تک توران : گونئي آذربايجان ميللي حرکاتينا منسوب 15 فعالين چوخ قيسا سوره ايچينده و آردي-آردينا توتولمالاري آناليز ائديلمه‌سي گرکن اؤنملي مسئله.
بو سيلسيله توتوقلامالارا باخديغيميزدا گؤروروک کي:
آ.گونئي آذرباايجانين ميللي حرکاتينين ان سسسيز دؤنمينده گرچکلشير.
ب. جوغرافي اولارق گئنيش وهارداسا گونئي آذربايجانين هر طرفينده فعاللار توتوقلانير.
ج. بو توتوقلاملار ميللي حرکاتين بوتون سياسي يئلپازه‌سيني قاپسايير.باشقا بير سؤزله بو توتوقلامالار بللي بير سياسي خطده و يا بللي بير سياسي تشکيلاتا يؤنئليک دئييل، ميللي حرکاتين بوتونونو قاپاساياجق شکيلده ايجرا ائديلير.
د. آرديجيل و چوخ قيسا سوره ايچينده توت-ها-توت باشلاييب. رئژيمين عجله سي اولدوغو گؤرسه‌نير.
ی . گؤرونوره باخيلديغيندا بو قدر عجله ايله توتوقلامالاري گرکديره‌جک هادد بير دوروم يوخدور.
ايران رئژيمي نه هدف تعقيب ائدير؟
ميللي فعاللارين توتوقلانماسي مجليس سئچکيلرينين ياخينلاشديغي، ايران و قرب آراسينداکي موناقيشه‌لرين جيدي شکيلده يوکسلديگي،اؤلکه ايچينده‌کي ايقتيصادي وضعيتين خارابلاشديغي و رئژيم داخيلي ايختيلافلارين قانلي حسابلاشمايا چئويريله‌جگي احتيماللاري دانيشيلديغي زاماندا گرچکلشير.آناليزيميزي يوخاريداکي عاميللر اساسيندا ايره‌لي آپارماليييق.
يوخاريداکی سايديغيميز عاميللره داياناراق` ايران رئژيمي نه هدف تعقيب ائدير؟` سوالينا دؤرت جاواب وئرمک مومکوندور:
1. ايراندا مجليس سئچکيلري ياخينلاشير. ايران رئژيمي مجليس سئچکيلري عرفه سينده و سورجين اورمو گؤلو مسئلسينده اعتيراض حرکاتينين اورتايا چيخماسيندان قورخور.مجليس سئچکيلرينين اعتيراض ساحه سي اولابيلجئيي احتيمالي بو گؤزالتيلارا/ بازداشتلارا سببييت وئربيلر.
2. ايران و قرب آراسينداکي موناقيشه‌لر جيدي شکيلده يوکسه‌لير.ايران رئژيمي بئله زامانلاردا سرکوب سيياستيني آرتيرير. دئمک کي، رئژيم داخيلده گيزليجه`قيرميزي آلارم` دؤنه‌مي ائلان ائديب. بئله زامانلراد ا ايران رئژيمي `وور قاچ` تاکتيگي تعقيب ائدر.
3. ايران رئژيمينين يؤنتيجيلري/ ايداره‌چيلري مجليس سئچکيلرينين قانلي اولابيله‌جگيني دوشونورلر. بو مسئله نی خامنه ای اؤزو بئله نئچه سفرديله گتيرديگيني ده بيليريک. ايران رئژيمينين اؤن گؤروله رينه گؤره اؤزلليکله خامنه اي و احمدينژاد طرفدارلاري آراسيندا توققوشماياشانما احتيمالي وار. ايران رئژيمي اينديدن آذربايجاندا قورخو اورتام يارداراق اونون پاسيولشديرمگي هدفله‌يير. اصلينده ايران رئژيمي ايسته‌يير کي، رئژيم داخيلي ايختيلافلار توققوشمايا دؤنوشدويونده آذربايجان سسسيز قالسين. گونئي آذربايجانداکي سون توتوقلامالار دالقاسي يوخاريداکي هدفلره دؤنوک اولابيلر.
4. ايران و قرب آراسينداکي موناقيشه‌لر جيدي شکيلده يوکسه‌ليب. اؤلکه ايچينده ايقتيصادي وضعيت چوخ آغيرلاشيب. رئژيم اؤز ايچينده چوخ جيدي، درين و هر طرفلييختيلافلار ايچينده چابالايير.اؤلکه داخيلينده ` بو رئژيمين عؤمروندن آز قالير` فيکري چوخ ياييلير.ايران رئژيمي بو شراييطده ميللي حرکاتين هم بؤيومه‌سيندن هم ده گيزلي تشکيلاتلانماسيندان قورخور.
سون تحليل ده، ايران رئژيمي ياشاديغي داخيلي و خاريجي گرگينليکلر سببييله گونئي آذربايجان ميلي حرکاتينين ايراده‌سيني قيرماق ايسته يير. اصلينده قورخو اورتامي/ شرايطي ياراداراق ميللي حرکاتيني پاسيولشديرمک ايسته يير. بو واسيطه ايله ميللي حرکاتين اويون ساحه سيني دارالتماق و اونون ميللي اينسيياتيفي اله گئچيرمه ايرادسيني قيرماق ايسته‌يير.دئمک کي، ايران رئژيمي گونئي آذربايجانليلارين عصيان ائده‌جکلريندن قورخور.
24-01-2012
آنکارا
