"اورمو گؤلو جان وئرير" باش قالديريسي تورك خالقينين ايران و ايران دئوله‌تينه اولان معنه‌وي باغلارينين قوپما سوره‌جينده تاريخي بير آتيليم ايدي. بو قييام، اوزون بير سسسيزليك دؤنه‌مينده‌ن سونرا يئنيده‌ن تورك خالقيندا ميللي روحون ديرچه‌لمه‌سينه نده‌ن اولدو؛ اورمودان باشقا باشدا تبريز اولماق اوزه‌ره آزه‌ربايجان`ين اؤته‌كي شهه‌رله‌رينده تورك كيتله‌له‌رينده قيپيردانما و ترپه‌نمه‌له‌ر ياراتدي. بو قييام سيراسيندا تورك و آزه‌ربايجانلي قوروپلارين تپگيسي و پئرفورمانسي، چوخ داها يئيين، هؤرگوتلو و باشاريلي اولموشدور. بو اوزده‌ن ده اورمو گؤلو جان وئرير قييامي، ايران ايچي و ديشي مئديياسيندا دا بللي اؤلچوده يانقي تاپابيلدي. آنجاق بونا پارالئل اولاراق، فارس و كورد قوروپلارينين بو اولايلاري موصاديره ائتمه چابالاري دا داها آرتميش و قارماشيقلاشميشدير.
ايران ايرقچي فارس قوروپلاري، ياشيل حره‌كه‌تچيله‌ر و يوردديشيندا اولان فارس اوپوزيسييونو، اورمو گؤلو جان وئرير قييامي قارشيسيندا ايلك گونله‌رده سسسيز قالماني يئيله‌ديله‌ر. آنجاق داها سونرا بو حره‌كه‌تله ايلگيله‌نمه‌يه باشلاديلار. فارس قوروپلار، ياشيلچي شخصيه‌تله‌ر و جمهوري خواهانلاردان پان ايرانيستله‌رله جبهه ملي و شاهزاده رضا پهلوي`يه ده‌ك، بو حره‌كه‌تله ايلگيلي بير سورو بيلديري ياييينلادير، اورمو گؤلو آديندا اينترنئتده صفحه‌له‌ر آچيپ كامپانيالار باشلاتديلار. اونلارين آرخاسينجا كوردله‌ر ده بو حره‌كه‌ته قوشولماغا باشلاييپ، اورمو گؤلو اولاييني كوردوستان و آزه‌ربايجانلا كورد و تورك ميلله‌تله‌رينين اورتاق سورونو اولدوغونو ايدديعا ائتديله‌ر، بو دوغرولتودا اؤز مئدييالاريندا يازي و يايينلار ياپيپ، اينتئرنئتده صحيفه‌له‌ر آچديلار.
فارسلار نه ائتمه‌ك ايسته‌يير:
اليف-فارس ياشيلچيلار و اونلارين تورك-آزه‌ربايجانلي قويروقجوقلارينين بو حره‌كه‌ته ياخينلاشماسي، تورك خالقيني اؤزله‌رينه ساري چكه‌ره‌ك، گوجسوز و بؤلگه‌سه‌ل اولان ياشيل حره‌كه‌تله‌رينه گوج قازانماق و اونو آزه‌ربايجانا دا يايماق اوچوندور. آيريجا اونلار اورمو گؤلو جان وئرير قيياميني ياواش ياواش موصاديره ائده‌ره‌ك، اؤزه‌لليكله يوردديشي گوجله‌ره بونون اؤز حره‌كه‌تله‌رينين بؤلگه‌سه‌ل بير دال و قولو اولدوغونو گؤسته‌رمه‌ك آماجيني داشيييرلار.
بئ-فارس اوپوزيسييون قوروهلارين گنه‌ل اولاراق اورمو گؤلو اولايي ايله ايلگيله‌نمه‌سينين آماجي ايسه، بو حره‌كه‌ته صاحيب چيخماق، اونو موصاديره ائتمه‌ك و اونون موديرييه‌تيني توركله‌رين الينده‌ن چيخارتماقدير. اونلار و يابانجي رادييولارين فارس بؤلومله‌ري، يايديقلاري بيلديريله‌رينده و ياپديقلاري گؤسته‌ريله‌رينده، تورك خالقينين ائعتيراضيندان دئييل، آزه‌ري ديلليله‌رده‌ن (آذري زبانان)؛ بير چوخو آزه‌ربايجان دئييل، ايران`ين قوزئي باتيسيندا اولان اولايلاردان دانيشيرلار. اونلار اورمو گؤلونو بير آزه‌ربايجان گؤلو دئييلدير، بير ايران گؤلو اولدوغونو و بو سورونون تورك خالقينين سورونو دئييل، ايران ميلله‌تينين سورونو اولدوغونو ايله‌ري سورورله‌ر. بونونلا دا تورك خالقيندا ميلله‌ت بيلينجينين و آزه‌ربايجان وطه‌ني قاورامينين اولوشماسيني اؤنله‌مه‌ك ايسته‌ييرله‌ر.
