تک توران : آزه‌ربايجان رئسپوبليكاسينين يوروويژين تانيتيميني ياپان توغرالي (رسمي) دوشه‌رگه‌له‌رين بيرينده، تانيتيم آماجلي بير يازي يايينلانميشدير:
١-يازيدا ديليميزين آدي روسيا كومونيست پارتيسينين ١٩٣٧ده اويدوردوغو Azerbaijani (آزه‌ربايجانجا) اولاراق وئريلير، اويسا بيزيم ديليميزين آدي توركجه و اينگيليزجه‌سي Turkish دير. توركييه توركجه‌سينده‌ن آييرت ائديلمه‌سيني ساغلاماق ايسته‌نيرسه، اونا Azerbaijan(ian) Turkish دئيله‌بيله‌ر.
٢-اينگيليزجه‌ده ايشله‌ديله‌ن Azerbaijani، آزه‌ربايجان آدينا فارسجا نيسبيييه‌تي گؤسته‌ره‌ن –ي سون اكي آرتيريلاراق تؤره‌ديلميشدير. توركجه‌نين اينگليزجه‌ده بيله فارسجا بير آدلا آدلانديريلماسينين قبول ائديله‌بيلير هئچ بير ياني و آچيقلاماسي اولابيلمه‌ز.
٣-يازيدا تورك خالقينين آدي آزه‌ري دييه سونولور. قوندارما بير ائتنيك-ميللي آد اولان آزه‌ري، ان باشدا فارس دئوله‌تي اولماق اوزه‌ره سؤمورگه‌چي- عيرقچي گوجله‌ر طره‌فينده‌ن تورك خالقيني آدلانديرماق اوچون قوللانيلير. تورك خالقيني آزه‌ري آدلانديرماق، تورك خالقي و كيملييينه قارشي آچيق دوشمه‌نليكدير. بئله اويدوروق و كولونييال آدي ايشله‌تمه‌ك، اونو منيمسه‌يه‌نله‌رين ميللي-ائتنيك آچيدان كيمليكسيزله‌شمه‌سينين ان آچيق قانييتيدير.
٤-يازيدا (توركجه) تكجه توركييه‌نين ديلي دييه گؤسته‌ريلير. بو دا يوخاريدا ده‌يينيله ن يانليش و آنتي تورك آنلاييشين سونوجودور. بورادا آنتي تورك آنلاييشدان آماج، آزه‌ربايجان و ايراندا ياشايان تورك خالقينين ميللي آدي و ميللي كيملييي اولان توركو دانماقدير. بوتون دونيا بو گرچه‌يي آچيقجا بيلمه‌لي و اونونلا باريشماليدير: گونئي آزه‌ربايجان و ايراندا ياشاماقدا اولان خالقيميزين ميللي-ائتنيك آدي تورك و ديلينين آدي توركجه‌دير.
٥-يازينين تاريخله ايلگيلي بؤلومونده ماننا دئوله‌تي يانليشليقلا طايقا دييه سونولور، مئدله‌ر بير يئرده طايفا، آيري بير يئرده طايفالار اولاراق تانيديلير. اويسا بو دئوله‌تله‌ري قوران و يؤنه‌ته‌نله‌رين طايفا اولوپ اولماديقلاري، طايفا ياپيلي ايسه‌له‌ر بيله، تك بير طايفا مي يوخسا طايفالار كونفئدئراسييونو گؤرونومو وئرديكله‌ري بيليم چئوره‌له‌رينده هله ده تارتيشما قونوسودور.
٦-يازيدا مئد طايفالارينين سويجا هيند-آوروپا كؤكه‌نلي اولدوقلاري ايدديعا ائديلير. اويسا مئد طايفالاريني اولوشدوران قوروپلارين ائتنيك كؤكه‌ن و دانيشديغي ديلله‌رين قونوسو، بيليم چئوره‌له‌رينده كسينليك قازانماميشدير. بيلينه‌ن كسين اولقو ايسه، مئدله‌ري اولوشدوران چئشيتلي طايفالار آراسيندا هيند-آوروپالي طايفالارين بولونماسي كيمي، هيند-آوروپالي اولمايان طايفالارين دا بولوندوغودور.
٧-يازيدا مئد طايفالارينين چاغداش كوردله‌رين آتالاري اولدوقلاري ايدديعا ائديلير. مئدله‌رين كوردله‌رين آتالاري و كوردله‌رين مئدله‌رين داوامي اولدوقلاري ايدديعاسي بيليم ديشيدير. اون دوققوزونجو يوز ايلين سونلاريندا بير سيرا روس دوغوبيليمچيله‌ر طره‌فينده‌ن ايله سوروله‌ن و داها سونرالار چورودوله‌ن بو بيليم ديشي گؤروش، گونوموزده تكجه آشيري كورد ميللييه‌تچيله‌ري طره‌فينده‌ن ساوونولور. ديلچيليك آچيسيندان ايسه مئد ديلله‌رينين داوامي اولابيله‌جه‌ك ديلله‌ر، گونئي دوغو ايرانيك ديلله‌رده‌ن ساييلان كورد ديلله‌ري دئييل، كاشان چئوره‌سينده‌كي اورتا ايران ديلله‌ري و تئهران چئوره‌سي تاتيك ديلله‌ريدير.
