قوجامان بیر دهه اولدو ساوالانی تانیانی، ایلک دفعه 1380-اینجی
ایلین دی آییندا (اگر ایشتیباه خاطیرلاماییرسام) شهریار درنگینین مراسیمینده دانیشیرکن
گؤردوم، او زامانلار دانیشگاهدا اویرنجی اولمادیغیما باخمایاراق.سونرالارسا ساوالانین
درنگ قوردوغو دانیشگاهدان قبول اولدوم.ساوالانلا ایلک گوروشوم 1382-اینجی ایلین اردیبهشت
آیینا قاییدیر.یاغیش آز اولا آچمیش توپراغین قوخوسو گلیرکن ساوالانلا خوابگاهلارین
محوطه سینده دانیشیردیق، آما نه باره دن ائله قوخوسو گلن توپراقدان.
هردن دوشونورم دونیادا بلکه ده ان ده یرسیز شی توپراقدیر ان
ده یرلی سی ایسه جواهرات آما ندنسه بو قاعده دوشکون اولدوغو اینسانلارینین باره سینده
ترسینه عمل ائدیر چونکو توپراغا تاپان اینسانلار خالق گؤزونده قات قات ده یر لی اولورلار
جواهیراتا تاپانلاردان.ائله ساوالانین دردی ده، درمانی دا، یاسی دا، اومودو دا، سوزوده،
سئوداسی دا بو توپراق ایدی.
ایللر بویو زنداندا قالسام دا، وارام من *** قلبیمده منیم سارسیمامیش
ذره جه ایمان*** بیر گون قارا زنجیریمی آخیر
قیرارام من *** ارکین باشینا قانلا قیزارمیش قانادیمدان *** بایراق وورارام من
بو شعری هر زامان قافیه لرین اشتباه اوخودوغوم اوچون ساوالان
منه قیزمیشدی بلکه ده هر زامان آغلیمدا وار اولماغینین سببی ده بودور، بلکه ده ساوالانین
زینداندا اولدوغو زامانلار بیزیم آرامیزدا وار اولوشونون دا سببی بونا بنزر.
1385-اینجی
ایلده دیلیندن هئچ قوپارامادیغی سؤز بو ایدی: هر بیر اؤزون دوشونر ار *** بیر دونیایا
برابر .بلکیده آرتیق دوشونر ارلریمیزی دوشونر حاله گلمیشیک.
بو توپراق کیملری گؤرمدی کی: خیابانیلر، پیشه وریلر، ذهتابیلر،
... کیمی لری شجاعتینه، کیمی لری درایتینه، کیمی لری استقامتینه دیللره دستان اولموشکن
هئچ بیرینین قدرینه قیمت وئرمه میشیک.آما بوگون آذربایجان هر دوشونرینه اونون هئچ مادی
اوستونلوگونه باخماقسیزین یالنیز و یالنیز دوشونجه سینه ده یر وئرمه یه باشلاییب ندن کی آذربایجان میللت
اولماغا باشلاییب.
فرهادین شیرینه، مجنونون لیلی ه، کرمین آسلیا، عشقلریندن ساری
آدلاری دیللردن دوشمز اولموش، آرزومدور کی ساوالانین دا آدی دیللردن دوشمز اولسون آذربایجانا
اولدوغو عشقدن ساری.
