تك توران : پهلوی رژیمی دؤرونده ایران چرچیوه‌سینده یاشایان غیر فارس میلّت لر مخصوصا تورکلر علیهینه آپاریلان غیر اینسانی عمل لری چوخلاری گؤرموش ، گؤرمه ینلر وارسادا ائشیتمیشلر .
هله بو رژیمین
عؤمرونون سون ایللرینده باصطلاح " وحدت ملّی" سیاستی نتیجه سینده
آذربایجانلیلار ضدینه مختلیف یوللارلا آپاریلان غیر اینسانی و نژادپرستانه
تبلیغاتا باخمایاراق رضاخان دؤرونده آذربایجانلیلارا قارشی گؤرولن ایشلر داها
دهشتلی اولموشدور .
بو زاماندا
آذربایجان والیسی و معارف رئیسی آدی ایله تهراندان آذربایجانا گونده ریلن مستوفی و
محسنی کیمی آدامجیغازلارین آذربایجاندا آنا دیلیمیز علیهینه گؤردوکلری ایگرنج
ایشلری هله ده اورکلرده بیر دایمی یارا کیمی قالیبدیر !
رضاخانین ضد بشری
سیاستینی گوجلندیرمکده بعضی ساتقین شاعیر و یازیچیلاردا قلم چالمیش و اؤز اربابلاریندان
انعاملار آلمیشلار !
"زبان فارسی
در والاترین مقام " ( فارس دیلی ان یوکسک مقام دا ) کیتابی نین یازیچیسی دا
بو ساتقین آداملاردان بیری دیر. بو کیتاب رضاخان حاکمیبتی دؤرونده و یا اوغلو محمد
رضا حاکمیتی نین ایلک ایللرینده یازیلیب و اونون یازیچیسی کیتابی باصطلاح
"رضاشاه کبیر پدر تاجدار" ه تقدیم ائتمیشدیر !
کیتابین ایلک
صحیفه لری یازیچی نین بئینیندن قالخان مالیخولیایی خیاللارلا بئله باشلانیر :
"فارس دیلی
نین بوتون دونیا دیللریندن اوستون اولدوغونو هامی بیلیر و بو سؤزه هئچ بیر شکّ و
شوبهه یوخدور ، ایندیه کیمی فارس دیلینی محدودلاشدیران و بین المللی دیل اولماسی‌نین
قاباغینی آلان یالنیز عرب الیفباسی ایله یازیلماسی اولموشدور ؛ اونون لاتین
الیفباسی ایله یازیلماسی ، دونیانین بوتون مشهور دیل لرینی او جومله دن انگلیسجه ،
فیرانسیزجا ، آلمانجا و باشقا دیللری گئری ده قویوب بین الملی دیل اولماسی بیر
اولاجاقدیر ." !
بو جناب ، فارس
دیلی نین تعریف و تمجیدیندن سونرا سؤزونون ادامه سینده بئله ایفاده ائدیر :
" هله
گؤرونور بعضی ناخلف و اؤزونو و سوی – کؤکونو تانیمایان آذربایجانلیلار حتی تهران
خیابانلاریندا بیر – بیرلری ایله گؤروشنده تورکجه حال – احوال ائدیرلر و معلوم
اولدوغو کیمی آذربایجاندا وضعیت داها گرگین دیر ، اونلار اؤز اصلی دیللرینی قویوب
چنگیز دیلینی دانیشماغا داها چوخ رغبت گؤستریرلر ، بو بؤیوک فاجعه دیر ، بئله بیر
وضعیتی تحمل ائتمک غیر مومکوندور . " !
بو آغا باصطلاح
عالمانه یازیلاری نین ادامه سینده و بو فاجعه نین آذربایجاندا قاباغی‌نین
نئجه آلینماسی نین باره سینده یازیر :
"
آذربایجاندا چنگیز دیلینی آرادان گؤتوروب کوروش دیلینی آذربایجانلیلار آراسیندا
یایماغا یالنیز بیر یول وار ، اودا آذربایجاندا دوغولان کؤرپه لری دونیایا گلن
گوندن آناسیندان آییریب مخصوص شیرخوارگاهلاردا
ساخلاییب و یئددی یاشینا قدر بورادا بؤیودوب سونرا مدرسه یه قویوب اورادا
اوخوتماقدیر ؛ البته شیرخوارگاهلاردا ایشله ین پرستارلار آذربایجانلیلار یوخ ،
فارس دیللی‌لر اولمالی دیرلار ، چونکو اورادا ساخلانیلان کؤرپه لرین ایلک
اؤیرندیکلری و دانیشدیقلاری دیل فارسجا اولمالی دیر .