٨-آزه‌ربايجانين تانيدان بير يازيدا، كورد آشيري ميللييه‌تچيله‌رين گؤروشله‌ريني جارلاماق، مئدله‌رين كوردله‌رين آتالاري اولدوقلاري كيمي بوش بير ايدديعاني ساوونماق، حتتا كورد خالقيني سؤز قونوسو ائتمه‌ك، اولاغان اوستو آبسورد بير داورانيشدير.
٩-آزه‌ربايجاندا حاضيرلانان و آزه‌ربايجان تانيتيمينا آدانميش بير يازيدا، آزه‌ربايجانين تمه‌ل ائتنيك قوروپو اولان تورك خالقينين آدي، وارليغي و كيمليييني دانماق؛ آلبان، مئد، عره‌ب و كورد كيمي تورك اولمايان دئوله‌ت و ائتنيكله‌رده‌ن سؤز آچيپ، آنجاق تورك ائتنيسيته‌سي و تورك دئوله‌تله‌رينده‌ن سؤز ائتمه‌مه‌ك، تورك خالقي و آزه‌ربايجانين توركول (توركيك) دونياسي و خالقلاريندان اولدوغو گرچه‌ييني گيزله‌تمه‌ك، اوتانج وئريجي بير دورومدور.
١٠-يازيدا توركمانچاي آنلاشماسينين اورتايا چيخماسي نده‌نله‌ري آراسيندا، توركييه، روسييا و ايران دئوله‌تله‌ري آراسيندا آنلاشمازليقلار گؤسته‌ريلير. بو گؤروش، روسييانين كولونيياليست و ايشغالچي گؤروشودور. توركمانچاي آنلاشماسينين اورتايا چيخماسيندا توركييه و يا او زامانكي عوثمانليلارين رولو اولماميشدير. اصيل سوروملو اولان ايسه، روسييانين ايشغالچي، ياييلماچي و سالديرقان سيياسه‌تله‌ري اولموشدور.
١١-يازيدا توركمانچاي دؤنه‌مينده آزه‌ربايجاندان اؤلكه اولاراق سؤز ائديلير. اويسا او دؤنه‌مده آزه‌ربايجان اؤلكه آدي دئييلدي، جوغرافي بير بؤلگه و ايرانين ايداري تقسيماتيندا سيياسي بير واحيدين-بيريمين آدي ايدي. آرتي، سؤزو ائديله‌ن دؤنه‌مين رسمي بلگه‌‌له‌رينين چوخوندا بو جوغرافي و اؤزه‌لليكله ايداري تقسيماتداكي بيريمه، بوگونكو آزه‌ربايجان رئسپوبليكاسي داخيل دئييلدي.
١٢-يازيدا آلبان طايفالاري و ديلي كيمي قونولارا ده‌يينيله‌ره ك بونلار بوتون آزه‌ربايجانا مال ائديلير. اويسا آزه‌ربايجان دئييله‌ن جوغرافي بؤلگه ايراندا تئهران، اراك، ملايئر ايله سونقور و آنادولودا ارزوروما قده‌ر اوزانان گئنيش بير جوغرافي آلانين آديدير. بوگونكو آزه‌ربايجان رئسپوبليكاسي ايسه بو ائتنيك آزه‌ربايجانين تكجه يوزده ييرمي-اوتوزونو اولوشدورور. دولاييسي ايله آزه‌ربايجانين بير بؤلگه‌سيني ايلگيله‌نديره‌ن آلبانلار كيمي وارليقلار، بوتون آزه‌ربايجانا مال ائديله‌بيلمه‌ز.
١٣-يازيدا تورك خالقينين مذهه‌بي شيعه اولاراق بيلديريلير. بئله بير تثبيت، تورك خالقيني فارسلاشديرماغا قوللوق ائده‌ر. شيعه گنه‌ل بير آددير و اونون ائتنيك چئشيتله‌نمه‌له‌ري واردير. اؤرنه‌يين فارسلارين ايمامي شيعه‌لييي ايله توركله‌رين جعفه‌ري شيعه‌لييي آراسيندا فرقليليكله‌ر واردير. بو فرقليليكله‌ري گؤرمه‌ك و گؤسته‌رمه‌ك و اونلاري هر يئرده وورقولاماق و آبارتماق، تورك خالقينين ميللي چيخارلارينا اويقون اولدوغو كيمي، بونلاري گؤرمه‌مه‌ك و سيليكله‌شديرمه‌ك ده تورك خالقينين ميللي چيخارلارينا ترسدير.
١٤-تانيتيم يازيسيندان بير سيرا گؤنده‌رمه‌له‌ر، اؤرنه‌يين زردوشت`ه و آتروپاتئن آدينا توخونماق، آنيقلانان (حاضيرلانان) بلجيكده (آمبلئمده) اودلارين ايشله‌ديلمه‌سي ده يانليش آنلامالارا نده‌ن اولابيله‌ر. چونكو بونلار دونيادا گنه‌لده ايرانيليكله باغلانتيلي و ايرانليليق كيملييينين پارچالاري اولاراق آلقيلانير.
