اورموسئچگیلرینده کورد آدایین قازانما ندنی - آتیللا آغا اوغلو

تک توران : ایرانداکی 9-نجو میللت وکیلی سئچگیلرینین ان حساسی،قوشوقوسوز اورمودا کئچیریلدی،بونو اونملی اولماسینین ندنی بولگه نین دئموگرافیک یاپیسیندان آسیلیدیر.
بیر شهرین اوندا بیر نوفوسونو کورد اولوشدورمادیغی یئرده قازانان اوچ آدایدان بیر کورد اولماسی دوغال اولاراق تورپاق قایغیسی اولان هرکسین اوزللیکله میللی فعاللار آراسیندا بویوک بیر اوزونتو و خیال قیریقلیغینا ندن اولدو؛رئژیمین بو اولایداکی رولون بیر یانا قویارساق منجه بو اولایی اوچ بویوتدا آراشدیرماق و اینجه له مک اولار:

1-میللی فعاللارین سئچگی یه باخیشی

2-میللی فعاللارین قارشیلیقلی ایلیشگیلری

3-میللی فعال-کوتله(توده)ایلیشگیسی

4-کوتله نین سئچگی لره تئپکیسی

اورموداکی کئچن 2دونم شورا و مجلیس سئچگیلرینه باخارساق میللی فعاللارین سئچگیلره اولوملو یاناشمالاری و آکتیو اولمالاری سئچگیلرین سونوجونو ائتکی له یه جک قدر بلیرلی اولوبدور،اورموداکی فعاللارین سئچگیلره یاخلاشیمی ایلک اونجه کوردون سس گتیرمه مه آماجلی سونرا اورتامدان میللی چیخارلاریمیز اوغرونا یارارلانما سیاستین داشییب،یانی اورمودا گونئی آذربایجانین باشقا شهرلرین عکسینه قاتیلیمدان یانا بیر سیاست یورودولوبدور،و هئپ اولوملو و میللی چیخارلار آغیرلیقلی آماجلارا اولاشیلیبدیر؛اورنه یین کئچن دونه میللت وکیلی سئچکیله رینده کی "اورمو آذربایجان سسینین” حیمایه ائتدییی آدایلارین قازانماسی،میللی حرکتی اورمودا بلیرلییجی و ائتگن بیر سیاسال دئنگلم قونومونا گتیرمیشدی. آما بو دونه چوخلو میللی فعاللار بیر یاندان شهرین تحریمدن یانا اولدوغو آغیر فضادان ائتکیله نه رک تحریمی ساوونوب(مودافیعه ائدیب)کوتله آراسیندا یایاراق،باشقا یانداندا یانلیش بیر ذئهنیتله کورد آدایینی مجلیسه دوولت وریندن یول وئریلمه یه جه یینی،بو شهردن کورد چیخماز گوروشونو  ساوونوب بو دوشونجه نی خالق آراسیندا یاییردیلار.

سون ایکی اوچ ایلدن بری اورموداکی بعضی قوروپلارین داغیلماسی و تانینمیش میللی فعاللارین اینفعالا چکیلمه سی سئچگیلرین سونوجلارینا تاثیرسیز دئییل؛کئچن دونه میللت وکیلی سئچگیلرینده میللی فعاللار آراسیندا اوزلاشما و یاخینلاشما کورد آدایین قازانماماسینا ندن اولماقلا یانی سیرا کئچیجی اولاراق یوموشاق اورتامدان یارارلانیب، کوتله آراسینا گیره رک میللی حرکته مشروعیت قازاندیردیلار.

بو دونه چوخونلوغو اویرنجیلرین اولوشدوردوغو سئچگییه 3-4 گون قالان آلینمیشس سیتاد دانشجوییی،یوخاریدا سوزون ائتدیییم ندنلردن دولایی،اوزلاشما و چالیشما باخیمیندان،کئچن دونه ده کی ائتگی واتموسفری یارادا بیلمه یه رق بلیرله ییجی(تعیین کننده)رولو داشیمادیلار.

کوتله یه گلدییینده بیر یاندان تحریم فضاسینین آغیر اولماسی دیگر یاندان آدایلار آراسیندا ائتیلاف قورولماما ندنی،سسلرین داغینیق اولوب،کانالیزه اولماماسی،سس وئرنلرینده تک رای یا بوش سس قوللانمالاریدا اساس ندنلردن بیریدیر.او حالداکی کوردلر اورمونون اطراف شهرلریندن اوزللیکله سویوق بولاق بوکان و سردشتدن گلیب سورویله سس قوللانیردیلار،بیزلر  ائوده اوتوروب رئژیمدن اوج آلما آماجی ایله سس وئرمه مه دیغیمیزین کئیفین چیخاریردیق،یادا شناسنامه میز موهور یئسین دییه بوش سس قوللانیردیق،بونودا آرتیرمالاییام بیرینجی اولان قاضی پورون سئچگی یه اوچ گون قالان صلاحیت آلماسی،اورمو خالقینین سس وئرمه سینه و تک رای قوللانمالاریندا اونملی یئری وار ایدی،قایناغلارا گوره قاضی پورون دوخسان مینه یاخین سسی تک رای ایمیش!

باتی آذربایجانین کوردلشمه پروژه سینده تمل فاکتور و باش رولچو اولان مرکزی حوکومتی اونوتمایاق،عاغیللارا تاخیلان بیر سورو وار،کورد آدایی عابد فتاح پور کئچن دونه رد صلاحیت اولموشدو،نئجه اولدودا بو دونه صلاحیت آلدی؟نئجه اولودودا اورمویلا بیرلیکده سولدوزداندا کورد آدای سئچیلدی؟رئژیمین کورد آدایین سئچیم صحنه سینه آتاراق نه یی آماجلادیغی آیدیندیر،منجه آرتیغی ایله آماجینا اولاشدی!بوندان بئله اورمونون کوردلشمه سی هیز قازاناراق باشق بویوتلار گئده جک،دوولتی قورولوشلارلا یوخاری یونه تیملره داها چوخ ال تاپمالاری،کوچون هیزلا آرتماسی و ان اونملیسی دعوتسیز قوناقلارین سیاسی اینزوادان چیخیب رسمی اولاراق تانینماسی ان گوزه ووران ائتگیلریندن اولاجاق.

میللی فعاللار،اوزه للیکله اورموداکی فیکیرداشلارمیز بوندان سونرا کورد سورونونا داها آرتیق دیققت گوستریب ایلگیلنمه لری گره که جک،بوگون کورد سورونونا قارشی تکجه سیلاحیمیز میللی حرکتدیر،میللی اویانش بو شهرده نه قدر چوخ گلیشیب کوتله آراسیندا یاییلیرسا،او قدر ده کوردیزه سیاستی گئری چکیلمک زوروندا قالاجاق.باتی آذربایجانداکی سورونون تکجه باتی آذربایجانین سورونو اولمادیغینی ،میللی حرکتین اساس ماراغلاریندان بیری اولوب میللی فعاللارین هامیسینین ایلگیلنمه     گره یینی اونوتمایاق.