كوردله‌ر نه ائتمه‌ك ايسته‌يير:
كورد قوروپلارينين اورمو گؤلو جان وئرير قييامينا ياخينلاشماسي اييي نييه‌ت و گونئي آزه‌ربايجاندا تورك خالقينين قارشيلاشديغي بير فاجيعه‌ده اونا دسته‌ك وئرمه‌ك آماجييلا دئييلدير. اونلارين بو اولايا ياناشماسي بوتونويله سو-يي نييه‌ت (سوء نيت، آرد نيييه‌تليليك) سونوجودور. كوردله‌ر بو اولايلا ايلگيلي يايين و ائيله‌مله‌رينده، اورمو گؤلونو و اورمو شهه‌رينين دوغو كوردوستاندا اولدوغونو و بو سورونون ايكي تورك و كورد خالقلارين سورونو اولدوغونو تبليغ ائديرله‌ر. بوندان دا آماجلاري، اؤزله‌رينين اوزون وعده‌لي ايستيراتئژي و هده‌في اولان، باتي آزه‌ربايجان`ي كوردوستان گؤسته‌رمه و اونون كوردوستانا ايلحاق ائتمه‌سينه شراييط ياراتماقدير.
نه ياپيلمالي:
فارس و كورد قوروپلارينين تورك خالقي و آزه‌ربايجان`ين باشلاتديغي اورمو گؤلو جان وئرير قيياميني، و گنه‌ل اولاراق بوندان سونرا ياپاجاغيميز باشقا ائيله‌م و آياقلانمالاري چالمالاري و اوغورلامالارينا ايذين وئريلمه‌مه‌ليدير. بونون يوللاري، قونونو قامو اويوندا تارتيشاراق آرانماليدير. آشاغيدا ياپيلابيله‌جه‌ك نئچه اؤنله‌مي سونورام:
١-توركجه يازيلي شوعارلار: اورمو گؤلو جان وئرير قيياميندا اولدوغو كيمي، بوتون ائيله‌م و گؤسته‌ريله‌رده، اونلارين آزه‌ربايجان و تورك خالقينا عاييد اولدوغونو وورقولايان و گؤسته‌ره‌ن شوعار و پيلاكارتلار اولماليدير. بو شوعار و پيلاكارتلارين ديلي توركجه اولمالي و ايچه‌ريكله‌رينده ده او ائيله‌م و گؤسته‌ري ايله ايلگيلي اؤزه‌ل شوعارلار يانيندا، هر زامان توركلويو وورقولايان (هاراي هاراي من توركه‌م؛ تورك ديلي رسمي اولسون، مدره‌سه‌ده اوخونسون؛ ....) و آزه‌ربايجان`ي اؤيه‌ن (آزه‌ربايجان وار اولسون؛ ياشاسين آزه‌ربايجان؛ ...) كيمي گنه‌ل شوعار و پيلاكارتلار دا وار اولماليدير. چونكو "هاراي هاراي من توركه‌م" دييه‌ن بير ائيله‌مي فارسلار و "ياشاسين آزه‌ربايجان" دييه‌ن بير گؤسته‌ريني كوردله‌رين چالماسينا ايمكان يوخدور. بونلارين فارس و اينگيليز ديلله‌رينده وئريلمه‌سي ده يارارليدير.
