تک توران : 1390جی گونش هیجرت ایلینین دوققوزونجو آیینین 21ندن بو گونه دک توتوقلانان قوشاچایلی آذربایجان میللی فعالی "ولی الله ظهرابی" (اوختای)، 15 گون حبسدن سونرا آزادلیغا بوراخیلدی.
101جی جزایی محکمه نین قرار ایله 15 گون توتوقلو قالان اوختای، توتوقلاندیغی گوندن نئچه گون سونرا، 30 میلیون وثیقه و ضامین قویماق شرطی ایله بوراخیلا بیلردی، آنجاق، "منیم هئچ بیر سوچوم یوخدور! ندن وثیقه گتیریم کی؟!" دئیه رک، وثیقه قویماقدان ایمتیناع ائدیب، و نهایت 15 گون توتوقلو قالاندان سونرا بوراخیلدی.
101جی جزایی محکمه نین قاضیسی "عمومی دوزه نی پوزماق" (اخلال در نظم عمومی)، "نیظاما قارشی چالیشماق" و ... کیمی بیر سیرا یئرسیز ایتتیهاملاری اوختایا قارشی سایاندان سونرا، اوختایین قوشاچایلی دوهتور "نصرتی آذر"دن ائتدیغی شیکایتدن واز کئچمک شرطی ایله بوراخیلاجاغینی وورقولامیشدی. آیلار اؤنجه بو دؤهتورون مطبینده، اونلا اوختایین سؤزلری چیخمیشدیر و دؤهتور اوختایی وورماغا قالخمیشدیر کی سونوجدا اوختای بو دؤهتوردن، اوختایی ووردوغو اوچون شیکایت ائدیبدیر. محمکه نین عدالتدن اوزاق یاناشماسی ایله، او دؤهتور آزاد گزرکن، اوختایی 15 گون آزادلیقدان محروم ائتمیشلر، و او دؤهتوردن شیکایت ائتمه یینه گؤره میللی-مدنی چالیشمالارینین بهانه سی ایله اونو توتوقلامیشلار.
اوختای دفعه لرله میللی-مدنی چالیشمالاری اوچون توتوقلانمیشدیر، آنجاق، اؤز میلله تینه قوللوق ائتمکدن و اونون آرمانلارینین یولوندا هزینه وئرمکدن غرور دویاراق، اؤز چالیشمالارینا دوام وئرمکده دیر. قوشاچای شهرینده نئچه کیتاب سرگیسی قوران، و چوخلو کیتاب و جوزوه نی حاضیرلایان اوختای، آذربایجانین چئشیتلی مدنیت ساحه لرینده چالیشیب، چالیشماقدادیر
