یعنی دونیادا هئچ کیم اینانا بیلمز ۷۰ میلیونلوق نفوسو اولان
بیر اؤلکه ده 35 ، ۳۰ حتی ۲۰ میلیون نفوسا مالیک اولان بیر میلّت ، گئنیش و بیر بیرینه
یاپیشیقلی بیر اراضی ده یاشاییب بیر دیل ، بیر مدنیت ، بیر تاریخ ، بیر اینانج و اعتقادلا
یاشاسین آمما اؤز دیلینده یوخ باشقا بیر دیلده و کؤکدن اونون دیلی ایله فرقلی اولان بیر دیلده یازیب – اوخوماغا
و تحصیل آلماغا مجبور اولاراق اؤز دوغما دیلینده حتی ابتدایی قدرده تحصیل آلماغادا
حاقّی اولماسین !
گؤره سن دونیانین هانسی قانونلارینا دایاناراق بیزیم دیل ، تاریخ
، مدنیت و کولتوروموز اؤز وطنیمیزده و اؤز یوردوموزدا بو قدر مظلوم قالماغا محکومدور
؟
گؤره سن دونیانین یاری نفوسونو تشکیل ائدن و اینسان حیاتیندا
ان مقدس و فداکار موجود اولان آنلار فردوسی
یانیندا بو قدر تحقیر اولوب :
زن و اژدها هردو در خاک به جهان پاک از این هر دو ناپاک به
کسی کو بود مهتر انجمن کفن بهتر اورا ز فرمان زن
که را در پس پرده دختر بود اگر تاج دارد بد اختر بود
…
شعرلری ایله آلچاقلانان و
تورکلره :
که ای ترک بد گوهر دیو زاد که چون تو سپهبد به گیتی نباد
تن ترک بد زاد بی جان کنم زخونش دل سنگ مرجان کنم
که آن ترک بد پیشه و ریمن است که هم بد نژاد است هم بد تن است
به صد ترک بیچاره بد نژاد که نام پدرانشان ندارند یاد
منظوم جومله لری ایله توهین ائدن شاعرین شعرلرینی ابتدایی ،
اورتا و عالی تحصیل مکانلاریندا اوخویوب و اونا " حکیم ابوالقاسم فردوسی
" لقبی وئریب و اونونلا فخر ائتمه یه محکوم اولمالییق بیز ؟
ندن بیز بو قدر نفوسا مالیک اولاراق دونیا شهرتلی و مدرن : " قادینلار اؤنجه ،
The ladies first " جومله سینین یازیلماسینی ان آزی
مین ایل قاباق " دده قورقود " کیتابیمیزدا گؤره رک جمعیتیمیزین یوزه دوخسان
دوققوزو بو کیتابی تانیماسین ؟
گؤره سن نییه گرک بیر اؤلکه ده اونون دیلینده و ان آزی مین ایل
قاباق یازیلان و اینسانیت ، شرافت ، محبت ، آتا – آنا و بؤیوکلره سایقی ، قادین حاقلاری
، فداکارلیق و بیر سؤزده اینسانی متن لرله
دولو اولان " دده قورقود " آدیندا بیر کیتابدان بیر جومله اولسون بئله درسلیکلریمیزده
اولماسین لاکین دربارلار طرفیندن قیزل دینارلی انعامی گوموش درهم لره چئوریلن و وارلیغیمیزی
تحقیر ائدن شاعیرلرین یازیلارینی درسلیکریمیزده اوخوماغا و اونا فخر ائتمه یه محکوم
اولاق ؟
بیز اگر بو اؤلکه ده یاشاییریقسا ، فارسلاردان چوخ نفوسا مالیک
اولمامیزا باخمایاراق فارسلار قدری اؤلکه امکانلاریندان فایدالانماغا حاقّیمیز وار
یعنی :
۱
– دیلیمیز ایکینجی رسمی و سرتاسری دیل اولاراق فارس دیلی ایله یاناشی ابتدایی دن توتدو
بیلیم یوردونون ( دانیشگاهین ) سونونا قدر و بوتون تخصص لرده درس وئریلمه لیدیر
۲
– فارس دیلی کیمی دیلیمیزده آکادمی ( فرهنگستان ) آچیلمالی و دیلیمیز یابانجی سؤز و
کلمه لردن سیلینمه لی و تورک دیلی نین کؤکلرینه دایاناراق یئنی سؤزجوکلر یارانمالیدیر
۳
– سرتاسری رادیو – تلویزیون کاناللاری نین تعدادی مثلا ۱۲ اولورسا ، نفوس چوخلوغو اساسیندا
اونون ۵-ی فارسجا ، ۵- ی تورکجه و ۲- سی باشقا غیر فارس دیللره حصر ائدیلمه لی و وئرلیش یایمالیدیر
۴
– فارس موسیقی سی گلیشمه سینه نظرده توتولان بودجه و اجرالار تورک موسیقی سینه ده نظرده
توتولمالی و اجرا اولمالیدیر ، عین حالدا باشقا غیر فارس موسیقی لرینه ده جمعیتلری
چوخلوغو اساسیندا اؤنملی یئر وئریلمه لیدیر
۵
– دؤلتی بودجه ایله مرکزده نشر اولان مطبوعاتین
یاریسی تورک دیلینده اولمالیدیر
۶
– دؤلت بودجه سی ایله حاضیرلانان سینما و تئاتر فیلم و نمایشلری ایکی دیلده ( تورکجه
و فارسجا ) اولمالیدیر
۷
– مجلیس ده هر ایکی دیلین ( فارسجا و تورکجه ) ایشلنمه سی آزاد اولمالیدیر
۸
– رسمی و دؤلتی تابلولار هر ایکی دیلده (فارسجا
و تورکجه ) یازیلمالیدیر
۹
– فارس دیلی کیمی تورک دیلینده ده دؤلت بودجه سی ایله سئمینارلار قویولمالی و تورک
دیلی اوزمانلاری بو سئمینارلارا دعوت اولمالی و تورک دیلی ساحه سینده آراشدیرمالار
آپارمالیدیرلار
۱۰
– دوزگون تاریخیمیز یازیلمالی و مکتب – مدرسه و بیلیم یوردوندا تدریس ائدیلن عیرقچی
و آریا یؤنلو نژادپرستانه تاریخ اصلاح اولمالیدیر
۱۱
– بوتون ساحه لرده فارسلار و غیر فارسلار آراسیندا
برابر حقوق پروگراملاری نظرده توتولاراق اؤلکه ده دوستلوق ، اینسان سئورلیک و اینسانلارین
دیل ، اؤزل اینانج و سوی – کؤکلرینه باخمایاراق
سایقی و سئوگی دویغولاری گوجلندیریلمه لیدیر .
بونلارین هامیسینی گؤز اؤنونه آلاراق شاه اسماعیل ختایی (صفوی
) ، بؤیوک شاه و شاعیریمیزین بو وصیتینی ده هئچ زامان اونوتمامالییق :
«
اوچ امانت یادگار قالیب اولو بابالاردان بیزه ، « دیلیمیز ، غیرتیمیز ، وطنیمیز ».
