ده شيلمكه محتاج بر درد توركياده ايران توركلري نه دن عجملشييور؟ ــ مئهران باهارلی

25 آغستوس ١٣٤٠ روشني

عموميتله توركلك تمثيل ميللري كوسترمه يور. بويومك ايسته ين بر ملت بويله ياكلسه بر يولده قالاماز

بو مقاله ايله بويوك بر يارامزي ده شمك ايسترم: عصرلرجه درينله شه رك مزمنله شه ن يارالر مطلقا ده شيلمه ليدر. چونكه بشقه درلو تداوي ايديله مز: بز، دائما يابانجي بر تابعيتله قارشيميزه چيقان انسانلري توركك و توركلكك فوقنده منطقسز بر حرمتله قارشيلارز. بو، بزم بر قاچ عصرلق خسته لغمزدر.

هر خصوصده يابانجينك ايشني، يابانجي اولديغي ايچون تسريع ايدر و توركك ايشني سورونجمه ده براقيرز. كذا، يابانجيلره خوش كورنمك ايچون اونلره لسانمزله دكل، اونلرن لسانلريله خطاب ايدرز و بو صورتله وطنمزده يابانجيلري كندي طوپراقلرنده ايمش كبي ياشاتيرز. بونك ايچون اونلري شيمارتير و چوق دفعه انلرك حقارتلرينه معروض قاليرز. اجنبي شركتلرينك چيركين استقلاللرندن صرف نظر تورك شركتلريني بيله يابانجيلاشديرمني مناسب كوروروز. نته كيم سير سفائن آبونمان بيلترينك بر يوزي حالا فرانسزجه در.

مليتمزه و حاكميتمزه آغير ضربه لر ووران بو خطالر كافي دكلمش كبي، بر ده وطنمزده توركلرك يابانجي ياشاماسنه تحمل ايدييورز. ٢٣ آغستوس ٣٤٠ تاريخلي وطن غزته سنده "بر عارسزلق نمونه سي" سرلوحه سي آلتنده استانبولده عجم محكمه سي ياشاتمغه چاليشان بر ايرانلينك كستاخانه بر جراتي حكايه ايدلمشدر: غزته نك موثوق معلوماتنه كوره بو ايرانلي، عجم قونسلوسخانه سنك بر اعلاميله عثمانلي بانقه سندن ٢٥، ٣٠ بيك ليرا درجه سنده بر پاره تسلمني ايسته مش، بانقه بر تورك محكمه سنك اعلامي اولمادقجه پاره يي ويره مه يه جكني اخطار ايتمشدر. بونك اوزرينه ايرانلي كوپورمش، تورك محكمه سنه مراجعته تنزل ايتمه يه جكني و بانقه يه عجم محكمه سنك اعلامني طانيته جغني سويلمش و عارسزجه كورولتولر ايتمشدر.

توركياده بولونان ايرانليلر كاملا ايران توركلريندن اولديغي ايچون بو ايرانلينك ده تورك اولديغنه شبهه م يوقدر. مسئله صورتا بر شخصك تربيه سزجه بير طِاشغينلغندن عبارت كورونور. حقيقتده بو حركت، بر قاچ عصرلق خطامزك آغير بر جزاسيدر. دقت بويورولسون: ايراندن چيپلاق چيقوب وطنمزده زنكين اولان بر ايرانلي تورك، مجرد اوته دن بري يابانجيلره كنديمزك فوقنده بر موقع ويرديكمزدن دولايي توركلكني اونوتمش، شيمارمش و صوكره ايران تابعيتنه كووه نه رك وطنمزده حاكميتمزي تحقير اتمشدير.

بر آز مسئله يي ايضاح ايده لم: بن ايراني و ايرانليلري ايي طانيرم. ايرانك ايسته ديككز يرينه كيديكز، اوراده هر شئدن اول قطعي بر انقراضك علامت فارقه سي اولان بويوك بر ديلنجي كتله سي كورورسكز. بالخاصه ايرانك اك زنكين محيطي اولان تورك منطقه سنده [يعني آذربايجان، خمسه، قزوين و همدان ولايتلرينده] كويلر و شهرلر باشدن باشه اليم كونلر ياشامقده در. شهرلرده آج و سفيل جوجقلر صقاقلرده آواره قالمشدر. مرحمتسز قيش كيجه لرينده چيپلاق يتيملر ايصينمق ايچون كوپكلره ساريله رق كيجه يي كچيريرلر. بو مدهش لوحه لري كوزمله تبريزده و قزوينده كوردم. ظالم فارسي حاكميتي يالكز دوزاغنه دوشه نلري صويمقله مشغولدر. اوراده توركلر بر حاكمك حضوريتنه چيقاركن و يا حكومت قاپيسينه اوغراركن مطلقا كندندن كچر. قامچي، فالاقا، زنجير و ايپ هر حاكمك اك طبيعي اداره آلتلريدر. توركك يكانه سلاح مدافعه سي رشوت و دالقاووقلقدر. بو فجايعي بيكلرجه مثال ايله اثبات ايده جكم.

