تک توران : یئنی-گاموح باشقانی، دوکتور لطیف حسنی؛
دوکتور لطیف حسنی، 1349- جو ایلده گؤنئی آذربایجانین خلخال شهرینده آنادان اولموش. اورتا مکتبی مازندرانین رامسر شهرینده اوخوموش و کرج یونیورسیته‌سی‌نده سیاسی علم لر اوزره لیسانس آلمیشدیر.
تحصیلاتی‌نی اولوسلار آراسی حوقوق (حقوق بین الملل) ساحه‌سی‌نده داوام ائتدیرن لطیف بَی حسنی، یوکسک لیسانس و دوکتورلوق (PHD) مدرکی‌نی باکی دوولت یونیورسیته‌سیندن آلمیشدیر. دوکتور حسنی ایندیه‌جن دفعه‌لرجه ایران اطلاعاتی طرفیندن سورغولانمیش و ایرانین 8-جی مجلیس و شورای شهر سئچکی‌لرینه آدای (نامزد) اولسا دا، صلاحیتی رد اولموشدور. 1389-جو ایلین خرداد آییندا توتوقلاندی و 220 گون تبریز اطلاعاتیندا ایشکنجه گؤردوکدن سونرا، گاموح تشکیلاتی‌نی قورماق اتهامی ایله محاکمه اولدو کی، ایندیلیک ده یوز میلیون تومن وثیقه ایله مووقت اولاراق، سر بست‌دیر.دوکتور لطیف حسنی، ائولی‌دیر و حال حاضیرده کرج شهرینده یاشاییر. او یئنی-گونئی آذربایجان میللی اویانیش حرکاتی (یئنی گاموح)-نین باشقانی‌دیر.
1 - سیزجه میللی بیرلیک نه دئمک دیر؟ بیرلیگی نئجه تعریف ائدیرسینیز؟
میللی بیرلیک، میللی منافع اوغروندا هر هانسی شخصی و تشکیلاتی ماراقلاردان داشینماق ضرورتی‌دیر. باشقا سؤزله، میللی منافعی اؤز شخصی و تشکیلاتی ماراقلاردان اوستون توتماق ضرورتی دیر .
2 - میللی حرکت آتمسفرینده تعریفله‌دیگینیز میللی بیرلیگین نه اؤنمی وار؟ آیریجا بوگونکو دورومدا میللی بیرلیگه نه گرک وار؟
اؤنمی اوندادیر کی، آتالاریمیز دئمیشکن "گوج بیرلیک‌ده‌دیر". بیرلیک بوتؤو دئمک‌دیر. بوتؤو یعنی چاتیشمایان جهت‌لردن آرینمیش بیرکامیل‌لیک‌دیر. میللی حرکت آتمسفرینده بیرلیگین گرَگی اوندادیر کی بیرلیک، دیریلیک دیر. میللی بیرلیک، میللتیمیزی میللی آماجلارا دوغرو سورعتلی حرکت ائتمه‌یه سفربر(بسیج) ائدر .
