( ایبراهیم ساوالان ، مهرداد ، روزبه ، محمد و افشین ) بَیَ سونولور .
ظولمودن گَل اَل گوتور ، قورخوتما زیندانلا منی
من کونول دوستاقییام ، زیندان نه لازیمدیر منه
« پروفسور ذهتابی »
سایین ، بویوک اویرتمن «ایبراهیم بی ساوالان» کئچمیش یازیمدا سنین داورانیشین « قاراجا بالیق » لا بیرگله شدیره رک ، بو قونونو باش یازی ائتدیم « ایبراهیم ساوالان و قاراجا بالیق » .
سنین اودلو دانیشیقلارین پدادوق «صمد» عمی نین « قاراجا بالیق » - ندا اولان قاری نه نه نین دانیشیقینا بنزه ییر کی او گئجه سی قیرمیزی بالیق قاری نه نه نین سؤزلرینده ن ائتگی لنمیش و گئجه نی گوندوز ائده بیلمیر .
دوغروسودا بئله دیر سایین بییم ؛ هر بیر سوزونده ایستیلیک و ساواش بیرگله شیر .
و سیز ای سایین دوسلاریم « مهرداد ، روزبه ، محمد و افشین » ، دوشونوب و دوشوندویونوز اوچون یاخالانماقینیز قوتلو اولسون .
سیز تبریز بیلیم یوردونون « آذربایجان تانیتیم اوجاغی » نین اویه لری اولارکن . بو سؤز اوچ سؤزده ن دوزه لیر . « آذربایجان » ، « تانیتیم » ، « اوجاق » .
« آذربایجان » ، « تانیتیم »
وصف سیز بیر سوز ، تاریخ بویو ایمپیراطورلار قوران . آزادلیق یولوندا کؤینه یی تیلیت آل قان اولان . یابانجی قارشیسیندا توپراق یولوندا جاندان چپر چکنلرین یوردو . اییید لرین یوردو .
و بوگون سیز دوسلاریم آذربایجان کئچمیشین ، ایندیسین و گلجیین یاشامینیزدا آغیر آجیلارینی ایچینیزده هوپدوروبسونوز و اونو تانیتدیرماغیندا سینیرلاندیرماییب سینیز .
« اوجاق »
آذربایجان تاریخینی اؤزونده داشییان بویوک بیر سؤز . آتا – بابالاریمیز تاریخ بویو بو اوجاغین باشینا توپلانیب گلنه ک لریمیزی قورویارکن یاسالار ، باشچیلیق ، کولتور .... یارادیب لار .
و بو گون سیز آتا – بابالارین یولونون آردیجی سی اولاراق بیرینجی ائوینیزده باشلایارکن توپلومدا اوجاق قورماقا باشلاییب سینیز .
آراز ائل سس دئمیشکن « اوجاق کوزونده ن بللی – اییید اولومونده ن بللی »
بو اوجاقلاردا آذربایجانی تانیتدیرماقدا سینیرلاری آشماق آماجی سیزلر اوچون تمل ساییلیر .
یولوز اوغورلو اولسون .
یازیمین سونونو رحمتلیک « پروفسور بختیار وهابزاده » نین سویو ایله سونا چاتدیریرام .
موحتاج
دونیایه گلنده ن هر آدام حورمته موحتاج
هر زحمت چکنین زحمتی بیر قیمته موحتاج
سنده ن حرکت ، تانریدان آنجاق برکت دیر
هر قالیب اولان ، عشقیله بیر زحمته موحتاج
دونیا آلیر اؤز نورونو داییم اولولاردان
هر خالق و جمعیت اولو شخصیته موحتاج
آزاد یاشاماق ، حور یاشاماق اینسانین حاققی
اینسان اولان اکمک قدر ، حوریته موحتاج
