آذربایجان میللی حرکتی آچیسیندان آنادیلی نین اؤنمی

تک توران : اونلو تورکولوق محرم ارگین دیل حاققیندا دئییر کی : دیل اینسانلار آراسیندا آنلاشمایی ساغلایان  طبیعی بیر واسیطه دیر. اینسانلار دویغولارینی، دوشونجه لرینی، فیکیرلرینی، حؤکوم لرینی بیربیرلرینه ناغیل ائتمک، مراملارینی بیربیرلرینه آنلاتماق اوچون دیل دئییلن واسیطه یه باش وورورلار.
فقط دیل اینسانلارین ایشلتدیگی هر هانسی بیر واسیطه یه بنزه مز. اونون واسیطه لیگی ساده جه آنلاشمایی تامین ائتمه سی باخیمینداندیر. فردلر و نسیللر آراسیندا آنلاشما واسیطه سی اولاراق ایش گؤرور. فقط بو ایشی گؤرورکن هر زامان موستقیل بیر هووییته صاحیبدیر. اینسانلار اونا ایستدیکلری کیمی حؤکم ائدمزلر. اونو اولدوغو کیمی قبول ائتمه یه، اونو بیر واسیطه اولاراق ایشله دیرکن اونون خوصوصییتلرینه دیقت ائتمه یه، اونون خوصوصییتلرینه اویماغا مجبوردورلار. چونکو دیل اویدورما بیر واسیطه، ماددی بیر واسیطه، بیر آلت دگیلدیر. او  طبیعی بیر واسیطه دیر. واسیطه  وظیفه سی گؤرور، فقط طبیعی بیر وارلیغی واردیر. دیل بو باخیمدان جانلی بیر واسیطه یه بنزر. مثلاً آت دا بیر واسیطه دیر، اوتوموبیل ده بیر واسیطه دیر. فقط اینسان اوتوموبیله ایسته دیگی شکیلده حؤکم ائده بیلر، آت قارشیسیندا ایسه آنجاق اونون طبیعتینه اویغون حرکت ائتمک زوروندادیر. اوتوموبیله ایسته دیگی شکلی وئریر، اونون بیچیمینی ایسته دیگی شکله سوخار، اونو ایستدیگی کیمی ایشله دیر، ایسترسه اوچوروما آپارارا بیلر. آما آتین بیچیمینی دئیییشدیره مز، اونو ایستدیگی کیمی ایشلدنمز، ایستدیگی یئره آپارانماز. باشینی کسسه نیز آتا قورخدوغو یئرده بیر آددیم آتدیرا بیلمزسینیز. اونون اوچون دیلین واسیطه لیغی بؤیله بیر واسیطه لیکدیر، آتین واسیطه لیگی کیمیدیر. آنلاشمایی ساغلاماق باخیمیندان بیر واسیطه کیمی ایش گؤرور، فقط طبیعی بیر وارلیغا صاحیبدیر.

آنا ديلي اؤيره‌نيلن بير وارلیق دئييلدير، ياشانيلان و اینسانلارین اونونلا ایچ ایچه اولدوغو بير وارلیقدیر. آذربایجان میللی حرکتینین اورتایا چیخیش سببلریندن باشیندا دیل مسئله سی گلمکده دیر. بللی بیر اوزون زامان آنا دیلی مسئله سی آذربایجان میللی حرکتینین ماهییتینی تشکیل وئرمیش و اونون مرکزینده اوتورموشدور. چونکو اذربایجان میللی حرکتینه گؤره دیل بیزیم کیملیگیمیزین آیریلماز بیر پارچاسی اولموشدور. فارس شونیزمی ده بیزی آسیمیله ائتمک اوچون هر  زامان دیلیمیزی یوخ ائتمه یه چالیشمیشدیرو بو یوخ ائتمه سیاستلرینین ان بلیرکینی بیزیم دیلیمیزین اینکاری اولموشدور. بیزیه و دیلیمیزه آذری دئیرک اصلینده فارس شونیمزمی بیزیم میللی هویتیمیزی هدف آمیشدیرو اونا گؤره ده آذربایجان میللی حرکتی اؤز آنا دیلینی قوروماق و فارس هویتی ایچریسینده اریمه مک اوچون دیل مسئله سینه اؤنم وئرمیشدیر.

دیل مسئله سی آذربایجان میللی حرکتینین اورتایا چیخیش سببلرینین باشیندا یئر آلماقدادیر. میللی حرکت ایللرجه دیل اوزریندن ایستکلرینی قاباغا آپارمیشدیر. دیل بیزیم کولتوروموزون تمل داشینی تشکیل ائتدیگی اوچون اذربایجان میللی حرکتی هر زامان آذربایجان تورک دیلینین گلیشمه سینه اؤنم وئرمیدیرو ائله اونا گؤره دیر کی اوزون ایللر سونرا دیلیمیزین اوخوللاردا یاساق اولماسینا باخمایاراق هله دا گونئی آذربایجان-دا دیل اینکیشافی دوام ائتمیش، هم سؤزل هم دا یازی شکلینده وارلیغینی دوام ائتدیره بیلمیشدیر. دیلیمیزی اینحیرافا چکمه چابالاری نتیجه وئرمه میش، آذربایجان تورکجه سی گونئی آذربایجان-دا و ایران-دا تورکلرین چوخلوقدا یاشادیغی بؤلکه لرده وارلیغینی سوردوره بیلمیشدیر. دیل عینی زامانداکی فردلر و توپلوملار آراسینداکی علاقه لری یاراتماقدادیر، عینی زاماندا دا توپلوملارین، باشقا توپلوملاردا آیریلماسیندا اؤنملی بیر عاملدیر. میللی جرکت ده بو عامیلی دققته آلاراق آذربایجان تورکلرینین ایران ایچریسینده آیری بیر توپلوم اولدوغونو وورغولاماق اوچون دیل مسئله سینه اؤنم وئرمیشدیر.

