تک توران : تورکیه تورکجه‌سی تورک دونیاسی اوچون اورتاق دیل کیمی قبول اولونا بیلر. بونو آذربایجان میللی مجلیسی‌نین مدنیت کومیته‌سی باشقانی نیظامی جفروف “تورک دونیاسی‌نین مدنی اینتقراسیونو: اورتاق تورک الیفباسی و اورتاق تورک ادبی دیلی” مؤضوسوندا گئچیریلن کونفرانسدا بیلدیردی.
جعفروفا گؤره، "تورکیه تورکجه‌سی آرتیق اورتاقلیق فونکسیونونو یئرینه یئتیریر. ۱۰۰ میلیوندان آرتیق انسان تورکیه تورکجه‌سیندن استفاده ائدیر."
او بیلدیریب کی، اورتاق دیلین مؤجود اولماسی هر هانسی بیر تورک دیللی خالقین دیلی‌نین زنگینلیگینی ایتیرمه‌سی آنلامینا گلمیر.
میلت وکیلی علاوه ائدیب: "صحبت اورتاق ایلتیشیم (اونسیت) واسیطه‌سیندن گئدیر کی، هر بیر تورک خالقی اوچونجو یابانجی دیلده دئییل، اورتاق تورک دیلینده دانیشسین."
او قید ائدیب کی، اوزون ایللر تورک خالقلاری‌نین قورولتایلاریندا اورتاق تورک دیلی مسئله‌سی قالدیریلیب.
تورکیه‌نین آذربایجانداکی سفیری خلوصی قیلیچ کونفرانسدا بیلدیریب کی، تورک دونیاسی گوندن گونه گوجلنیر، تورک بیرلیگی محکملنیر.
او دئییب: "تورک دونیاسی بیرلیگی هر هانسیسا حربی امکداشلیق اوچون، کیمه‌سه قارشی استفاده ائتمک اوچون دئییل، بؤلگه‌ده امن-آمانلیق یاراتماق اوچون یارانیب."
سفیر تورک دیللی اؤلکه‌لرین اورتاق کونفرانسلاری‌نین گئچیریلمه‌سی‌نین، قادین ژورنالیستلر بیرلیکلری‌نین یارادیلماسی‌نین واجیبلیگینی وورغولاییب.
کونفرانسدا میللت وکیلی فاضیل غضنفروف بیلدیریب کی، آذربایجان تورکیه‌ده اولان الیفبایا تدریجاً گئچید ائتمه‌لی‌دیر.
غضنفروف دئییب: "بیز داها گئنیش مکانا داخیل اولما یوللارینی دوشونمه‌لی‌ییک. ۹ میلیونلوق آذربایجان خالقی‌نین ۸۰ میلیونلوق تورکیه خالقینا نیسبتاً مطا‌لعه ائتمک امکانلاری داها دا محدوددور."
میللت وکیلی سئوینج حسینووا تدبیرده بیلدیریب کی، تورک خالقلاری اوچون اورتاق دیلین و اورتاق الیفبانین یارادیلماسی آرتیق تاریخین ضرورتینه چئوریلیب.
آذربایجان ژورنالیست قادینلار مجمعی باشقانی سئویل یوسیفووا کونفرانسدا قید ائدیب کی، بو کیمی تدبیرلر اوزون مدتدیر مذاکیره اولونان اورتاق تورک دیلی ایله باغلی یئنی فیکیرلرین اورتایا چیخماسینا سبب اولا‌جاق.
تی آر تی
