اولوسلاشما و قاراداغ دئپرئمی- اؤیرنجی سسی

تك توران : میللت نه دیر؟ نه کیمی اؤزه للیک لری وار؟ میللت اولماق نه یه یارار؟ نده ن بوتون اینسانی توپلوملار گلیشمه سوره جلرینده بو قدر اولوسلاشمایا اؤنم وئریرلر؟ بو کیمی سورولار چاغداش سوسیولوقلارین توپلوم حاقدا اوغراشدیقلاری ان اؤنملی سورولاردیر. بو سوسیولوقلار چئشیتلی آچیلاردان اولوس قاورامینا یاخینلاشسالاردا بیر قونو اوزره اورتاق بیر دوشونجه لری وار. اودا چاغداش یاشامین ان اوستون اؤزه للیگی اینسانی توپلوملارین اولوسلاشمایا دوغرو یؤنلمه سی دیر.

اولوسلاشما آراجیللیغی ایله بیر چوخ توپلوم گلیشمه یه تانیق اولوب اینسانلاری نین ریفاهی نی تامین ائده بیلیب دیر. اولوسلاشمادان ایراق قالان توپلوملار بو گون ایسه یانلیز اؤزگه اولوس لارین گوجلری آلتیندا سؤمورو بیر یاشام کئچیرمک ده دیرلر.

بوآرادا ان اؤنملی مسئله اولوسون نئجه تانیملانماسی دیر.اولوس سؤزجویو حاقدا چئشیتلی تانیملامالار وار. بیر سیرا دوشونورلر اولوسو اینسانین ذاتی بیر اؤزه للیگی حساب ائدیب تاریخ بویو وار اولدوغونا اینانیرلار. بیر سیرا ایسه مدرن دونیانین اورونو حساب ائده رک چاغداشلیغین اورونو کیمی تعریف ائدیرلر. آنجاق، اولوس قاورامی حاقدا ان اؤنملی وارساییم لار سون زامانلارین آراشدیرمالارینا عائیددیر. بو آراشدیرمالارا گؤره اولوس بیر ائتنیکی وارلیغا باغلی اولاراق، اینسانلار اولوس اولما اینانجینا چاتدیغیندا بیر اینسانی قروپ ایچره اولوس یارانیر. یعنی اولوسو یارانیر و اولوسلاشما بیر توپلومون سئچگین لری نین چابالاری سونوجوندا اورتایا چیخان بیر وارلیق دیر. بئله بیر تعریف ده اولوسو تانیملایان اؤزه للیک لر کیملیک، دیل و دویغو سؤزجوکلرینه دایانماقدادیر. ان اؤنملی سی ایسه دویغو سؤزجویدور. بیر اولوس او زامان وار کی اینسانلاری چئشیتلی اولایلارا قارشی اورتاق بیر دویغودا بولونا بیلسینلر. یعنی یئنی تانیملامالار ذویغو بیرلیگینی اؤنه چکیرلر. اگر بیر توپلوم ایچره بیرئیلر دویغو بیرلیگینه چاتیبسالار او توپلومودا اولوسلاشمادان سؤز ائتمک اولار. دویغو آراجیللیغی ایله بیرئیلرین روحلاری بیر بیرلرینه باغلانیب اولوس آدلی بیر بوتونو اولوشدورورلار.

گونئی آزربایجانین سون دئپرئمینده قاراداغ بؤلگه سی اینسانی بیر فاجیعه نین تانیغی اولدو. آنجاق بو دئپرئم، یانلیز طبیعی بیر اولای چرچئوه سینده قالماییب ایران تاریخی نین ان سیاسی دئپرئمینه بدل اولدو. بو دئپرئم سونوجوندا بیر چوخ قاراداغلی، ییخیلان ائولر آلتیندا قالیب دونیالارینی ده ییشدیلر. بیرچوخودا ایسه یارالانیب و یوواسیز قالدیلار.

بوآرادا گونئی آزربایجانلی لارین بو اولایا گؤره تپگی لری دیققته لاییق دیر. هله ایران مئدیاسی بو اولایی یانسیتمادان اؤنجه بیر چوخ آزربایجانلی دویغولانیب اؤز دیلداشلارینا یاردیما قاچدیلار. گونئی آزربایجانین سیاسی سئچگین لری والده اولان بوتون مئدیالار ایرانین فاشیستی داورانیشیندان سؤز ائده رک بو اولای حاقدا خبری بایکوتو سیندیریب گونئی آزربایجان میللیتچی لری گونئی آزربایجانین مرجعینه تبدیل اولوندولار. بو مسئله او قدر آیدین اولدو کی هم بی بی سی فارسی کیمی گوجلو فارس مئدیاسی بونا اعتراف ائتدی هم حاکمیت بو مسئله یه تپگی گؤسته ره رک بیر چوخ یاردیم کمیته لری نی قاپاتاراق یاردیم اوچون آچیلان حئساب نومره لری مسدود ائتدی. آنجاق یئنه آزربایجانلیلار حاکیمیتین غیراینسانی تپگی سی قارشیسیندا دیره نیب قاراداغلیلارا یاردیم اوچون هئچ نه یی اسیرگه مه دیلر.

دئمک دئپرئمدن سونرا تورک شهرلرینده بؤیوک بیر چابا باشلانیب گونئی آزربایجانلیلار اورتاق بیر دویغو ایچینده بولوندولار. او حالداکی هله فارس شهرلریندن هئچ بیر خبر یوخ ایدی و حاکیمیت چالیشیردی بو مسئله یه اعتناسیزجا داورانا. آما آزربایجان اولوسو اعتناسیز قالا بیلمه دی. نده ن؟ او اوزدن کی گونئی آزربایجان اولوسو دئیه بیر وارلیق ائوره سینده دیر و بو دئپرئمه تپگی بونون ان آیدین تانیغی دیر.

اوست سطیرلرده آنلاتدیغیمیز دویغو بیرلیگی، ایشته بو گون گونئی آزربایجاندا یاشانماقدادیر. بوتون آزربایجانلیلار مئدیالاردا یانسییان فیلم عکس لری گؤز یاشی ایله ایزله دیلر. بو بیر حقیقت دیر کی بیر گونئی آزربایجان تورکو، اؤلموش بیر جوجوغاباخاندا دویغولانیب گؤز یاشی تؤکمه سی و قاراداغا یاردیم اوچون هئچ نه یی اسیرگه مه مه سی و بو یاردیمی اؤزونه بیر گؤره و بیلمه سی اولوسلاشمانین تانیغی دیر. اوحالداکی فارس حاکیمیتی و فارس اولوسو بو اولایا قارشی بئله بیر تپگیده بولونا بیلمیر. دئمک ایران اولوسو دئیه بیر وارلیق آرتیق چؤکمه یه باشلاییب و داغیلان بو وارلیق اوستونده گونئی آزربایجان اولوسو دئیه یئنی بیر وارلیق قورولور. نده نسه گونئی آزربایجان اینسانی آرتیق بیلیرکی اولوسلاشمایینجا بو توپلومون اینسانلاری اینسانی بیر یاشاما یییه له نه بیلمه یه جکلر.