آنادیلده تحصیل بیزیم چیخیش نقطه میز اولسادا بوگون آرتیق ایستکلریمیز تورک دیلینده تحصیل ایله محدود دئییلدیر. آرتیق بیزیم ایستکلرین ان ابتدایی سینی دیل ایسته ییمیز تشکیل ائتمکده دیر. دوغرودور کی زامان سوره جینده میللی حرکت اؤز هدفلرینی و ایستکرینی گئنیشلدیبدیر. آما با او آنلاما گلمه مه لیدیر کی هله ده اؤز آنا دیلینده تحصیل حققینده واز کئچیبدیر. آذربایجان داکی بوتون آکسیالاردا و تراختور تاخیمی مسابقه لرینده تورک دیلینده مدرسه شعاری هله ده سسلنمکده دیر. بو شعار یوخاریدا دا دئدیگیمیز کیمی بیزیم ان آلت ایستگیمیزدیر.

ایران ایچریسینده سیاسی و اجتماعی شرایطه باخاراق بیزیم بو ایسته گیمیزی دیله گتیرمه میز بیزیم ان ابتدایی حاققیمیزدیر. آذربایجان میللی حرکتی و اونون ایچریسینده یئر آلان آذربایجان اؤیرنجی حرکتی تورک دیلینده تحصیلی بیر چیخیش نقطه سی اولاراق گؤرمه لری گرکیر. چونکو اگر بیز ان ابتدایی حققیمیزی الده ائتمه دن دیگیر ایستکلریمیزی دیله گتیریرسک اونلاری دا الده ائتمکده چتینلیک یاشایاجاییق. میللی حرکیتین گلیشیم سوره جیند ه  بو ایستک اؤنمینی و یئرینی قورومالیدیر.

البته آذربایجان میللی حرکتی و آنادیلی مسئله سینده بیزیم اؤز ایچریمیزده ده بعضی یئترسیزلیکلیریمیز واردیر. هله بیز اؤزآنادیلیمیز اولان اذربایجان تورکجه سینده بیر خبر ادبیاتی یارادابیلمه میشیک. هله ده آذربایجان فعاللارینین بیر چوخو آذربایجان تورکجه سینی یازماقدا چتینلیک چکمکده دیرلر. دوغرودور کی بیز دیلیمیزی اوخوللاردا اؤیرنکه دیگیمیز اوچون اونون گلیشمه سینده جیددی شکیلده چالیشا بیلمیریک. آما اگر بیز دیلیمیزی قوروماق و اونو گلیشدیرمک ادعاسی داشییریقسا، او زامان بوتون ساحه لرده آذربایجان تورکجه سینده ماتریاللار یاراتمالیییق. چونکو بو دیل بیزی هم اؤز توپلوموموز ایچریسینده هم ده دونیا دا تمثیل ائده جکدیر. آذربایجان میللی فعاللاری اوزمان اولدوقلاری ساحه لرده اؤز آنا دیللری اولان آذربایجان تورکجه سینده یازیلار یازمالیدیرلار. چونکو آنا دیلیمیزی توم ساحه لرده گلیشدیرمه لییک.

آذربایجان اؤیرنجی حرکتی اؤیرنجی سیته سی اولاراق هر زامان آنادیلی نین میللی حرکت اوچون اؤنمینه دیققت یئتریمه یه چالیشمیشیق. بونون اوچون چالیشمیشیق خبرلریمیزی اذربایجان تورکجه سینده یازاق. دونیا آنا دیلی گونونده ده یئنه آنادیلیمیزین اؤنمینی وورغولایارق دئییریک کی بیز هئچ بیر زامان اؤز انا دیلیمیزده تحصیل حاققیندان واز کئچمییه جه ییک. دونیا آنادیلی گونونده آذربایجان تورکلرینین عزیزله دیکلری بوتوت مناسیبت و ائیلملر اونلارین ان دوغال حاقلاریدیر.

دونیا آنا دیلی گونونو بیر داها بوتوت آذربایجان تورکلرینه تبریک دئیرک، اومود ائدیریک یاخین گلجک ده آذربایجان اوشاقلاری اوخوللاردا اؤز آنادیللری اولان آذربایجان تورکجه سینده تحصیل آلسینلار.

گلجک بیزیمدیر

آذربایجان اؤیرنجی حرکتی، اؤیرنجی سیته سی