یئددی یاشینا قدر
بو یئرلرده ساخلانیلان کورپه لر البته آتا – آنالارینی دا گؤره جکلر و تعیین اولونان ساعاتلار آنالار گلیب کورپه
لرینه سود وئریب آمما اوشاقلارینی دانیشدیرمادان اورانی ترک ائده جکلر ؛ آتالار
ایسه کؤرپه لرینی قوجاقلارینا آلیب محبت ائده بیلرلر آنجاق اونلارلا دانیشماق
حاقلاری یوخدور ، چونکو آتا – آنالار کؤرپه لرینی اؤز دیللرینده دانیشدیرسالار
چکیلن زحمتلر هَدَره گئدر .
بو
شیرخوارگاهلاردا بؤیویوب یئددی یاشینا دولان اوشاقلار مدرسه‌یه گئدن زامان اؤز
عائله لرینه قایتاریلیب و اؤز عائله‌لری ایچینده یاشایاجاقلار و آنا دیللری‌ده
فارس دیلی اولاجاق و بوندان سونرا اونلارین آتا – آنالاری دیرلار کی ، تورکجه
بیلمه‌ین اوشاقلاری ایله فارسجا دانیشاجاقلار ؛ بئله لیکله چوخ قیسا بیر زاماندا
تورکجه دانیشماق فاجعه سی آذربایجاندان و ایراندان گؤتوروله‌جکدیر ." !!
بو ضد بشر یازیچی اربابینا تقدیم ائتدیگی کیتابدا
بئله بیر شرایطین یارانماسی نین بودجه‌سی‌نین نئجه تامین اولماسینادا فیکیرله‌شیب
یازیر :
"معلومدور
کی ، آذربایجانین بوتون کند و شهرلرینده شیرخوارگاهلار یاراتماق چوخ بودجه طلب
ائدیر و بو بودجه‌نی تامین ائتمک دؤلت امکانیندان خارج دیر ، طبیعی دیر کی ، بئله
بیر مقدس هدف اوچون بوتون ایرانلیلار
ماللاریندان مایا قویماغا حاضیردیرلار .
شیرخوارگاهلارین
بودجه سینی تامین ائتمک اوچون لازیمدیر هر آی دا
مثلا هر بیر تاجیردن ایکی تومن ، کارمندلردن بیر تومن ، کارگر و اکینچی دن
بئش قیران آلینسین ، بئله‌لیکله آذربایجانین دیل مسئله سی حلّ اولوب و اجنبی دیلی
همیشه لیک بو دیاردان گئده جکدیر ." !!
داها دوغروسو بو
باصطلاح یازیچی بئله بیر غیر اینسانی و وحشیانه پیشنهاد و طرحی ایله
آذربایجانلیلارین تاریخ بویو دانیشدیغی و آتا – آنا لارین ، اوغول – قیزلارین ات
قانی ایله عجین اولددوغو آنا دیلینی بئله
بیر فاشیستی و وحشیانه طرح ایله آرادان آپاریب یئرینه فارس دیلینی آذربایجانین هر
یئرینده آذربایجانلیلارا آنا دیلی کیمی تحمیل ائتمک پلانینی رضاخانا تقدیم ائتمکده
هیتلرین اوزونو آغارتمامیشدیرمی ؟!
گؤره سن تاریخ
بویو بئله بیر وحشی لیک و ضد بشری تدبیرلر هئچ بیر قان ایچن و ظالیم حاکیم طرفیندن
بیر میلت علیهینه یازیلیب دیرمی ؟ !!
سون
( بو مقاله ایلک
دفعه ۱۳۶۷ -جی ایل آذر آیی نین ۱۵ ینده تبریزده " فروغ آزادی " نشریه
سینده چاپ اولموشدور )
آچیقلاما : من بو
کیتابی انقلابدان سونرا و ۱۳۵۸ ، ۱۳۶۰ –
جی ایللر آراسی اوخودوم و اوخودوقدان
سونرا اونو باشقا دوستلارادا اوخوماق اوچون وئردیم ؛ تاسف لر اولسون بو کیتاب الدن
اله دوشوب سونوجدا ایتیب باتدی و نه قدر آختاردیمسا داها اونو تاپا بیلمه دیم ، بو
اوزدن اونون یازیچیسی و یازیلان تاریخینی ، بو مقاله نی یازان زامان
( ۱۳۶۷ – جی ایل ) اونوتدوغومدان داها بورادا گتیره بیلمه دیم ، لاکین یادیما گلن
قدر بو بالاجا کیتابی یازان ، احتمالا
" ماهیار نوایی " آدیندا بیریسی اولمالی ایدی ، لاکین اطمینانلا
دئیه بیلمه رم .
بو کیتاب کسروی
نین " آذری یا زبان باستان آذربایجان " کیتابینا اوخشار و ۵۰ – ۶۰ صحیفه
لیک بیر کیتاب ایدی ؛ رجا ائدیرم اگربو کیتابی اوخویانلار و یا اونو ساخلایانلار وارسا و کیتابین یازارینی و
یازیلان تاریخینی بیلیرلر‌سه و کیتاب حاقدا باشقا بیلگی لری وارسا بیزه یاردیمچی
اولوب معلومات وئرسینلر .
