تک توران : قیرمیزی بایراقلار حاضیرلانسین، دایانما هئچ کیم اوچون، یاشا تیراختور تبریز سسی : یاشا یاشا تیراختور / داییم یاشا تیراختور
یوردوموزون ایفتیخاری سان / آذر ائلین قهریمانی سان
یئل لر یاتار توفان یاتار / یاتماز تیراختور بایراغی
سوح داغلاری آت قول لاری / آرخانداییز بیز تیراختور
اوسته گؤرونن نئچه بئیت شئعیر «باریش» قوروپونون «مسعود امیر سئپئهرین» آپاریجیلیغییلا تیراختور ایچون اوخونموش «یاشا تیراختور» ماهنی سینین متینیدیر. بو ماهنی نی دیققتله اینجیله یه نده ایچینده چوخ درین آنلاما تانیق اولماق اولونور. تیراختورو آزربایجان میللتنین ایفتیخاری، سئوگیسی، قهریمانی، دایاقی و بو میللتین دامارلاریندا آخان قیرمیزی قان کیمی گؤسترمک بو ماهنی نین ایچینده اولان آنلامین گؤسترگه سیدیر آنجاق بو آرادا بیر اینجه نوکته ده دیققت چکیجیدیر:
«تیراختورو ان زیروه ده توتماق آزربایجان میللتینین باشقا ایفتیخار یارادان عونصورلارین گؤز آردی ائتمکمی دیر؟»
اوسته کی سورویا یانیت یازماق ایچون تیراختور چرچیوه سینده گئده ن آنلامی بیر قده ر درینده ن اینجه له مک گره کیر. آزربایجانین ایندیکی دورومون نظرده آلاراق بو اؤلکه نین میللتینین ایچینده تیراختور قونوسوندا یاخلاشیق بیر اورتاق دوشونجه یارانمیش. اونون ایچون دیر کی اوسته کی ماهنی دادا تیراختورو آزربایجانین «بیرلیک» سیمگه سی و آزربایجان اولوسونون دایاغی اولاراق گؤرمک اولور و آیدینجاسینا اورادا گؤرونور «یئل لر و توفان لار یاتسادا تیراختورون بایراغی یاتمایاجاق» باشقا دیل ده دئسک آزربایجان میللتینین قالدیردیغی «قیرمیزی سیمگه» دالغالاناراق بو بؤیوک و قهریمان میللت هر زامان یئنیلمکده ن اوزاق قالاجاخدیر.
آمما اوسته کی ایکی پاراقرافی چیزمکده ن آماج ندیر؟ تیراختور ایرانین اوستون لیقاسینا گله نده ن سونرا آزربایجان میللتینین ایچینده بؤیوک اویانیش و ترپه نیش یاراداراق ایران توپلومون تیتره تدی و بو تاکیم اؤنده گئده ره ک آزربایجانین چوخلو گئچمیش لری اولان آمما ضعیفله نمیش تاکیملارینا اؤرنک ایچون ماشین، بلدییه ایسپور (شهرداری) و بئله نچی تاکیملارا اؤزلرین گؤسترمه یه اوره ک وئردی و بئله اولدو کی بلدییه ایسپوردا تیراختوردان بیر ایل سونرا ایرانین اوستون لیقاسینا قالخا بیلدی آنجاق آزربایجان دوشمانلاری بو اؤلکه نین تاکیملارینین گلیشمه یه دوغرو گئتمکلرینده ن فایدالاناراق اونلاری بیر-بیری ایله قارشی-قارشییا قویماغا چالیشدیلار و بو آرادا دوشمانلارین حیله لرین ائتکیسیز ائتمک ایچون و اونلارین چال-چاللیخلارینا و آرا قاتماخلارینا سون قویماق ایچون بیر گئنیش آنلاملی گؤستری «آزربایجان تاکیملاری، فارق ائتمز بویالاری» آدییلا ائشیگه چیخدی کی آزربایجان میللتینین یوکسک دوشونجه سینین گؤستریجیسییدیر آنجاق بو گؤسترینین ایچینده گئده ن درین آنلاما باخمایاراق اونون اوزه رینده اولان باخیشلار بیر اولمامیش دیر. بیر سایی بوجور دوشونورلر کی آزربایجان تاکیملاری بیر-بیرییله اویناسالار سونوج اؤنملی اولمایاراق یالنیز بو تاکیملارین واسیته سییله بو میللتین ایچینده یارانا بیلن «بیرلیک» اؤنملیدیر آمما بو گؤستریده ن باشقا آنلام آلانلاردا آز اولمامیش. اونلار دئییرلر آزربایجان تاکیملاری بیر-بیرییله اویناسالار بوتون گوج لرین آرایا قویمالی و سونوج مئیداندا بلیرلنمه لیدیر آمما بو آرادا بیر قوشولدا (شرط-ده) وار کی یاردیمجیلار قارشی تاکیمین سایغیسین ساخلامالی و هر جور ایهانتده ن اوزاق دورمالیدیرلار. بئله دئییل آزربایجان تاکیملاری بیر-بیری ایله اویناسالار بیریسی او بیریسین اوتماقدان واز کئچسین بو باخیشلا کی آزربایجان تاکیملاری گره ک دوروب مئیداندا بیر-بیرینین اوزونه باخسینلار. فوتبولا بئله نچی باخیش نه ایراندا و نه دونیانین هئچ یئرینده اولمامیش.
هر هالدا اوسته بو قونو کیفایت قده ر آچیلدیغی ایچون اونو آرتیق اوزالتماقدان واز کئچیریک. اود گونو (چرشنبه گونو) بلدییه ایسپور-تیراختور تاکیملاری آزربایجانین «سهند» ایستادییوموندا بیر داربی کئچیرده جک لر کی اونو «ائل داربیسی-ده» آدلاندیرماق اولار. تیراختورون ایندیکی دورومون نظرده آلاراق و شامپییونلوغا دوغرو یوخاری هیزله گئتدیگی ایچون بو اویوندا اوغور قازانماغا چوخلو ائهتیییاجی وار. قارشی یؤنده بلدییه ایسپوردا اؤزونون دورومونا باخاراق بوتون گوجو ایله تیراختورون قارشیسینا گلمه لیدیر. اومود کی آزربایجان میللتی بیر دوزگون و آزربایجانا یاراشان یاریشمایا تانیق اولوب و سونوج هر نه اولسا آزربایجانین یارارینا اولاجاخدیر آنجاق بیز تیراختورچو اولاراق بوتون دویغوساللیقلاردان اوزاق دوراراق و بلدییه ایسپورا سایغی گؤستره ره ک تیراختورون هئچ تاکیمین قارشیسیندا دایانماسین ایسته مه ییب و سئودیگیمیز تاکیمین اوغور قازانماسین ایسته ییریک.
«بیرلیک ایددیعا ایله یاراناماز، بیرلیگیمیزی عملده گؤسترمه لیییک».
یاشاسین تیراختور
یاشاسین آزربایجان
یاشاسین بیرلیگیمیز
پورتال هواداران تراختور