-3میللی بیرلیک نئجه یارانا بیلر؟
میللی بیرلیک، میللی زمینده چالیشان تشکیلاتلاریمیز طرفیندن یارانمالی‌دیر. بو تشکیلاتلاری دا اورتاق بیر مخرجه گتیرمک اوچون میللی حرکتده اوستون (غالیب) سویلم یارادیلمالی‌دیر. نییه کی، غالیب سویلم یارانمایانا دَک بیز بیر منطیقی فضادا چالیشا بیلمه‌یه‌جه‌ییک. اورتاق مخرجه گلمک‌ده بوتون تشکیلاتلار طرفیندن قبول اولونموش سیمگه‌لرین رولو داها اؤنملی دیر. بو سیمگه لر ایسه میللی لیدئر و بایراق‌دیر. سییاسی تشکیلاتلاریمیز میللی لیدئرین اورتایا چیخماسیندا یکدیل قرارا گلمه‌لی‌دیرلر. بیر لیدئر کی، گئتدیکجه گونئی آذربایجان میللتی‌نین اعتمادینی قازانیب و میللتیمیزی اؤز مقدراتینی تعیین ائتمک یؤنونده سفربر ائده بیلسین. بایراق دئدیکده ایسه دؤولت بایراغی آنلامیندا اولمامالی‌دیر. دؤولت بایراغی آنجاق دؤولت قورولدوقدان سونرا یارانمالی‌دیر. آنجاق ایندی میللی حرکتیمیزی باشقا حرکتلردن فرقلندیرن و گونئی آذربایجان حرکتینی تمثیل ائدن بیر سیمگه اولمالی‌دیر
4 - میللی بیرلیگین ایره‌لی سورمه‌سینه نه یؤنتملر اؤنریرسینیز؟
گونئی آذربایجانا عایید اولان بوتون سییاسی پارتیالار، گونئی آذربایجان میللتی‌نین اؤز مقدراتینی تعیین ائتمک حوقوقونا اینانیرلار. بو ایسه بیرلشمک اوچون اورتاق بیر مخرج اولا بیلر. اینانیریق کی میللی حرکتده بیرلشمک پرینسیب‌لر اساسیندا اولمالی‌دیر. بئله کی اؤنجه پرینسیب‌لری و مئتودلاری بیر بیرینه یاخین تشکیلاتلار بیرلشمه‌لی و جبهه‌لر یارانمالی، سونرا بوتؤو بیر جبهه‌نین یارانماسی اوغروندا پرینسیب‌لر اوزرینده دیالوق‌لار باشلامالی‌دیر. تشکیلاتلار آراسی یاخینلاشماق، دیالوق، ایش بیرلیک و دئموکراتیک بیرلشمک‌دن سونرا، بیرلیک اوچون باشقا یول تصوور ائتمک مومکون دئییل .
5 - میللی بیرلیگین یارانماسیندا اوزَل اولاراق میللی حرکتده چالیشان تشکیلاتلار، او جومله‌دن "یئنی گاموح" تشکیلاتی‌نین یئرینی و گوره‌وینی نئجه گورورسونوز؟
"یئنی گاموح" اوزون مدت اولکه داخیلی و خاریجینده فعالییت گؤسترن تجروبه‌لی کادرلارا مالیک‌دیر. ائله بیر کادرلار کی، زامانین سیناغیندان اوغورلا چیخیب، گونئی آذربایجان میللی فعاللاری آراسیندا قارشیلیق‌لی اعتماد قازانیبلار. "یئنی گاموح" بو کادرلارین سایه‌سینده بوتون میللی حرکتین گوجونو بیر آرایا گتیره‌رک فعاللار آراسیندا بیر اورتاق ادبیاتا چاتاراق، کوتله- میللت ایچینده حسساس شراییط‌ده میللتی سفربر ائتمه‌یه و کاریزماتیک و اینقلابی چهره‌لر تانیتماغا گوره‌ولی‌دیر. بونا دایانارکن یئنی گاموح اولاراق یوخاری‌داکی سورودا اشاره ائتدیگیم استراتژی اساسیندا، بیر نئچه تشکیلاتلا موذاکیره‌لر ایچینده‌ییک و اومود ائدیرم تئزلیکجه موثبت سونوجلارینا شاهید اولاق.
6 - سونوندا بو قونو ایله ایلگیلی سؤزونوز وارسا بویورون؟
گونئی آذربایجان میللی حرکتینده اولان موجود تشکیلاتلار داغینیق آدالارا بنزه‌ییرلر و حاکمییت اونلاری حاصارا آلیب یوخ ائتمه‌یه قدَر گوجلودور. تشکیلاتلاریمیز گوجسوز اولدوقلارینا گؤره تام اولاراق استقلالییت‌لری یوخدور و راحاتجاسینا اونون بونون تاثیری آلتینا دوشرک بیرلیگه گئدن یولدا آددیملایا بیلمیرلر.
تشکیلاتلاریمیزدا بیرلیگین یارانماسی هئچ ده کاغیذلار اوزه‌رینده یازیلدیغی کیمی راحات دئییلدیر. اونلاردا ایلک اؤنجه دؤزوملولوک حیسسی یارانمالی‌دیر. تشکیلاتلاردا دؤزوملولوک حیسسی تجروبه اولونمادان اونلارین شوعارلارینا و یازیلارینا اعتماد ائتمک اولماز.
