گؤمرولموش بایاتیلاریمیزین یاسیندا- ائلشن بویوکوند

تك توران : یئنی­دن باشلایاجاغیمیزی دوشونورم، تام یئنی دن ،صیفیر ده­ره­جه­سیندن. تاوانی آغاجدان و دیواری سوواقدان اولان کولتور اوجاقلاریمیزین، باغری چارتلامیش آنا تورپاغین قارانلیغینا گؤمولدویونو و بو میرا­ثین سس سیز جه سینه( صامیتجه سینه) محو اولماسینا اؤز گؤزوموزله تانیق اولدوق. میللتیمیزین یوزلرجه (رسمی قوروملارین یالانچی اینفارماسییاسینا ایستینادن) و میندن چوخ یوخسول و گؤی ایچلی اینسانلارینین اؤلومو بیزی دریندن سارسیتدی.

تورپاغا گؤمولن یالنیز و یالنیز یوخسول اینسانلار دئییل ایدی، آذربایجانیمیزین تدقیق اولونمامیش کولتورو­ و شیفاهی ادبییاتی نی دا بو دئپرئمین(یئر آلتی تکان) سایا و حئسابا گلمه یین ایکینجی قوربانلاری کیمی گؤرمه لی­ییک، منجه. اهر،ورزقان و یوزلرجه کندین اینسانی و کولتورو دئپرمدن اؤنجه، بیر سورو سورموسوز و لاقئید باشچیلارین و قوروملارین قوربانلیغینا چئوریلمیشدی. ورزقان­ ائلچه­سینده (شهریستان) خسته­خانانین اولماماسی، آذربایجانین یوخسوللاشدیریلمیش سیماسینین گئرچک اوزودور.

آذربایجان، بم دئییل می ؟ بم دئپریمینی خاطیرلایین. بم دئپره­مینده اوچاقلار واسیطه سی ایله لئنته چکیلن گؤرونتولرین نه قدر سارسیدیجی ،کدرلندیریجی و ائتگی­لندیریجی اولدوغونو بوتون دونیا دویدو. نه­دن و نه اوچون آذربایجان دا باش وئرن دئپرم نتیجه­سینده یارانمیش خارابالیقلارین بئش دقیقه­لیک بئله لئنته چکیلمیش گؤرونتوسو یوخدور­؟ نه­دن و نه­اوچون اؤلکه­ده میللی ماتم گونو اعلان اولونمادی؟ اؤلن اینسانلار بو اؤلکه­نین وطنداشی دئییل­لرمی؟ نه­دن­لر و نه­اوچون لر چوخدور، ناظیم حیکمت دئمیشکن”درد چوخ،همدرد یوخ”.

بیز ایسه، تورپاغا گؤمرولموش اینسانلارین و کولتوروموزون یاسینی تاریخی یادداشیمیزا یازمالی­ییق.

باشینیز ساغ اولسون