تک توران : عزیز
میللتیمیز!
سایین
مئدیا و کیو ! 2012-12-12 تاریخینده 9 ایمضا‌لی بیر رئفئراندوم بیلدیریشی‌نین یاییلماسی‌نین
آردین‌دان گاقپ-نین یؤنتیم قورولوی بیر آچیقلاما وئره‌رک ایمضاسی‌نین بیر آنلاشیلمازلیق
اوزون‌دن آتیلماسینی یازمیش و آدی‌نین او بیلدیریش‌دن چیخاریلماسینی ریجا ائتمیش‌دیر.1
. گاقپ-نین ایمضانین نئجه آتیلماسیندا آذربایجان
میللی دیرنیش تشکیلاتی‌نین سؤزچوسو سایین داوود توران ایله گونئی آذربایجان
قورتولوش پارتیاسی‌نین یؤنتیم اویه‌سی و آمئریکا تمسیلچی‌سی سایین رضا سلهشور آراسیندا
قیسسا دیالوق و آنلاشما اولموش‌دور. بو دیالوقدا رضا بی “یاخشی اولار کی بو
رئفئراندوما 2 ایل سوره تانینئیدی” و یا بنزر سؤز ایشلتمه‌سی اولموش‌دور. رضا بیین
بو حاقدا منه وئردیگی بیلگیده، بو سؤزون شرط اولدوغو آنلاشیلمیش‌دیر. بو ایسه، حاق‌لی
اولا‌راق سایین داوود توران بیین طرفین‌دن تپکی قونوسو اولموش‌دور. رضا بی ایسه،
داوود بیله آرا‌لاریندا گئچن سؤزه آیدین‌لیق گتیره‌رک اورتادا هر هانسی بیر شرطین
اولماماسی‌نین آلتینی جیزمیش‌دیر. من بو قونو ایله باغلی هم اؤزوم و هم سایین رضا
بی سلهشور طرفین‌دن سایین داوود توران بی‌دن اوزور دیلییرم. آنجاق:
2. قورتولوش پارتیاسی بوگوندک هر هانسی بیر میللی قورومون و میللی
شخصیتین اخلاق و سیاسی اعتبارینا قارشی اولمامیش، قارالاما، آلچالتما و اتهام
ائتمه کیمی گیریشیمده بولونمامیش‌دیر. گاقپ-ای بوتون ایمکان‌سیزلیغی ایله، بیر دیری
و گوندمده اولان میللی قوروم‌دور. بونو آمئریکادا-آوروپادا سیاسی موتیواسیونونو میللی‌لش‌دیرن
و یا دیشاریدا سیاسی‌لشن کیمسه‌لر بیلمه‌سه ده، ایللر بویو گونئی‌دن قورتولوشو ایزله‌ین
دیرنیش سؤزچوسو بیلمه‌لی‌دیر. بیز، بونا اینانمیشیق کی، هر هانسی یالنیشیمیز میللی
سیاسی حیاتیمیزین قوپولماز بیر پارچاسی‌دیر. آنجاق، مؤهکم تمل‌لریمیز اوزرینده
اولدوغوموز اوچون، یالنیش‌لیق‌دان دؤنمیی ده، یالنیش یولدا اولان‌لاری دا اویارماغی
اؤیرنمیشیک.
3. بیز بونا ایناریریق کی، سینیرلی و هیرسینی اؤنلمزدن اؤنجه
اورتایا قویولان هر هانسی تپکی‌نین آردین‌دان بؤیوک اوتانج دویغوسو آرانابی‌لر. بو
اوزدن،سایین د.تورانین قورتولوشا قارشی سینیردیشی تپکی‌سینی ده بو باغلامدا گؤرور
و بیزی اخلاق‌سیز، دوزمباز، یالانچی، آز قالا دوشمن سیراسیندا یئرلشدیرمه‌سی‌نین
قضاوتینی اؤز ووج‌دان‌لارینا و تاریخه بوراخیریق. دیرنیش بونو بیلمه‌لی‌دیر کی،
قورتولوش اوچون چوخ دیرلی و قارداش قوروم‌دور. قورتولوش پارتیاسی دیرنیش تشکیلاتینا
قارشی اولوم‌سوز احتیمال‌لارین قارشی‌سیندا‌دیر. داوود بیین قورتولوشلا باغلی
گؤزدن گئچیرمک ایستیینه بیز ده قاتیلیریق. قوی داوود بی، قورتولوشو یوز کره گؤزدن
گئچیرسین. بیز امینیک کی، یوز دفعه‌دن سونرا بیزه ساری قوشان یئنه دیرنیش تشکیلاتی
اولا‌جاق‌دیر. قورتولوشون بیل‌دیری‌لری اؤزل آدرئسس‌لره، قوروپباز قوروپ‌لارا دئییل
بوتون آچیق آدرئسس‌لره گؤندریلیر. بیزیم تبلیغات آنلاییشیمیزدا “مجهوللول هؤویه،
ملومولهال” کیمی گیزلی ادبیات یوخ‌دور. بیزده دوست، طرف‌سیز، دوشمن تبلیغات آلان‌لاری
وار. و بیز بون‌لارین هامی‌سینا دوشونجه‌میزین نه اولدوغونو آچیقجاسینا دئییریک.