٢-آزره‌بايجان و توركييه‌ده دسته‌ك گؤسته‌ريله‌ري: بو قييامدا توركييه‌ده اولان گونئيليله‌ر ايستانبول، آنكارا و ايزميرله قايسئريده گؤسته‌ريله‌ر ياپديلار. بو سون دره‌جه اؤنه‌ملي و ده‌يه‌رلي بير گليشمه ايدي. آنجاق آزه‌ربايجان جومهورييه‌تينده باكي`دا ياپيلان كيچيك بير گؤسته‌ريده‌ن باشقا، هر هانسي بير ائيله‌م گؤرولمه‌دي؛ بو اولدوقجا اولومسوز و اوزوجو بير دورومدور. اويسا گونئيده خالقين ياپديغي بوتون قييام و ائيله‌مله‌ري آزه‌ربايجان جومهورييه‌تي و توركييه‌ده دسته‌كله‌يه‌ن گؤسته‌ري و ائيله‌مله‌ر ياپيلماليدير. بئله‌جه بو قييام و ائيله‌مله‌رين ايران يا كوردوستانلا دئييل، تورك خالقي و آزه‌ربايجانلا ايلگيلي اولدوغو وورقولانيپ اورتايا چيخاجاقدير.
٣-اولوسلارآراسي قوروملارا دوغرودان ايلگي قورماق، بير باشا يازي يازماق: فارس قوروپلار اؤزه‌لليكله ديشاريدا اولانلار، اولوسلارآراسي قوروملارا اورمو گؤلو ايله ايلگيلي، ايران ميلله‌تي آدينا و كسينليكله تورك خالقيندان هر هانسي بير آد آپارمادان مكتوبلار يازيرلار. بونونلا دا بو اولايلارين ايران`ين بير ميللي اولايي و ايران ميلله‌تينين سورونو اولدوغونو گؤسته‌رمه‌ك ايسته‌ييرله‌ر. آيريجا بو قييام و ائيله‌مله‌رين هيدايه‌ت و يؤنه‌تيميني اؤز ال.له‌رينه آلماق، تورك خالقينين باشلاتديغي و هزينه وئردييي ائيله‌م و گؤسته‌ريله‌ري، گينه ده فارسچيليق و ايرانچيليق آدينا موصاديره ائتمه‌ك ايسته‌ييرله‌ر. بونا كسينليكله ايذين وئريلمه‌مه‌ليدير. بونو ياپمانين بير يولو، بو كيمي ائيله‌مله رين باشلاديغي ايلك آنلاردا تورك و آزه‌ربايجان پارتي، هؤرگوت، قوروم و درنه‌كله‌رين، اؤزه‌لليكله يوردديشيندا اولانلارين، تورك خالقي و گونئي آزه‌ربايجان آدينا، ايلك گونده‌ن دوغرودان و يئيينليكله ايلگيلي اولوسلارآراسي قوروم و مئيدييالارلا تماسا گئچيپ و اونلاري گرچه‌كده اولوپ بيته‌نله‌ر حاققيندا بيلگيله‌نديرمه‌سيدير. بئله‌جه بيزيم ائيله‌م و حره‌كه‌تله‌ريميزي، داها سونرا فارس و كوردله‌رين اؤز آدلارينا يازمالارينين قاباغيني آلميش اولارلار.
٤-يالان يايان مئدييالارا ائعتيراض ائتمه‌ك: اورمو گؤلو جان وئرير قييامي و بنزه‌ر اولايلاري فارسلار و كوردله‌رين ايران و دونيا مئديياسيندا يانليش سونمالاريني گؤره‌نده، بيزيم اينسانلار سوسمامالي، "ايت هوره‌ر كروان گئچه‌ر" اده‌بيياتينا يئتينمه‌مه‌ليديرله‌ر. سوسدوقجا و اؤزوموزو "ايت هوره‌ر كروان گئچه‌ر" اده‌بيياتي ايله آلداديرساق، اونلار هر شئييميزي، شهه‌رله‌ريميزي، ديليميزي و وار يوخوموزو بيره‌ر بيره‌ر تالان ائده‌جه‌كديرله‌ر. بئله دوروملاردا تورك و آزه‌ربايجانلي قوروم، هؤرگوت و درنه‌كله‌ر حتتا فردله‌ر و بيرئيله‌ر، يانليش بيلگي يايان مئدييايا (اؤرنه‌يين اورمونو دوغو كوردوستاندا گؤسته‌ره‌ن مئدييايا) رسمي اولاراق ائعتيراض ائتمه‌لي؛ اؤز ائعتيراضلاريني دا گنيش بيچيمده اينتئرنئتده يايينلاماليديرلار. بو كيمي ائعتيراضلارين، هم بونلاري يايان مئدييالارين، اؤز ايدديعالارينين يالان اولدوغونو آنلامالاريندا، هم ده خالقيميزدا سؤز قونوسو اولان سورونلا ايلگيلي دويارليليق يارانماسيندا اؤنه‌ملي رولو واردير