وطنلرنده بو حياتي ياشايان توركلر پاره قازانمق ايچون وطنمزه كلنجه قارشيلرنده فعال بر ماكنه حالتده ايران سفارتخانه سيله ايران قونسلوسخانه لريني بولورلر. سفير و قونسلوسلر حمائي فعاليتله بونلار ايله تماسده بولونور. اك كوچوك مراجعتلري اك مهم بر ايش كبي در حال حكومتمز نزدنده تعقيب و حمايه اولونور. مامورلريمز و ملتمز، يابانجيلري توركلرك فوقنده كورمكه آليشديغندن ايران پساپورتلي و ايران حمايه سي بر اكسير اعظم كبي هر درده دوا اولور. سير طبيعيسنده بر قاچ كونده بيتمه سي ايجاب ايدن ايشلر بو سايه ده بر قاچ ساعتده حل اولونور. ايران توركلري بو سحار تاثيري كورونجه دائما عجملره بكزه مك و بزدن آيري كورونك ايچون باشلرنده كي سياه كلاهي دكيشديرمزلر. بزه ياناشمازلر و بزي دائما يابانجي و دشمن كورورلر.

وطنلرنده بر كلمه فارسي قونوشمغه تنزل ايتمه ين ايران توركلري توركياده بزدن آيري قالمق ايچون فارسي لسانني اوكره نيرلر.

آچيق سويله يه لم: عصرلردن بري بز، ايران توركلرينك بو آيريلقلرينه قارشي لاقيد قالديغمز ايچون اونلر ده عجم قونسلوسخانه لرينه صيغينه رق عجملكله افتخار ايتديلر و بزي يابانجي و حقير كورمكه آليشديلر. بو، بزم جنايتمزدر. اكر بز، وطنمزده هر كسدن زياده تورك و توركلكي سه وسه يدك، توركي و توركلكي سه ومه ينلري تنكيل ايتسه يدك، دنيانك توركلريني طانيوب اونلري ده مجرد تورك اولدوقلري ايچون، كنديمزله برابر ديكر يابانجيلرك فوقنده طوتسه يدق هيچ شبهه سز منفعتلريني چوق ايي بيلن ايران توركلري چوقدن اك ظالم دشمنلرندن آيريلير و بزمله قايناشير ايدي.

بوكون اهمالمز يوزندن وطنمزده عجم كولكه سني تورك قرداشلغنه ترجيح ايدن بو توركلر، وطنلرينه كيتديكلري وقت، جهنمي بير حيات ياشارلر. اوراده فارسلر يعني حقيقي عجملر ايران توركلريني تورك اولدوقلري ايچون حقير كورورلر. ايرانده بر عجم بر توركه قيزديغي وقت اوكا توركه خر يعني اشك تورك ديه خطاب ايدر. بو تعبيرك مخفي اولان توركه سوزي عجملر آغزنده بر كفر مقامنده قوللانيلير. ايي بيلملي يز كه وطنمزده اهمالمز يوزندن عجملشمكه تنزل ايدن بر قاچ تورك هيچ بر وقت ايرانده كي دورت ميليون توركي تمثيل ايده مز. بالعكس ايرانده كي معظم تورك كتله سي هر وقت عجم كابوسنه قارشي عصيان ايتمش و چوق دفعه بويوك قوربانلر ويرمشدر. صره سي كلدكجه مقاله لريمزده بو عزيز قوربانلرك مقدس مناقبني ده ياد ايده جكز.

شوراسني ده اونوتمايالم كه عجملك ادعاسنده اولان توركلر بيله وطنمزده تورك قارداشلغنك عجم پاساپورطندن دها فياض و دها نافع اولديغني كوردكلري وقت در حال عجملكي ترك ايده جكلر و وطنلريني عجم كابوسندن قورتارمق ايچين مجاهده يه كيريشه جكلردر.

.....

توركيا، دنيانك موازنت كفه لرنده آغير باصه بيلمك ايچون هر شيدن اول ايران توركلريني اسارتدن قورتارمالي و شرق حدودمزده قوتلي بر تورك جمهوريتنه استناد ايتملي در. بونك ايچون ايران توركلرينك حريت و استقلالي طبيعي و انساني بر حق اولمقله برابر بزم ايچون ده ضروري و حياتي بر مسئله در.

٢٥ آغستوس ١٣٤٠ روشني (١٩٢١)