اؤزلرینی اولوسوموزون آغاسی، باباسی، بانی‌سی، صاحبی کیمی گؤرن‌لرین بیزیم
گؤزوموزدکی آغیرلیق‌لاری یونگول دوشونجه‌لری قدردیر. “هه علیمده کسکین بیچاق وار”
فارسچی رئژیم سایاغی موخالیف دوچونجه‌لری کسرم-بیچرم، مووافیق‌لری ده، کونترولومدا
ساخ‌لارام!” کیمی سوسدورماچی اویون‌لار دا بیزی اؤزگور و باغیم‌سیز یولوموزدان قویاماز!
بیز فیکیر زنگینلیگیمیزله اؤیونوروک. بیزیم سیته‌میز ده، تو-میز ده، دولارلاریمیز
دا میللتیمیزدیر. میللتیمیزه ایناندیغیمیز اوچون نه باشیمیزین اوستونده صاحب، نه
الیمیزین آلتیندا نؤکر توتماریق و توتاماریق دا، چونکی میللتیمیزینیک!
4. 2012-12-15 تاریخینده “قورتولوش”او چیپماق اوچون خسته آغیزلارین بوش
بوغازلارینا فورصت دوشدو. تو آدی ایله چیخیش ائدن صیفیر سویه‌لی بیری‌سی گؤزلرینی یومدو
و کول آغیزینی آچدی. سؤزسوز کی، گاقپ-نین بئله صیفیر سوییه‌لی کوچه آدامی ایله پایلشا‌جاق
قوزو یوخ‌دور! سن اؤز یولونا، بیز آدام‌لیق یولونا!
5. ندن رئفئراندوم ایستیینه قاتیلمیریق؟ ایمضا آتان بوتون
قوروم‌لارین دا وورغوسونا گؤره، ایران آدلانان فارسچی رئژیمین آیدین آنلامدا فاشیست،
راسیست، فوندامئنتال، باسقیچی، آنتی‌تورک و زیددبشر اولدوغو دانیلمازدیر. بئله
آتموسفئرده رئفئراندوم ایستیی:
آ)
سادالانمیش اؤزل‌لیک‌لری ایله دونیادا تانینمیش بو رئژیمه دئموکراتیک چاره
آختارماق‌دیر.
ب)
میللی دیرچلیشین چوخ اینجه دوروموندا اولان آذربایجان تورک میللتینی بیلمه‌دن، رئژیمین
سیاسی دوزاق‌لارینا سوروکلن‌دیرمک‌دیر!
ج)
میللتیمیزین گئد-گئده آیدین‌لاشان میللی یؤنتمینی یئنی‌دن ایران ایچره سیاسی
ساللاق‌خانایا اوغراتماق‌دیر!
د)
میللتیمیزین آچیلان قورتولوش یولونو فارسچی رئژیمین قوندارما، هیلکار سس سیستئمی ایچینده
باغماق‌دیر.
ائ)
میللی قوروم‌لارین اورتاق دوشونجه‌سی حالینه گلممیش چوخ اؤنم‌لی نوفوس و خریته کیمی
تمل دایاق‌لارین رئژیمین مئیدانینا ایتلنمه‌سی! رئژیمین بو چاشباش‌لیق‌دان یارارلانا‌راق
اراضی یاراتما ایستراتئژی‌سینی هامارلاماق‌دیر.
ف)
بو بیر رئکلام‌دیر. بیر اؤن گؤرودور دیگیب ایمضا آتان تشکیلات‌لارین بیلمه‌دن “ایران
مرکزلی فارسجی” اویونا گیرمه‌سی چوخ اوزوجودور. گونئیین میللی سیاسی قورتولوش
ساواشی درین رادیکالیزم طلب ائدرکن باتی‌نین لیبئرال دوشونجه‌لری‌نین گونئیه داشینماسی
چوخ زامان‌سیز و آجیما‌سیز بیر داربا‌دیر.
و
بیر چوخ فاکت‌لارا گؤره، گاقپ-نین بئله اوجوزلوق‌لارا گئتمه‌سی مومکون دئییل‌دیر. بیز گاقپ اولا‌راق نه رئژیمین و نه ایچری‌دکی
آذربایجان میللی حرکاتین چالیشقان‌لاری‌نین بو درجه ساده اولماسینا اینانمیریق. نه
یاخشی کی، اینانان‌لار، اینانمایان‌لارا قارشی سؤیوش، کوچه سؤزو دئییل، دیالوق چاغیریشی
یاپسین‌لار!
گونئی
آذربایجان قورتولوش پارتیاسی‌نین باشقانی
ائلدار
قاراداغ‌لی
2012-12-17
