخدا توند گتمه، دور ،دایان، دئدیلر

ملانین خلقه قارشی ظولمیندن

بیر بئله یازما داستان، دئدیلر

قور خاق اینسانلارین جوابیندا

دوز سوزی، خلق قهرمان، دئدیلر

بو قارانلیق گئجه باشا چاتاجاق

گله جاق آیری بیر زمان، دئدیلر

ملانین جوری،مکری، حیله لری

چون اولوب میلته ،عیان، دئدیلر

ملا، خلقین قانین توکنده یئره

خلق اونا، ییرتیجی قابان،دئدیلر

نیفرتی چوخدی ملادان، خلقین

بس کی خلقه، یالان پالان دئدیلر